Nisura Luka 1:1-80
1 Ato niha sangodödögö fangowuloi ba sanura ngawalö zalua si tola tafaduhusi tödö.+
2 Hadia zi no lasura tefaudu simane si no tarongo moroi ba niha si no mangila samösa+ hegöi samaʼema turia moroi khö Lowalangi.+
3 Andrö yaʼugö Teofilo nifosumange,+ uhalö gangetula enaʼö toföfö wanuragu khöu fefu ngawalö zalua börö me no uhaogö wamareso iʼotarai ba wamobörö.
4 Börö daʼö, aboto ba dödöu zindruhu si no lafahaʼö yaʼugö.+
5 Ba götö Herode,*+ razo niha Yudea, so samösa gere sotöi Zakharia moroi ba ngawawa Gabia.+ Foʼomonia moroi ba ngaʼötö Gaʼaroni, töinia Elizabe.
6 Atulö ira föna Lowalangi. Lö mosinegu ira ba laʼoʼö fefu goroisa hegöi huku Yehowa.*
7 Hizaʼi, lö hadöi khöra iraono börö me lö moʼono Gelizabe, ba no numalö ndröfira.
8 Samuza maʼökhö, mohalöwö ngawawa Gabia+ föna Lowalangi ba Zakharia zi tobali ere.
9 Simane si toʼölö lafalua ba wotatugöi haniha gere sohalöwö, yaʼia nifili ba wameʼe sumange somuhua+ ba naha niʼamoniʼö khö Yehowa.*+
10 Ato sibai niha sangandrö ba golayama me labeʼe zumange somuhua.
11 Ifalukhaisi ia malaʼika Yehowa,* no mosindro ia ba gambölö naha wanunu sumange somuhua.
12 Me iʼila daʼö Zakharia, ataʼu ia ba lö iʼila hadia nifaluania.
13 Hizaʼi imane khönia malaʼika andrö, ”Böi ataʼufi Zakharia. No irongo wangandröu Lowalangi, ba moʼono dania woʼomou Elizabe tumbu khönia nono matua, ba öbeʼe töinia Yohane.+
14 Ba falukha dania ndraʼugö waʼomuso dödö hegöi faʼowua-wua dödö sebua ba ato niha somuso tödö ba waʼatumbu nono daʼö,+
15 börö me ebua ia ba wamaigi Yehowa.*+ Hizaʼi, tebai ibadu nagu mazui tuo tanö böʼö.+ Fatua lö tumbu ia,* no fahöna khönia geheha niʼamoniʼö.+
16 Ato dania ndraono Gizaraʼeli nifangawulinia khö Yehowa* Lowalangira.+
17 Yaʼia göi zi oföna ifatenge Lowalangi börö wehulu dödö hegöi faʼabölönia simane niʼokhögö Gelia.+ Ibaliʼö dödö ndra ama hulö dödö ndraono,+ ba niha samadaö lasöndra waʼatua-tua niha satulö, enaʼö tobali ira ono mbanua nifaʼanö ba wamosumange Yehowa.”*+
18 Imane Zakharia khö malaʼika andrö, ”Hewisa wa tola alua daʼö? No atua ndraʼo saʼae simanö göi woʼomogu.”
19 Imane khönia malaʼika andrö, ”Gaberieli ndraʼodo,+ si so föna Lowalangi.+ Ifatenge ndraʼo ba wamaʼema turia somuso dödö andre khöu.
20 Börö me lö faduhu dödöu wehedegu salua dania ba ginötönia, tobali ndraʼugö si lö hede ba lö öʼila fahuhuo irege alua daʼa fefu.”
21 Gasa-gasa daʼö, labalo-baloi Zakharia niha sato, ba ahöli-höli dödöra börö me ara sibai ia bakha ba naha niʼamoniʼö.
22 Me möi ia baero, lö iʼila fahuhuo khöra. Aboto ba dödöra wa so gangilata sahöli-höli dödö niʼilania ba naha niʼamoniʼö. Börö me lö iʼila fahuhuo, ifadumaisi wahuhuosa faoma tanga hegöi bawania.
