Nisura Luka 9:1-62
-
Fanuturu lala khö ndra sinenge si 12 ba wanuriaigö (1-6)
-
Alangu dödö Herode börö Yesu (7-9)
-
Ibeʼe gö niha si 5.000 (10-17)
-
Ifaduhuʼö Fetero wa Yesu andrö Keriso (18-20)
-
Tefaʼeleʼö waʼamate Yesu (21, 22)
-
Tobali nifahaʼö sindruhu (23-27)
-
Faböʼö zikhala Yesu (28-36)
-
Tefadöhö nono matua nifakao malaʼika si lö sökhi (37-43a)
-
Tefaʼeleʼö zui waʼamate Yesu (43b-45)
-
Fabuʼa-buʼa ndra nifahaʼö ba wamadöni dadaoma (46-48)
-
Niha si lö molawa yaʼita, si fao khöda daʼö (49, 50)
-
Lö latema Yesu ba mbanua Zamaria (51-56)
-
Lala ba woloʼö Yesu (57-62)
9 Aefa daʼö, ikaoni zinengenia si 12 Yesu, ibeʼe khöra waʼabölö ba itehegö khöra wamofanö malaʼika si lö sökhi+ hegöi ba wamadöhö fökhö.+
2 Ifatenge ira ba wanuriaigö Famatörö Lowalangi hegöi ba wamadöhö fökhö.
3 Iwaʼö khöra, ”Böi miʼohe hadia ia, simane siʼo, naha gö, roti, kefe* mazui famohanimi.*+
4 Na möi ami ba zi sambua banua, miʼiagö nomo zi samösa niha irege mofanö ami moroi ba daʼö.+
5 Na so zi lö manemaʼö mazui si lö mamondrongo nifaʼemami, miʼanotogö gawu-gawu ba gahemi na mofanö ami moroi ba daʼö. Yatobali famangelama khöra daʼö.”+
6 Aefa daʼö, mofanö ira numalö ba mbanua misa ba wanuriaigö turia somuso dödö ba lafadöhö niha sofökhö.+
7 Me irongo Herode* samatörö banua Galilaia fefu zalua, abu dödönia börö me so zangumaʼö wa no ifuli tesusugi Yohane moroi ba gotalua zi mate.+
8 So göi zangumaʼö, no tohare Gelia. Tanö böʼö lamane, no tesusugi samösa zamaʼeleʼö me föna.+
9 Imane Herode, ”No utaba mbagi Yohane.+ Tobali, haniha ia andrö? Oya sibai nirongogu sanandrösa khönia.” Andrö wa iʼalui lala Herode enaʼö falukha ira.+
10 Me mangawuli ndra sinenge, latutunö khö Yesu fefu zi no lafalua.+ Aefa daʼö, mofanö ia ba mbanua sotöi Betisaida, fao ndra nifahaʼönia.+
11 Hizaʼi, ato niha sangila ba laʼoʼö ia. Itemaʼö ira Yesu, ibörögö ifahaʼö ira sanandrösa ba Wamatörö Lowalangi ba ifadöhö zofökhö.+
12 Me no arakhagö aekhu luo, lamane khönia ira sinengenia si 12, ”Waʼö khö ndra niha daʼa enaʼö mofanö ira ba mbanua sahatö ba laʼalui göra hegöi nahiara wemörö, börö me aröu sibai nahia si so yaʼita andre.”+
13 Hizaʼi imane khöra, ”Yaʼami manö zameʼe göra.”+ Latema linia, ”Lö hadöi khöma ö ba daʼa baero zi lima ngawua roti ba dua rozi giʼa. Awena sa daʼö, möiga maʼöli ua sakali.”
14 So mato 5.000 niha ndra matua. Hizaʼi imane khö ndra nifahaʼönia, ”Miwaʼö khöra enaʼö modadao ira, mato 50 niha ero sambua nahia.
15 Laʼoʼö niwaʼö Yesu ba modadao niha sato andrö.
16 Aefa daʼö, ihalö roti si lima ngawua awö giʼa si dua rozi, ifaöga hörönia, ilau mangandrö.* Iboboto roti andrö, ibeʼe khö ndra nifahaʼönia enaʼö ladozigö niha sato.
