Nisura Luka 24:1-53
24 Ba ngaluo si oföna ba migu daʼö,* möi ira ba lewatö sihulö wongi sibai, ba no laʼohe wangomuhua si no lahenaigö.+
2 Hizaʼi, laʼila wa no todege gara fondruhö lewatö andrö.+
3 Me möi ira bakha, lö hadöi saʼae boto Zoʼaya Yesu.+
4 Abu dödöra. Ba zi lö mudöna-döna, so darua ndra matua samake nukha si takile sozizio ba zingara.
5 Ataʼu sibai ndra alawe andrö ba lafaköu ira. Mohede khöra ndra matua si darua andrö lamane, ”Hana wa miʼalui niha sauri ba nahia zi mate?+
6 Lö yaʼia ba daʼa, no tesusugi ia. Mitörö tödömi hadia niwaʼönia khömi me so ia ba Galilaia.
7 Tebeʼe dania Nono niha ba danga niha sebua horö, labunu ia ba döla geu. Aefa daʼö, tesusugi ia ba ngaluo si tölu.”+
8 Itörö tödöra niwaʼönia.+
9 Aefa daʼö, mofanö ira moroi ba lewatö ba lafatunö khö ndra sinenge si 11 hegöi khö ndra nifahaʼö tanö böʼö.+
10 Sanutunö khö ndra sinenge yaʼia daʼö Maria Magadala, Yohana, Maria ina Yakobo, hegöi ira alawe tanö böʼö si fao khöra.
11 Hizaʼi, lö faduhu dödö ndra sinenge hegöi ira nifahaʼö tanö böʼö ba niwaʼö ndra alawe andrö, lawaʼö wa si fawea ira.
12 Iʼanemaiʼö fagohi Wetero ba lewatö. Me ifaöndrö ia wamaigi bakha ba lewatö, ha nukha safusi zi so. Mofanö ia ba manofu-nofu dödönia ba zi no alua andrö.
13 Me luo daʼö, so darua ndra nifahaʼö Yesu si möi ba Gemaʼusa, faʼaröunia mato 11 kilometer* moroi ba Yeruzalema.
14 Lafadunö-dunö fefu zalua andrö.
15 Gasa-gasa wahuhuosara ba wamadunö-dunö daʼö fefu, iʼondrasi ira Yesu ba fao ira wofanö.
16 Hizaʼi, lö laʼila wa yaʼia andrö Yesu.+
17 Manofu ia, ”Hadia nifadunö-dunömi andrö?” Labato wofanö ba abu dödöra.
18 Samösa zotöi Kelofasi imane, ”Hadia niha si fatewu ndraʼugö wa lö öʼila fefu zalua ba Yeruzalema barö-barö daʼa?”
19 Isofu khöra, ”Hadia zalua?” Latema linia, ”Sanandrösa khö Yesu, niha Nazareta andrö.+ Yaʼia andrö samaʼeleʼö sangumaʼö ba samalua halöwö safönu faʼabölö föna Lowalangi ba föna niha sato.+
20 Ira kafalo gere hegöi samatörö yaʼaga, no lafabunuʼö ia+ ba laʼosö ba döla geu.
21 Sindruhunia, matötöna wa niha daʼö zangefaʼö iraono Gizaraʼeli.+ Aefa daʼö, no tölu ngaluo saʼae me no alua daʼö fefu.
22 Tobali dödöma ba duria nifaʼema ndra alawe andrö moroi ba gotalua ndra nifahaʼö. Me möi ira ba lewatö sihulö wongi sibai,+
23 lö lasöndra mboto Yesu ba daʼö. Latutunö wa no laʼila ndra malaʼika, sangumaʼö khöra wa no tesusugi ia.