23 Me no awai ginötönia ba wangai halöwö niʼamoniʼö, mangawuli ia ba nomo.
24 Hauga hari aefa daʼö, manabina woʼomonia Elizabe. Ba nomo manö iʼiagö Elizabe lima waŵa waʼara. Imane,
25 ”Daʼa nifalua Yehowa* khögu iadaʼa. Iʼameʼegö tödö ndraʼo enaʼö lö laʼailasi ndraʼo niha.”+
26 Me önö waŵa dabina Gelizabe, ifatenge malaʼika Gaberieli+ Lowalangi ba mbanua Galilaia sotöi Nazareta
27 ba wamalukhaisi ono alawe sotöi Maria.+ No famatua nono alawe daʼö+ khö ndra matua sotöi Yosefo, ngaʼötö Dawido.
28 Me falukha ira, imane khönia malaʼika, ”Yaʼahowu, yaʼugö nifahowuʼö. Fao khöu Yehowa.”*
29 Ba tokea dödö Maria wamondrongo fehede daʼö. Iforege enaʼö aboto ba dödönia geluaha wangowai andrö.
30 Imane khönia malaʼika andrö, ”Böi ataʼufi Maria, iʼomasiʼö ndraʼugö Lowalangi.
31 Manabina dania ndraʼugö, ba tumbu khöu nono matua+ ba öbeʼe töinia Yesu.+
32 Tobali ia dania sebua+ ba lafotöi ia Ono moroi khö Wondrege Zalawa.+ Ibeʼe khönia Lowalangi Yehowa* dadaoma duania* Dawido,+
33 ba tobali ia Razo ba ngaʼötö Yakobo sagötö faʼara, ba lö tebulö Wamatörönia.”+
34 Imane Maria khö malaʼika andrö, ”Hewisa wa tola alua daʼö? Lö sorudu ndraʼo ba ndra matua.”+
35 Itema linia malaʼika, ”So dania waʼabölö geheha niʼamoniʼö si möi khöu,+ ba ilumöʼö ndraʼugö faʼabölö Wondrege Zalawa. Andrö lafotöi dania nono si tumbu andrö niʼamoniʼö,+ Ono Lowalangi.+
36 No önö waŵa göi manabina dalifusöu Elizabe, ono matua, hewaʼae no atua ia ba lafotöi ia ira alawe si lö ono.
37 Fefu niwaʼö Lowalangi hasambalö itörö.”+
38 Aefa daʼö imane Maria, ”Sawuyu Yehowa* ndraʼodo! Yaʼitörö khögu wehedemö andrö.” Aefa daʼö, mofanö malaʼika andrö iröi ia.
39 Lö ara aefa daʼö, iʼaliokö wofanö Maria möi ia ba mbanua si no ifasui hili ba Yehuda.
40 Möi ia ba nomo Zakharia ba iʼowai Gelizabe.
41 Me irongo Elizabe wangowai Maria andrö, manara nono si so ba dalunia. Fahöna geheha niʼamoniʼö khö Gelizabe
42 ba muʼao ia, ”Nifahowuʼö ndraʼugö moroi ba gotalua ndra alawe, hegöi ono ba dalumö andrö!
43 No sambua töi sebua me iʼondrasido ina Zoʼaya yaʼo!
44 Me urongo wangowaimö, manara nono si so ba dalugu börö waʼomuso dödö.
45 Ba yaʼahowu zi faduhu tödö. Fefu niwaʼö Yehowa* khönia ahori itörö.”
46 Imane Maria, ”Usuno Yehowa,*+
47 tebai utaha dödögu ba waʼomuso dödö börö Lowalangi Sangefaʼö yaʼo,+
48 börö me no iʼameʼegö tödö zawuyunia ira alawe si numana.+ Iʼotarai iadaʼa, fefu niha lafotöi ndraʼo somuso tödö,+
49 börö me no oya zebua si no ifalua khögu. Niʼamoniʼö döinia,+
50 ba ihakhösi tödö niha sangataʼufi yaʼia götö-götö waʼara.+
51 Iforomaʼö waʼabölö faoma taʼionia ba ifabali niha sangokhögö fayawasa.+
52 Iheta niha sebua kuaso moroi ba dadaomania+ ba iʼalawaʼö niha side-ide.+
53 Ibeʼe zi sökhi ba niha solofo irege abuso,+ ba ifofanö niha si kayo lö noro danga.
54 Itolo nono mbanuania Izaraʼeli ba wangoromaʼö wa lö olifu ia waʼahakhö dödö si no ifabuʼu+
55 khö Gaberahamo hegöi ba maʼuwunia+ irugi zi lö aetu, simane si no iwaʼö khö ndra tuada me föna.”
