Nisura Luka 11:1-54
11 Samuza maʼökhö, möi mangandrö Yesu ba zi sambua nahia. Me no aefa mangandrö ia, samösa nifahaʼö zangumaʼö khönia imane, ”He Soʼaya, fahaʼö ndraʼaga wangandrö simane nifalua Yohane khö ndra nifahaʼönia.”
2 Imane khöra, ”Na mangandrö ami mimane, ’He Ama, yateʼamoniʼö döimö.+ Yatohare Wamatörömö.+
3 Beʼe zoguna* khöma ero maʼökhö.+
4 Ba efaʼö khöma horöma+ simane fangefaʼöma sala ba zi so sala* khöma.+ Böi ohe ndraʼaga ba wanandraigö.’”*+
5 Aefa daʼö imane, ”Hewisa na so samösa zi fahuwu khömi ba möi ami ba nomonia ba zi talu mbongi, ba mimane, ’He kawa, beʼe nifizagu tölu ngawua roti maʼifu,
6 lö ara tö tohare nawögu, möi ia ba nomogu ba lö hadöi si tola ubeʼe önia.’
7 Hizaʼi itema linia awönia andrö moroi bakha ba nomo, ’Böi hede-hede khögu ua. No ukusi mbawandruhö, ba no mörö ndraonogu ba zingagu. Tebai maosodo wameʼe khöu hadia ia.’
8 Ufatunö khömi, hewaʼae fahuwu ami, lö omasi ia maoso ba wameʼe hadia ia. Hizaʼi, börö me miforege,+ hasambalö maoso ia ba ibeʼe hadia niʼandrömi.
9 Andrö uwaʼö khömi, böi miböhöli wangandrö+ ba tebeʼe khömi; böi mibato wangalui ba misöndra; mibökö-bökö mbawandruhö ba tebokai khömi.+
10 Dozi sangandrö ba latema,+ sangalui ba lasöndra, ba samökö-mökö bawandruhö ba tebokai khönia.
11 Sindruhunia, haniha zatua sameʼe ulö khö nononia na iʼandrö giʼa?+
12 Mazui ibeʼe dongo na iʼandrö gadulo?
13 Andrö, hewaʼae niha sebua horö ami ba miʼila mibeʼe zi sökhi ba ndraonomi, mendrua manö Namami si so ba zorugo! Hasambalö ibeʼe geheha niʼamoniʼö ba niha sangandrö khönia.”+
14 Aefa daʼö, ifofanö malaʼika si lö sökhi samakao ira matua irege lö böla li.+ Me no mofanö malaʼika si lö sökhi andrö, tola ifuli fahuhuo ndra matua daʼö ba ahöli-höli dödö niha.+
15 Hizaʼi so zangumaʼö, ”Ifofanö malaʼika si lö sökhi börö wanolo moroi khö Mbelesebu,* kafalo malaʼika si lö sökhi.”+
16 So göi zanandraigö yaʼia, laʼandrö enaʼö iforomaʼö dandra+ moroi ba zorugo.
17 Börö me iʼila zi so ba dödöra,+ imane Yesu, ”Dozi famatörö, na fabali dödö hasambalö adudu, ba dozi fongambatö, na fabali gera-era hasambalö adudu.
18 Simanö göi Zatana na fabali dödönia, hewisa wa tola aro wamatörönia? Börö me miwaʼö, ufofanö malaʼika si lö sökhi börö wanolo moroi khö Mbelesebu.
19 Na ufofanö malaʼika si lö sökhi börö waʼabölö Mbelesebu, hezo moroi waʼabölö ba niha soloʼö yaʼami andrö ba wamofanö yaʼia? Börö daʼö, yaʼira zangombakha wa fasala ami.
20 Na ufofanö malaʼika si lö sökhi börö wanolo moroi ba geheha* Lowalangi,+ eluahania no so ba daʼa Wamatörö Lowalangi hewaʼae lö saboto ba dödömi.+
21 Na so ndra matua sabölö ba so göi wangönania ba wozago omonia, tatu manö tebai latagö gokhötania.
22 Hizaʼi, na so samösa zabölö moroi khönia ba ikalaisi ndra matua daʼö, irabu fefu wangöna sabeʼe dödö ndra matua no mege ba idozigö ba niha misa harato nihalönia.
23 Gofu haniha zi lö faʼawö khögu, eluahania si faʼudu khögu daʼö. Ba haniha zi lö fao khögu ba wangowuloi niha, eluahania samabali.+
24 ”Me no aheta malaʼika si lö sökhi ba mboto zi samösa niha, itörö danö si lö idanö malaʼika si lö sökhi andrö ba wangalui nahia wolombase. Hizaʼi, me lö isöndra imane, ’Ufulido ba nomo niröigu andrö.’+
25 Me irugi, iʼila nomo andrö no labözini ba no laʼehaogö.
26 Ba mofanö ia, möi ikaoni dafitu tö malaʼika sabölö amuʼi moroi khönia enaʼö laʼiagö mboto niha andrö. Itugu abölö-bölö zalua ba niha daʼö moroi ba zi oföna.”
