Nisura Luka 10:1-42
10 Me no aefa daʼö fefu, so 70 niha tanö böʼö nifili Yesu. Ifatenge ira daru-darua+ enaʼö ladari-dari weʼamöi ero sambu-sambua banua hegöi ba nahia niʼondrasinia dania.
2 Aefa daʼö, imane khöra, ”Ebolo mbasitö, ba lö ato zohalöwö. Börö daʼö, miʼandrö khö Zokhö basitö enaʼö ato ifatenge zohalöwö.”+
3 Miʼaeʼe! Ufatenge ami hulö nono mbiri-biri ba hunö nasu gatua.+
4 Böi miʼohe naha gefe, naha gö, mazui sandrala,+ ba böi miʼowai niha* si falukha khömi ba lala.
5 Na möi ami ba zi sambua omo, si oföna miwaʼö, ’Yafalukha ami waʼohahau dödö ba nomo andre.’+
6 Na so ba daʼö niha somasi faʼohahau dödö, ba falukha ia waʼohahau dödö niʼandrömi. Hizaʼi na lö hadöi, mangawuli khömi waʼohahau dödö andrö.
7 Miʼiagö ba nomo+ niha somasi faʼohahau dödö andrö, miʼa ba mibadu hadia nibeʼera,+ börö me sinangea na itema luonia sohalöwö.+ Böi mifalali-lali nomo wangalui sohahau dödömi.
8 ”Simanö göi na möi ami ba zi sambua banua ba latemaʼö ami, miʼa hadia nibeʼera,
9 ba mifadöhö niha sofökhö ba daʼö, mimane, ’No ahatö Wamatörö Lowalangi.’+
10 Hizaʼi, na möi ami ba zi sambua banua ba lö latemaʼö ami, miʼaeʼe ba lala sebua ba mimane,
11 ’Si tobali famangelama khömi, maʼanotogö gawu-gawu si falemba ba gahema ba mbanua andre.+ Yaʼaboto ba dödömi, no ahatö Wamatörö Lowalangi.’
12 Uʼombakhaʼö khömi, abölö-bölö wanguhuku si göna banua andrö moroi ba mbanua Zodoma na Luo Wanguhuku.+
13 ”Alai ami Khorazi! Alai ami Mbetisaida! Na ba Diro hegöi ba Zidona menaʼö alua dandra sahöli-höli dödö salua ba mbanuami andrö, tatu iʼotarai me föna no lafalalini gera-erara. Laʼonukha goni ba lalau nawu ba högöra.+
14 Börö daʼö, abölö-bölö wanguhuku si göna ami moroi ba mbanua Diro hegöi Sidona na Luo Wanguhuku.
15 Ba yaʼugö Kafanauma, hadia teʼalawaʼö ndraʼugö ba mbanua si yawa? Ba Lewatö* nahau!
16 ”Haniha zamondrongo nifaʼemami, no lafondrondrongo ndraʼo.+ Haniha zangositengagö yaʼami, no laʼositengagö ndraʼo. Haniha zangositengagö yaʼami, ba no laʼositengagö zamatenge yaʼo.”+
17 Aefa daʼö, mangawuli ndra nifahaʼönia si 70 si fao faʼomuso dödö ba lamane, ”He Soʼaya, me maʼogunaʼö döimö, ba laʼoʼö niwaʼöma ira malaʼika si lö sökhi.”+
18 Imane khöra Yesu, ”No uʼila Zatana, aekhu+ ia hulö gari mbanua moroi ba dalu mbanua.
19 No ubeʼe khömi waʼabölö ba wohundragö ulö ba tongo, hegöi ba wolawa faʼabölö nudu.+ Lö si tola mamaʼala yaʼami.
20 Böi omuso dödömi me no laʼoʼö limi ira malaʼika si lö sökhi andrö, hizaʼi miʼomusoiʼö dödömi börö me no tesura döimi ba zorugo.”+
21 Ba ginötö daʼö, omuso dödö Yesu börö geheha niʼamoniʼö ba imane, ”Usuno ndraʼugö föna niha sato, he Ama, Samatörö banua si yawa awö danö, börö me no öbiniʼö daʼa ba niha sagatua-tua ba salawa sekola,+ hizaʼi no öfatunö ba niha sangide-ngideʼö yaʼia simane iraono. Tefaudu ba gohitö dödöu daʼa, he Ama.”+
22 Imane nasa Yesu, ”No ibeʼe ba dangagu fefu hadia ia Amagu. Lö sangila Ono andrö baero Nama, ba lö sangila haniha Nama andrö baero Nono+ hegöi niha nifahaʼö Nono andrö sanandrösa khö Nama.”+
23 Me lö hadöi niha ba zi fasuira, imane khö ndra nifahaʼönia, ”Yaʼahowu zangila fefu hadia niʼilami.+
24 Umane khömi, ato zamaʼeleʼö hegöi razo somasi mangila ngawalö niʼilami, hizaʼi lö laʼila.+ Omasi göi larongo ngawalö nirongomi, hizaʼi lö larongo.”