56 Toröi Maria khö Gelizabe mato tölu waŵa, aefa daʼö mangawuli ia ba nomonia.
57 Iadaʼa irugi inötö khö Gelizabe ba woʼono, ba tumbu khönia nono matua.
58 Me larongo ira talifusönia hegöi si faola omo wa no iforomaʼö khönia waʼahakhö dödö sebua Yehowa,* fao ira khönia ba waʼomuso dödö.+
59 Me irugi walu hari, tohare ira me lasuna nono daʼö,+ ba edöna labeʼe töinia Zakharia simane töi namania.
60 Hizaʼi imane inania, ”Böi! Hasambalö Yohane döinia.”
61 Ba lamane, ”Lö hadöi talifusöu sotöi daʼö.”
62 Lasofu khö namania, lafadumaisi wahuhuosa khönia faoma tanga hegöi bawara hadia döi somasi ibeʼe khö nono andrö.
63 Iʼandrö mbalö wafa enaʼö tola isura, ”Töinia Yohane.”+ Ahöli-höli dödöra fefu.
64 Ba ginötö daʼö, iʼanemaiʼö teboka mbawania ba iʼila mohede. Ibörögö fahuhuo ia+ ba isuno Lowalangi.
65 Ahöli-höli dödö niha ba zi fasuira, ba lafadunö-dunö zalua andrö ba mbanua si fasui Yudea.
66 Fefu niha samondrongo lafatou-tou tödöra ba manofu-nofu ira, ”Hewisa dania lua-lua nono andrö?” Sindruhu wa fao Yehowa* khö nono daʼö.
67 Aefa daʼö, ama nono andrö sotöi Zakharia, fahöna khönia geheha niʼamoniʼö ba mamaʼeleʼö ia,
68 ”Nisuno Yehowa* Lowalangi Gizaraʼeli,+ börö me no iʼameʼegö tödö nono mbanuania ba iʼefaʼö ira.+
69 No ibeʼe khöda dandru fangorifi*+ moroi ba ngaʼötö Dawido enoninia,+
70 simane nifaʼemania khö ndra samaʼeleʼö niʼamoniʼö me götö föna,+
71 yaʼia daʼö fangorifi moroi ba nududa hegöi ba danga niha si fatiu tödö khöda,+
72 ba wangoromaʼö khöda faʼahakhö dödö si no ifabuʼu khö ndra tuada hegöi ba wanörö tödö buʼusa linia niʼamoniʼö,+
73 yaʼia daʼö, hölunia khö duada Aberahamo.+
74 Me no iʼefaʼö ita Lowalangi moroi ba danga nudu, ibeʼe khöda döi sebua ba wangai halöwö niʼamoniʼö khönia si lö faʼataʼu,
75 ba faʼalöfaröi hegöi amuata satulö fönania sandrohu faʼaurida.
76 Ba yaʼugö onogu, lafotöi ndraʼugö samaʼeleʼö moroi khö Wondrege Zalawa, börö me yaʼugö zi oföna niʼogunaʼö Yehowa* ba wangehenaigö lala khönia,+
77 ba wameʼe faʼaboto ba dödö sanandrösa ba wangefaʼö ono mbanuania moroi ba horöra,+
78 börö waʼahakhö dödö Lowalangida. Faʼahakhö dödö daʼa mbörö wa ihagaini ita haga waʼamoluo moroi ba zorugo,
79 ba wohagaini niha si dadao ba zogömi-gömi ba si göna lumö waʼamate+ hegöi ba wanuturu lalada saekhu ba waʼatulö.”
80 Tedou waʼebua nono andrö ba itugu aro wamatinia. Ba danö si mate toröi ia irege alua ginötö weʼamöinia föna ndraono Gizaraʼeli.
Nisura ba gahe zura
^ Faigi Geluaha Ngawua Wehede.
^ Mazui ”Iʼotarai me so ia ba dalu ninania”.
^ Sin.: ”namania”.
^ Mazui ”zangorifi sabölö”. Faigi duho ”Tandru” ba Geluaha Ngawua Wehede.