27 Me fahuhuo nasa Yesu, so samösa ndra alawe siʼao moroi ba gotalua niha, ”Yaʼahowu ndra alawe soʼadonogö ba samaenu yaʼugö!”+
28 Hizaʼi imane, ”Löʼö, nifahowuʼö yaʼia daʼö, samondrongo ba samalua taromali Lowalangi!”+
29 Me ato niha sowulo ba daʼö, ibörögö fahuhuo Yesu imane, ”Niha ba ginötö andre, lö sökhi ira. Laʼandrö dandra sahöli-höli dödö, hizaʼi lö laʼila dandra salua baero khö Yona.+
30 Simane Yona+ tobali tandra ba niha Niniwe, simanö göi Nono niha tobali tandra ba niha götö daʼa.
31 Na Luo Wanguhuku, maoso dania ratu moroi raya+ si fendronga ba niha götö daʼa. Iwaʼö wa fasala niha götö daʼa, börö me tohare ia moroi ba wondrege danö ba wamondrondrongo faʼatua-tua Zelomo. Sindruhunia, so ba daʼa zi töra moroi khö Zelomo.+
32 Na Luo Wanguhuku, ifuli tesusugi niha Niniwe si fendronga ba niha götö daʼa. Börö me no lafalalini gera-erara niha Niniwe me larongo duria nifaʼema Yona,+ andrö wa lawaʼö fasala niha götö daʼa. Sindruhunia, so ba daʼa zi töra moroi khö Yona.
33 Na no mutunu wandru, lö labeʼe ba naha si tobini mazui barö raga-raga,* hizaʼi labeʼe yawa ba naha wandru+ enaʼö laʼila hagania dozi si möi yomo ba nomo.
34 Haga mboto hörö. Na öʼosambalöʼö* höröu, mohaga mbotou maʼasambua. Na lö sökhi höröu, ogömi fefu mbotou.+
35 Börö daʼö angelama, böi tobali faʼogömi-gömi haga si so ba mbotou.
36 Na mohaga fefu mbotou ba lö hadöi sogömi-gömi, tobali haga daʼö hulö wandru sohagaini yaʼugö.”
37 Me no aefa iwaʼö fefu daʼö Yesu, samösa Warizaiʼo sogaoni yaʼia enaʼö fao ira manga. Ba möi Yesu ba nomonia, modadao ia föna meza.
38 Hizaʼi, ahöli dödö Warizaiʼo andrö börö me lö isasai dangania* Yesu fatua lö manga.+
39 Imane khönia Soʼaya, ”Yaʼami niha Farizaiʼo, mihaogö tanö baero mako hegöi figa gömi, hizaʼi tödömi afönu faʼoluʼa-luʼa ba faʼalösökhi.+
40 Lö faduhu dödömi! Sangehaogö tanö baero tatu manö yaʼia göi zangehaogö tanö bakha.
41 Andrö na mamuala ami ba niha,* mibeʼe ia soroi ba dödö ba afönu waʼasökhimi.
42 Alai ami Farizaiʼo, mibeʼe zi sambua niʼofulu moroi ba danömö ruku-ruku, igu hegöi ngawalö wangomuhua gö.*+ Ba lö ba dödömi faʼatulö ba faʼomasi khö Lowalangi! Moguna göi wameʼe si sambua niʼofulu, hizaʼi tanö böʼö tebai muʼosiwawöi.+
43 Alai ami niha Farizaiʼo, börö me omasi ami dadaoma tanö föna* ba nahia waʼowulo,* ba omasi ami lafosumange ba nahia sato niha!*+
44 Alai ami me hulö lewatö si lö tandra-tandra+ irege lö laʼila niha me latörö yawa dete!”
45 Samösa moroi ba gotalua zangila amakhoita imane, ”He Samahaʼö, öʼailasiga ba wehedemö andrö.”
46 Imane Yesu, ”Alai ami sangila amakhoita, mifonoro niha faoma noro sabua, ba lö sa mituko turumi noro andrö!+
47 ”Alai ami börö me mifazökhi lewatö ndra samaʼeleʼö, ba sindruhunia ira tuami zamunu yaʼira!+
48 Tatu manö miʼila hadia nifalua ndra tuami, hizaʼi fao dödömi khöra. Yaʼira zamunu samaʼeleʼö+ ba yaʼami göi zamazökhi lewatöra.
49 Andrö wa imane faʼatua-tua Lowalangi, ’Ufatenge khöra zamaʼeleʼö hegöi sinenge, ba labunu dania ba lafakao ösa.
50 Börö daʼö, ba niha götö daʼa dania tezofu-zofu ndro zamaʼeleʼö niduwagö iʼotarai me tumbu ngaʼötö niha ba gulidanö,*+
51 iʼotarai ndro Habeli+ irugi ndro Zakharia, nibunu ba gotalua naha wanunu sumange ba nomo Lowalangi.’*+ Ufatunö khömi, ba niha götö daʼa dania tezofu-zofu ndro zamaʼeleʼö andrö.
52 ”Alai ami sangila amakhoita börö me mihalö nono kusi waʼaboto ba dödö. Lö möi ami bakha ba mitaha-taha niha somasi möi!”+
53 Me mofanö Yesu moroi ba daʼö, ibörögö lafetaʼu ia ira sangila amakhoita hegöi Farizaiʼo, ba oya labeʼe khönia wanofu-nofu.
54 Labalo-baloi hawaʼara iwaʼö wehede si tobali tandrawa ba wamöbögö khönia si lö duhu.+
Nisura ba gahe zura
^ Sin.: ”roti”.
^ Sin.: ”ba zoʼömö”.
^ Mazui ”Böi tehegö awuwu ndraʼaga ba wanandraigö”.
^ Töi nibeʼe khö Zatana.
^ Sin.: ”duru”.
^ Raga-raga niʼogunaʼö ba daʼa eluahania fanuʼa gö simane gandru, rigi mazui böra.
^ Sin.: ”öna-öna”.
^ Eluahania manasai tanga moloʼö zi toʼölö lafalua ira niha Yahudi.
^ Faigi Geluaha Ngawua Wehede.
^ Mazui ”ngawalö sayu”.
^ Mazui ”ba fasa”.
^ Sin.: ”zinagoga”.
^ Mazui ”sabölö sökhi”.
^ Eluahania daʼa iraono Gadamo ba Khawa.
^ Mazui ”ba gosali”.
