Nisura Luka 18:1-43
18 Aefa daʼö, ifatunö Yesu sambua gamaedola enaʼö lö laböhöli wangandrö ba lö adage-dage.+
2 Imane, ”Ba zi sambua banua, so zanguhuku si lö mangataʼufi Lowalangi ba si lö mamosumange niha.
3 Ba daʼö göi so lakha mbanua si no hauga kali möi khönia imane, ’Tolodo ba zi faʼudu khögu andrö, halö gangetula satulö ba wanguhuku.’
4 Hizaʼi, ba zi hauga kali lö omasi zanguhuku andrö. Ba gafuriata imane tödönia, ’Hewaʼae lö uʼataʼufi Lowalangi ba lö göi ufosumange niha,
5 hizaʼi börö me lö ibato wamusi tödögu lakha mbanua daʼa, utolo ia wanöndra faʼatulö enaʼö lö möi ia ba daʼa saʼae ba atagedo ba niʼandrönia.’”*+
6 Aefa daʼö imane Yesu, ”Fondrondrongo hadia niwaʼö zanguhuku andrö, hewaʼae tenga niha satulö ia!
7 Tobali, hasambalö iʼasogö waʼatulö ba niha nifilinia Lowalangi, si lö mamöhöli feʼao khönia bongi maʼökhö.+ Ebolo göi dödönia khöra.+
8 Ufatunö khömi, hasambalö iʼasogö khöra waʼatulö Lowalangi ba waʼalio. Hizaʼi, na tohare Nono niha, hadia isöndra wamati simane daʼö ba gulidanö?”
9 Itutunö göi gamaedola ba niha sangumaʼö tödöra wa atulö ira ba sangosiwawöi niha böʼö. Imane,
10 ”So darua ndra matua si möi mangandrö ba gosali, samösa Warizaiʼo ba samösa zanugi pajak.
11 Mosindro Warizaiʼo andrö ba mangandrö ia ba dödönia, ’He Lowalangi, uʼandrö saohagölö khöu me tenga simane niha böʼö ndraʼo, niha sorabu, si lö mamalua sindruhu, sohorö, mazui simane sanugi pajak andre.
12 Dua kali samigu fuasö ndraʼo; ubeʼe göi zi sambua niʼofulu moroi ba nisöndragu.’+
13 Hizaʼi, lö barani ifaöga hörönia sanugi pajak andrö si zizio ba zaröu. Lö ibato wamözi tötöʼania ba imane, ’He Lowalangi, hakhösi tödö ndraʼo me yaʼo niha sebua horö.’+
14 Ufatunö khömi, me mangawuli niha daʼa, abölö atulö ia föna Lowalangi moroi khö Warizaiʼo andrö.+ Börö me dozi sangebuaʼö yaʼia, daʼö niʼailasi, ba haniha zangide-ngideʼö yaʼia, daʼö niʼebuaʼö.”+
15 Ato niha solohe onora side-ide khö Yesu, enaʼö itufa tangania ndraono andrö. Hizaʼi, me laʼila daʼö ira nifahaʼö, mofönu ira.+
16 Hewaʼae simanö, iʼandrö Yesu enaʼö lafatenge khönia ndraono daʼö ba imane, ”Mifaʼamöi khögu ndraono andrö. Böi mitaha ira, börö me simane yaʼira zangokhögö Famatörö Lowalangi.+
17 Sindruhu niwaʼögu, niha si lö manema Famatörö Lowalangi simane fanemaʼö nono side-ide andre, tebai tefaʼamöi ira ba daʼö.”+
18 Samösa zondröniaʼö niha Yahudi zanofu khö Yesu, ”He Samahaʼö si Sökhi, hadia zinangea ufalua enaʼö usöndra waʼauri si lö aetu?”+
19 Itema linia Yesu, ”Hana wa öwaʼö si sökhi ndraʼo? Lö si sökhi baero Lowalangi.+
20 No aboto ba dödöu goroisa: ’Böi ohorö,+ böi bunu niha,+ böi anagö,+ böi böbögö khö nawöu zi lö duhu,+ ba fosumange namau awö ninau.’”+
21 Imane niha andrö, ”No ufalua daʼö fefu iʼotarai me ide-idedo.”
22 Me irongo daʼö Yesu imane, ”So sambalö tö zi lö nifaluamö. Famawa fefu haratomö ba kefe daʼö beʼe ba zi numana, ba ösöndra haratomö ba zorugo. Aefa daʼö, oʼö ndraʼo.”+
23 Abu sibai dödö niha daʼö me irongo niwaʼö Yesu börö me kayo sibai ia.+
24 Ifaigi ia Yesu ba imane, ”Afökhö ba niha sebua kefe ba wogamö Famatörö Lowalangi andrö!+
25 Sindruhunia, abölö aoha ba gondra wanörö tögi walölöwa moroi na ikhamö Wamatörö Lowalangi niha si kayo.”+
26 Lamane niha samondrongo, ”Na simanö, haniha niʼorifi dania?”+
27 Itema lira Yesu, ”Si tebai ba niha, ba tola khö Lowalangi.”+
28 Imane Fetero, ”No maröi fefu haratoma ba maʼoʼö ndraʼugö.”+
29 Imane khöra Yesu, ”Sindruhu niwaʼögu khömi, gofu haniha zondröi omonia, mazui foʼomonia, mazui akhinia, mazui satuania, mazui ononia börö Wamatörö Lowalangi,+
30 hasambalö itema mato hauga winaeta iadaʼa ba faʼauri si lö aetu ba götö* si so miföna.”+
31 Aefa daʼö, ikaoni ndra sinengenia si 12 enaʼö lafabali ira ba danö böʼö. Imane khöra, ”Möi ita ba Yeruzalema, ba alua fefu nisura ndra samaʼeleʼö sanandrösa ba Nono niha andrö.+
32 Duma-dumania, labeʼe ia ba danga soi böʼö+ ba wangoʼaya yaʼia,+ laʼailasi, ba ladiloi.+
33 Laböbözi ia, labunu,+ aefa daʼö tesusugi ia ba ngaluo si tölu.”+
34 Hewaʼae simanö, lö aboto ba dödö ndra sinengenia börö me no tobini khöra geluaha wehede daʼö.
35 Me arakhagö ofeta Yesu ba mbanua Yerikho, so ndra matua sauʼa si dadao ba zinga lala ba wangandrö-ngandrö sadaka.+
36 Börö me irongo höngö-höngö niha sato sanörö lala, isofu hadia zalua.
37 Lafatunö khönia, ”Tohare Yesu, niha Nazareta!”
38 Muʼao ia, ”He Yesu, Maʼuwu Dawido, hakhösi tödö ndraʼo!”
39 Mofönu niha si so tanö föna, lawaʼö khönia enaʼö ihonogö ia. Hizaʼi, itugu ebua linia weʼao, ”He Maʼuwu Dawido, hakhösi tödö ndraʼo!”
40 Tebato Yesu, iʼandrö enaʼö laʼohe khönia niha daʼö. Me no ahatö ia, isofu khönia Yesu,
41 ”Hadia zomasiʼö ufalua khöu?” Itema li, ”He Soʼaya, omasido uʼila niha.”
42 Imane khönia Yesu, ”Tola öʼila niha. No ifadöhö ndraʼugö famatimö.”+
43 Ba ginötö daʼö, iʼanemaiʼö iʼila niha. Aefa daʼö, ibörögö iʼoʼö Yesu+ ba ifolakhömi Lowalangi. Fefu zangila salua andrö lasuno Lowalangi.+