24 So ösa moroi ba gotaluama zi möi ba lewatö,+ hizaʼi lö niʼilara boto Yesu. Itörö niwaʼö ndra alawe no mege.”
25 Imane khöra Yesu, ”Hana wa lö fangera-ngerami ba lö faduhu dödömi fefu niwaʼö ndra samaʼeleʼö?
26 Lö tola löʼö itaögö wamakao simane daʼö+ Keriso enaʼö tefolakhömi ia.”+
27 Aefa daʼö, ifatunö fefu zalua khönia si no tesura ba Mbuku Niʼamoniʼö, iʼotarai nisura Moze hegöi Nisura Ndra Samaʼeleʼö.+
28 Me arakhagö larugi ba mbanua si möi ira, hulö na edöna idölö fofanö.
29 Hizaʼi laforege khönia, ”Fao khöma, börö me no arakhagö bongi ba lö ara tö ogömi.” Ba fao ia khöra.
30 Me fao ira wemanga, ihalö roti, mangandrö ia,* iboboto ba ibeʼe khöra.+
31 Ba ginötö daʼö, iʼanemaiʼö aboto ba dödöra ba laʼila wa Yesu zi fao khöra. Hizaʼi, izumaigö taya ia föna duduma höröra.+
32 Faoma lamane khö nawöra, ”Andrö tefaudu sibai ba dödöda me fahuhuo ia khöda ba lala, me itutunö nösi Mbuku Niʼamoniʼö!”
33 Aefa daʼö mangawuli ira ba Yeruzalema. Ba daʼö, falukha ira khö ndra sinenge si 11 hegöi ira nifahaʼö tanö böʼö
34 sangumaʼö, ”Sindruhu wa no tesusugi ia ba no iforomaʼö ia khö Zimoni!”+
35 Aefa daʼö lafatunö hadia zalua me so ira ba lala hegöi me awena laʼila haniha ia sindruhunia me iboboto roti.+
36 Gasa-gasa wamatunö-tunöra daʼö, iʼanemaiʼö tohare Yesu ba gotaluara ba imane, ”Yaʼohahau dödömi!”+
37 Hizaʼi, tokea ira ba ataʼu, lawalinga malaʼika.*
38 Andrö imane khöra, ”Hana wa ataʼu ami? Hana wa aombö dödömi?
39 Yaʼodo daʼa. Mifaigi dangagu ba ahegu. Mibabaya ndraʼo ba minehegö. Lö motöla ba lö monagole mboto eheha. Hizaʼi, so khögu daʼö simane niʼilami.”
40 Iwaʼö daʼö ba iforomaʼö danga hegöi ahenia.
41 Hewaʼae simanö, omuso dödöra ba ahöli-höli dödöra irege lö lafaduhusi tödö. Aefa daʼö imane, ”Hadia so göda khömi?”
42 Labeʼe khönia sara giʼa nifaga,
43 ihalö, aefa daʼö iʼa.
44 Lö ara imane khöra, ”Me fao nasa ndraʼo khömi, no irai uwaʼö+ wa hasambalö alua fefu zi no tesura sanandrösa khögu ba Goroisa Moze, Nisura Ndra Samaʼeleʼö, hegöi ba Zinunö.”+
45 Itolo ira enaʼö aboto ba dödöra fefu geluaha niwaʼö ba Mbuku Niʼamoniʼö.+
46 Itohugö wangumaʼö, ”So ba zura wa hasambalö tefakao Keriso, mate, ba tesusugi ba ngaluo si tölu.+
47 Börö döinia, teturiaigö ba ngawalö soi+ duria famalalini era-era ba wangefaʼö horö,+ tebörögö moroi ba Yeruzalema.+
48 Lö tola löʼö mifaduhuʼö daʼö fefu.+
49 Ufatenge khömi zi no ifabuʼu Amagu. Hizaʼi, miʼiagö mbanua andre irege mitema waʼabölö moroi ba zorugo.”+
50 Aefa daʼö, iʼohe ira baero irugi Mbetania. Ifazawa dangania ba ifahowuʼö ira.
51 Me no aefa ifahowuʼö ira, manahae ia ba zorugo, iröi ira.+
52 Aefa daʼö, latuhi danö fönania ba mangawuli ira ba Yeruzalema si fao faʼomuso dödö.+
53 Ero maʼökhö so ira ba gosali ba wanuno Lowalangi.+
