Nisura Luka 6:1-49
-
Yesu, ”Soʼaya luo Sabato” (1-5)
-
Tefadöhö ndra matua si mate dambai tanga (6-11)
-
Sinenge si 12 (12-16)
-
Mamahaʼö Yesu ba mamadöhö fökhö (17-19)
-
Faʼomuso dödö ba faʼalai (20-26)
-
Fangomasiʼö udu (27-36)
-
Böi huku nawöu niha (37-42)
-
Oroma moroi ba mbuania (43-45)
-
Omo nihaogö famazökhi; omo si lö fondrasi (46-49)
6 Samuza inötö me luo Sabato, itörö Yesu nowi gandru, ba lateteu gandru göi ira nifahaʼö,+ latandraölö tangara ba laʼa.+
2 So ösa Warizaiʼo sangumaʼö, ”Hana wa misawö goroisa ba luo Sabato?”+
3 Imane khöra Yesu, ”Hadia lö nibasomi nifalua Dawido me olofo ia hegöi ono buania?+
4 Möi ia bakha ba nomo Lowalangi itema roti nibaliʼö sumange. Aefa daʼö, iʼa ba ibeʼe göi ba nono buania. Sindruhunia, ha ere zi tola manga daʼö.”+
5 Itohugö wangumaʼö Yesu, ”Ono niha andrö Soʼaya luo Sabato.”+
6 Ba luo Sabato tanö böʼö,+ möi ia bakha ba nahia waʼowulo, ibörögö mamahaʼö. So niha ba daʼö, no mate dambai dangania kambölö.+
7 Börö daʼö, lahaogö lafaigi-faigi Yesu ira Farizaiʼo hegöi sangila amakhoita, hadia ifadöhö niha sofökhö andrö ba luo Sabato, enaʼö tola laböbögö khönia zi lö duhu.
8 Hizaʼi, aboto ba dödö Yesu zi so ba gera-erara.+ Imane ba niha si no mate tambai tanga andrö, ”Ozizio, agö ba gotaluama.” Maoso niha andrö ba mozizio ia.
9 Imane khöra Yesu, ”So zinofugu, hadia zi tola lafalua ba luo Sabato: Mamalua si sökhi mazui si lö sökhi, mangorifi mazui mamunu?”+
10 Ifaigi ira Yesu, ba imane ba niha andrö, ”Oroʼö dangamö.” Iʼoroʼö dangania niha andrö ba döhö.
11 Hizaʼi mofönu sibai ira, ba lalau mamagölö hadia nifaluara khö Yesu.
12 Samuza maʼökhö, möi mangandrö Yesu ba hili.+ Mangandrö ia khö Lowalangi sara wongi waʼara.+
13 Me no moluo, ikaoni ndra nifahaʼönia ba ifili zi 12 niha ba gotaluara. Ifotöi ira göi sinenge:+
14 Simoni nifotöinia Fetero, Andrea talifusönia, Yakobo, Yohane, Filifo,+ Batolomaiʼo,
15 Mataiʼo, Toma,+ Yakobo ono Galifaiʼo, Simoni nifotöi ”niha si terou tödö”,
16 Yuda ono Yakobo, ba Yuda Kariota si manga mböli.
17 Möi ira mitou fao ndra nifahaʼönia ba mosindro ira ba nahia saloʼo. Ato ndra nifahaʼönia ba daʼö, ba ato göi danö böʼö si tohare moroi ba Yudea, Yeruzalema, moroi ba zinga nasi Diro hegöi Sidona. Möi ira lafondrondrongo niwaʼö Yesu ba enaʼö ifadöhö wökhöra.
18 Niha nifakao malaʼika si lö sökhi manö ifadöhö.
19 Laforege enaʼö tola lababaya ia börö me so waʼabölö saheta khönia+ ba wamadöhö yaʼira fefu.
20 Ifaigi ndra nifahaʼönia ba imane khöra:
”Yaʼahowu ami niha si numana, börö me khömi Wamatörö Lowalangi.+
21 ”Yaʼahowu ami solofo iadaʼa, börö me teʼabusoiʼö ami dania.+
”Yaʼahowu ami sege-ege iadaʼa, börö me yaʼami zaʼiki dania.+
22 ”Yaʼahowu ami na fatiu dödö niha khömi,+ na laʼerogö ami,+ laʼoʼaya ami, ba laʼobousi döimi börö Nono niha.
23 Simane daʼö göi nifalua ndra tuara mböröta khö ndra samaʼeleʼö. Ba luo daʼö, miʼomusoiʼö dödömi ba miʼanaoka ba waʼomuso dödö börö me ebua luomi ba zorugo.+
24 ”Hizaʼi, alai ami niha si kayo,+ börö me no afönu mitema wondrara dödö.+
25 ”Alai ami sabuso iadaʼa, börö me olofo ami dania.
”Alai ami saʼiki iadaʼa, börö me sabu tödö ba sege-ege ami dania.+
26 ”Alai ami na lasuno-suno ami fefu niha,+ börö me simane daʼö göi ndra tuara me föna, lasuno-suno zamaʼeleʼö sofaya.