25 No mozizio ba daʼö samösa zangila amakhoita, itandraigö Yesu imane, ”He Samahaʼö, hadia zinangea ufalua enaʼö usöndra waʼauri si lö aetu?”+
26 Imane Yesu, ”Hadia zi no tesura ba Goroisa Moze? Hadia zaboto ba dödömö?”
27 Imane niha andrö, ”’Omasiʼö Yehowa* Lowalangiu moroi siʼaikö ba dödöu, nosou* maʼasambua, faʼabölöu ba era-erau maʼafefuʼ+ ba, ’omasiʼö nawöu simane faʼomasiu ndraʼugö.’”+
28 Imane khönia Yesu, ”Atulö niwaʼömö. Böi böhöli wamalua daʼö ba ösöndra waʼauri si lö aetu.”+
29 Börö me omasi ia wangoromaʼö faʼatulönia,+ imane khö Yesu, ”Haniha zindruhunia nawögu andrö?”
30 Itema linia Yesu, ”So niha sangawuli moroi ba Yeruzalema si numalö ba Yerikho, no larabu ia niha. Lahalö nukha hegöi haratonia, laböbözi irege arakhagö mate, ba laröi ia.
31 Tefaudu so samösa gere sanörö lala daʼö. Me iʼila, idölö manö fofanö ba zi tambai lala.
32 Simanö göi samösa niha Lewi. Me irugi ba iʼila niha daʼö, ilau manö göi mofanö ba zi tambai lala.
33 Hizaʼi, so samösa niha Zamaria+ sanörö lala daʼö. Me iʼila, tumbu khönia waʼahakhö dödö.
34 Iʼondrasi ia niha Zamaria andrö, aefa daʼö iböbö zokho niha daʼö me no aefa idalu-daluni faoma fanikha ba agu. Ifazawa yawa ba hulu galide, iʼohe ba nomo niʼokosi ba wondrorogö yaʼia.
35 Mahemolunia, ihalö dombua dinar* aefa daʼö ibeʼe khö zondrorogö ba nomo niʼokosi andrö imane, ’Rorogö ia, ba na töra moroi ba daʼa niʼölimö, ubuʼa khöu dania na mangawulido.’
36 Moloʼö yaʼugö, haniha ba gotalua zi datölu andre zi tobali awö+ ba niha niböbözi andrö?”
37 Itema li, ”Niha sangoromaʼö faʼahakhö dödö khönia.”+ Aefa daʼö imane Yesu, ”Ofanö ba falua göi zimane daʼö.”+
38 Latohugö wofanö ba möi ira ba zi sambua banua. So samösa ba daʼö ndra alawe sotöi Marata,+ ikaoni Yesu ba nomonia.
39 So göi nakhinia sotöi Maria. No modadao Maria ahatö ba gahe Yesu, lö aetu ifondrondrongo wamahaʼönia.
40 Hizaʼi, no arörö Marata ba halöwönia soya sibai. Tohare ia, imane khö Yesu, ”He Soʼaya, hadia lö öʼila wa yaʼodo manö zohalöwö? Waʼö khö Maria, enaʼö itolodo.”
41 Itema linia Soʼaya, ”He Marata, he Marata, oya manö zabu dödöu.
42 Sindruhunia, ha maʼifu niʼogunaʼöda, mazui ha sambua. Na Maria, no ifili khönia zi sökhi+ ba lö lahalö khönia daʼö.”
Nisura ba gahe zura
^ Si toʼölö lafalua me luo daʼö ero laʼowai niha, yaʼia daʼö lalau faʼuma, latalagui nawöra, ba fahuo-huo ira.
^ Mazui ”Hades”. Daʼa lewatö niha sato. Faigi Geluaha Ngawua Wehede.
^ Faigi Geluaha Ngawua Wehede.
