Nisura Luka 19:1-48
19 Möi Yesu ba Yerikho, itörö mbanua daʼö.
2 So ba daʼö ndra matua si kayo, töinia Sakaiʼo kafalo zanugi pajak.
3 Omasi sibai ia iʼila Yesu, hizaʼi lö oroma börö me no adogo-dogo ia ba ato göi niha ba daʼö.
4 Andrö fagohi ia ihulö niha sato ba manöi ia ba döla geu ara enaʼö iʼila na itörö daʼö Yesu.
5 Me irugi daʼö Yesu, ifaöga ia ba imane, ”Aliokö weʼamöi tou Sakaiʼo! Hasambalö möido fatome ba nomou maʼökhö.”
6 Gösö möi tou Zakaiʼo ba itemaʼö Yesu ba nomonia si fao faʼomuso dödö.
7 Me laʼila daʼö niha sato, fatuwu ira ba lalau fangöngö-ngöngö, ”Fatome ia ba nomo zebua horö.”+
8 Mozizio Zakaiʼo ba imane khö Yesu, ”He Soʼaya, matonga moroi ba haratogu ubeʼe ba niha si numana. Gofu haniha nilimogu ba gefe, hasambalö ufuli khönia öfa winaeta.”+
9 Imane Yesu, ”Maʼökhö andre, no ibeʼe wangorifi khönia Lowalangi hegöi ba zoroi yomonia börö me ngaʼötö Gaberahamo göi ia.
10 Ba daʼö möi Nono niha ba wangorifi hegöi ba wangalui si no elungu.”+
11 Me lafondrondrongo nasa huhuo Yesu ira nifahaʼönia, itutunö khöra sambua tö gamaedola. No ahatö irugi Yeruzalema, ba lawalinga laʼila waʼatefasindro Wamatörö Lowalangi na no irugi daʼö.+
12 Imane khöra, ”So samösa duhenöri si möi ba mbanua saröu+ enaʼö tobali ia razo. Aefa daʼö, mangawuli ia.
13 Fatua lö mofanö ia, ikaoni dafulu zawuyunia. Ibeʼe khöra fulu mina* ba imane, ’Mifake gefe daʼa ba wogale irege mangawulido.’+
14 Hizaʼi, fatuwu niha mbanua daʼö khönia. Lafatenge mato hadauga niha ba wangumaʼö khönia, ’Lö omasiga na tobali ndraʼugö razoma.’
15 ”Ba gafuriata me no tobali ia razo, ilau mangawuli. Aefa daʼö, ikaoni ndra sawuyunia si no ibeʼe kefe.* Omasi ia iʼila hawaʼoya hare zi no lasöndra.+
16 Tohare zawuyu si oföna ba imane, ’He Sokhö yaʼo, si sambua mina nibeʼemö khögu no usöndra hare fulu mina.’+
17 Imane khö zawuyunia andrö, ’Sökhi sibai, sawuyu si sökhi ndraʼugö! Börö me lö faröi ndraʼugö ba wondrege zide-ide, yaʼugö zamatörö si fulu banua.’+
18 Lö ara, tohare zawuyu tanö böʼö imane, ’He Sokhö yaʼo, si sambua mina nibeʼemö khögu no usöndra hare lima mina.’+
19 Imane göi khö zawuyunia andre, ’Yaʼugö zamatörö si lima banua.’
20 Hizaʼi, tohare samösa tö zawuyu imane, ’He Sokhö yaʼo, yaʼe gefemö, no uʼiröʼö ba lembe.
21 Simane daʼa, ataʼudo ndraʼugö börö me niha si lö sökhi. Öhalö gefe si lö niʼiröʼöu, ba öbasi zi lö nitanöu.’+
22 Imane khö zawuyunia andrö, ’Sawuyu si lö sökhi. Uʼetuʼö hukumau ba wehedemö. No öʼila wa niha si lö sökhi ndraʼo, sangai kefe si lö niʼiröʼögu ba samasi si lö nitanögu.+