27 ”Hizaʼi, uwaʼö khömi yaʼami samondrongo: Böi tebulö miʼomasiʼö zi faʼudu khömi, mifalua zi sökhi ba niha si fatiu tödö khömi,+
28 miʼandrö howu-howu ba niha sangelifi yaʼami, ba miʼangandrö ba niha sangoʼaya yaʼami.+
29 Na so zanafari boʼöu si tambai, beʼe göi khönia zi tambai. Ba na so zangai barumö tanö baero, beʼe göi khönia mbarumö tanö böʼö si no öfake.+
30 Na so zangandrö khöu hadia ia, beʼe manö.+ Ba na so zangai gama-gamamö, böi fuli halö khönia.
31 ”Aefa daʼö, hadia zomasi ami lafalua khömi niha böʼö, daʼö göi mifalua khöra.+
32 ”Na miʼomasiʼö niha sangomasiʼö yaʼami, hadia sinangea lasuno ami? Niha sebua horö göi laʼomasiʼö niha sangomasiʼö yaʼira.+
33 Mazui, na mifalua zi sökhi ba niha samalua si sökhi khömi, hadia sinangea lasuno ami? Niha sebua horö lafalua göi zimane daʼö.
34 Simanö göi, na mifafizaʼö gefe* ba niha si faduhu dödömi wa ibuʼa mangawuli, hadia sinangea lasuno ami?+ Niha sebua horö göi lafafizaʼö gefera ba niha sebua horö enaʼö lafuli latema zimane daʼö faʼebua.
35 Hizaʼi, böi tebulö miʼomasiʼö zi faʼudu khömi, mifalua zi sökhi, ba mibeʼe nifiza böi mitötöna zulö.+ Ebua dania mitema luomi, ba tobali ami ono Wondrege Zalawa, börö me si sökhi tödö ia ba niha si lö sökhi hegöi ba niha si lö mangila mangandrö saohagölö.+
36 Böi tebulö miforomaʼö waʼahakhö dödö, simane Amami sahakhö tödö.+
37 ”Baero daʼö, böi mihuku nawömi, ba lö göi dania lahuku ami.+ Böi mifetaʼu nawömi, ba lö göi dania lafetaʼu ami. Böi tebulö miʼefaʼö zala niha, ba laʼefaʼö göi zalami.+
38 Böi tebulö mibeʼe ba niha, ba labeʼe göi khömi.+ Labeʼe dania khömi sambua fanuʼa safönu ba kandre-kandremi, nifasösö, nifadögö ba fahöna. Börö me suʼa-suʼa niʼanuʼaʼömi ba laʼanuʼaʼö göi khömi dania.”
39 Aefa daʼö ibeʼe khöra gamaedola daʼa: ”Hadia tola iʼohe danga nawönia sauʼa awönia sauʼa? Hadia lö aekhu ira ba goho-koho?+
40 Lö töra nifahaʼö moroi khö zamahaʼö yaʼia. Hizaʼi, dozi si no moʼahonoa mufahaʼö, tobali ia dania simane samahaʼö yaʼia.
41 Hana wa öfaigi golowingö ba hörö dalifusöu, ba lö öʼila mboto geu si so bakha ba höröu?+
42 Ba hewisa wa öwaʼö khö dalifusöu, ’Daʼuheta golowingö andrö ba höröu,’ ba hiza sa lö öʼila mboto geu bakha ba höröu? Niha samini tödö! Ofönaiʼö ua heta mboto geu ba höröu, awena dania anehe ndraʼugö ba wangeheta olowingö ba hörö dalifusöu.
43 ”Eu si sökhi lö iʼowua mbua si lö sökhi, ba eu si lö sökhi tebai iʼowua mbua si sökhi.+
44 Ba daʼö oroma geu si sökhi, moroi ba mbuania.+ Duma-dumania, lö sangowuloi bua ara moroi ba zinanö sodoi mazui saneteu bua nagu ba ndruʼu sodoi.
45 Niha si sökhi ifaehagö zi sökhi si so ba dödönia, hizaʼi niha si lö sökhi ifaehagö zi lö sökhi si so ba dödönia. Hadia zi no fahöna ba dödö, daʼö zalua ba mbewe.+
46 ”Hana wa mikaoni ndraʼodo ’he Soʼaya! he Soʼaya!’ hizaʼi lö mifalua niwaʼögu?+
47 Niha sangondrasi yaʼo, samondrongo ba samalua fehedegu, ufatunö khömi haʼökhö fakhili-khili ia:+
48 Hulö niha samazökhi omonia, ikhao wondrasi sabakha ba ifasa ba dete gara. Na tohare molö, tebai idudugö nomo andrö börö me aro wamazökhi yaʼia.+
49 Hizaʼi, haniha zamondrongo ba na lö ifalua,+ yaʼia andrö hulö nomo nifazökhi ba dete danö si lö fondrasi. Na tohare molö, iʼanemaiʼö asoʼa ba abölö-bölö waʼadudunia.”
Nisura ba gahe zura
^ Eluahania tenga kefe soʼono.