23 Tobali, hana wa lö öbeʼe gefegu* bakha ba bank? Na mangawulido, tola uhalö gefe daʼö fabaya bungania.’
24 ”Aefa daʼö imane ba niha sozizio ba daʼö, ’Halö gefe mina daʼö khönia ba beʼe khö zawuyu si fulu mina.’+
25 Hizaʼi lamane, ’He Sokhö yaʼaga, no so khönia fulu mina!’
26 Itema li, ’Ufatunö khömi, dozi sa haniha zi so, ba lanönö khönia, hizaʼi ba niha si löʼö laheta khönia zi so khönia andrö.+
27 Iadaʼa, miʼohe andre zi faʼudu khögu, si lö omasi na tobali ndraʼo razora, mibunu ira fönagu.’”
28 Me no aefa itutunö fefu daʼö Yesu, idari-dari wofanö ba Yeruzalema.
29 Me no ahatö larugi Mbetifage hegöi Betania ba hili nifotöi Hili Zaitu,+ ifatenge darua nifahaʼönia,+
30 imane, ”Miʼaeʼe ba mbanua side-ide andrö föna. Na no mirugi, miʼila dania sageu nono galide si no lafesu si lö irai lafonoro. Mitotoʼö wesunia ba miʼohe ba daʼa.
31 Na so zanofu, ’Hana wa mitotoʼö daʼö?’ mimane wangumaʼö, ’Moguna khö Zoʼaya.’”
32 Mofanö ndra nifahaʼönia si darua andrö ba laʼila nono galide simane niwaʼö Yesu.+
33 Hizaʼi, me latotoʼö wesu nono galide andrö lamane sokhö, ”Hana wa mitotoʼö wesu galide andrö?”
34 Latema li, ”Moguna khö Zoʼaya.”
35 Laʼohe nono galide andrö khö Yesu, aefa daʼö labeʼe mbarura tanö baero ba hulu nono galide andrö ba modadao Yesu yawa.+
36 Me itörö Yesu, labologö ba lala mbarura tanö baero niha sato.+
37 Me irugi lala sahatö numalö mitou ba Hili Zaitu, ibörögö omuso dödö ndra nifahaʼönia fefu ba lasuno Lowalangi börö dandra sahöli-höli dödö niʼilara.
38 Lamane, ”Yatefahowuʼö Razo si tohare ba döi Yehowa!* Ohahau dödö zorugo ba tefolakhömi Lowalangi ba nahia fondrege zalawa!”+
39 Hizaʼi, so ösa niha Farizaiʼo ba gotaluara sangumaʼö khö Yesu, ”He Samahaʼö, tegu ndra nifahaʼömö andrö.”+
40 Itema lira Yesu, ”Uʼombakhaʼö khömi, na lö hede-hedera, kara daʼa dania ziʼao.”
41 Me no ahatö irugi Yeruzalema, ifaigi mbanua daʼö ba iʼeʼesi.+
42 Imane, ”Enaʼö na aboto ba dödöu zi tola molohe khöu faʼatulö, hizaʼi no mubiniʼö khöu daʼö iadaʼa.+
43 Ba ginötönia dania, lafazökhi göli eu satarö si faʼudu khöu ba zi fasuimö. Lafaʼuʼu ba lalaziʼö ndraʼugö iʼotarai watalinga danö.+
44 Lafaloʼo ndraʼugö ba danö ba lahori nonou.+ Lö latehegö falaete gara ba nawönia kara+ börö me no tehuku ndraʼugö ba lö aboto ba dödöu.”
45 Aefa daʼö, möi Yesu ba gosali ba ibörögö ifofanö niha sogale ba daʼö.+
46 Imane khöra, ”No so ba zura, ’Omogu lafotöi omo wangandrö,’+ hizaʼi mibaliʼö omo zorabu.”+
47 Ero maʼökhö mamahaʼö Yesu ba gosali. Ira kafalo gere, sangila amakhoita hegöi sondröniaʼö niha Yahudi, laʼalui lala wamunu yaʼia.+
48 Hizaʼi, lö laʼila hadia zinangea lafalua börö me ato zi fao khö Yesu ba wamondrondrongo famahaʼönia.+
Nisura ba gahe zura
^ Mina yaʼia daʼö kefe Yunani, faʼabuania 340 g. Faʼebuania fagölö ba zi 100 drakhma. Faigi Lamp. B14.
^ Sin.: ”firö”.
^ Sin.: ”wirögu”.