17 Manga ira fefu irege abuso, ba laʼozaragö zi töra, so 12 raga-raga sagafönu.+
18 Aefa daʼö, me ilau mangandrö ha yaʼia, lafalukhaisi ia ira nifahaʼönia. Isofu khöra, ”Fangumaʼö niha, haniha ndraʼodo andre?”+
19 Lamane khönia, ”Yohane Samayagö Idanö, so göi zangumaʼö Elia, tanö böʼö lamane, samösa moroi ba gotalua zamaʼeleʼö me föna si no tesusugi.”+
20 Aefa daʼö imane khöra, ”Na moloʼö yaʼami, haniha ndraʼodo andre?” Itema linia Fetero, ”Keriso ndraʼugö, nifatenge Lowalangi.”+
21 Aefa daʼö, iʼabeʼeʼö wehedenia enaʼö lö laʼombakhaʼö haniha ia.+
22 Imane nasa khöra, ”Lö tola löʼö itörö wamakao Ono niha. Latimbagö ia ira sondröniaʼö, kafalo gere hegöi ira sangila amakhoita, ba labunu ia.+ Aefa daʼö, tesusugi ia ba ngaluo si tölu.”+
23 Itohugö wangumaʼö khöra, ”Na so zomasi moloʼö yaʼo, yamuʼositengagö ia,*+ yamuluʼi döla geu famakao* andrö ero maʼökhö ba yamuʼoʼö ndraʼo.+
24 Haniha zangalui faʼanau nosonia, hasambalö mate. Hizaʼi, haniha zi mate börö ndraʼo, ifuli teʼorifi.+
25 Sindruhunia, hadia guna ba niha na iʼokhögö fefu nösi gulidanö andre, ba teʼala nosonia mazui itörö waʼatekiko?+
26 Haniha zaila börö ndraʼo hegöi ba wehedegu, aila göi Nono niha andrö khönia na tohare ia ba lakhöminia, lakhömi Namania hegöi ba lakhömi ndra malaʼika niʼamoniʼö.+
27 Sindruhu niwaʼögu khömi, so ösa zi lö mate moroi ba gotalua zosindro ba daʼa irege laʼila waʼatohare Wamatörö Lowalangi.”+
28 Mato walu hari me no aefa iwaʼö daʼö, iʼohe Wetero, Yohane, Yakobo ba hili weʼamöi mangandrö.+
29 Gasa-gasa wangandrönia, faböʼö zikhalania ba takile waʼafusi nukhania.
30 Ba zi lö mudöna-döna, so darua zi fahuhuo khönia, yaʼia daʼö Moze ba Elia.
31 Tohare ira si fao lakhömi ba labörögö fahuhuo sanandrösa ba wofanö Yesu, si lö ara tö alua ba Yeruzalema.+
32 Me luo daʼö, no mörö Wetero hegöi ira awönia. Hizaʼi me maoso ira, laʼila lakhömi Yesu ba darua niha sozizio ba zingania.+
33 Me edöna mofanö niha si darua andrö, imane Fetero khö Yesu, ”He Samahaʼö, sökhi sibai khöda nahia daʼa. Tehegö khöma wamazökhi tölu ngawua nose: sambua khöu, sambua khö Moze, ba sambua khö Gelia.” Hizaʼi, lö aboto ba dödö Wetero hadia niwaʼönia.
34 Me fahuhuo nasa Wetero, tohare lawuo, ilumöʼö ira ba oi so waʼataʼura.
35 Terongo li+ moroi ba lawuo andrö imane, ”Onogu daʼa, nifiligu.+ Mifondrondrongo niwaʼönia.”+
36 Me terongo li daʼö, hatö samösa Yesu ba wamaigira. Ara maʼifu, lö manö hede-hedera ba lö ladunö-dunö ba niha hadia niʼilara.+
37 Mahemolunia me mangawuli ira moroi ba hili, ato niha zamalukhaisi Yesu.+
38 Aefa daʼö, so samösa ndra matua siʼao ba gotalua niha sato imane, ”He Samahaʼö, uʼandrö khöu, tolo* nonogu, onogu si ha sambu-sambua.+
39 No fatewu ba mbotonia malaʼika si lö sökhi. Moʼao ia ba zi lö mudöna-döna, agakandro ba fawukhö gilo ba mbawa. Ifakao ia malaʼika si lö sökhi andrö ba lö iröi ia.
40 No uʼandrö tolo khö ndra nifahaʼöu enaʼö lafofanö malaʼika si lö sökhi andrö, hizaʼi tebai lafofanö.”
41 Itema linia Yesu, ”Yaʼami ngaʼötö si lö mamati ba si lö sökhi,+ hawaʼara nasa toröi ndraʼo ba ubologö dödögu khömi? Ohe nonomö ba daʼa.”+
42 Hizaʼi, me ihatöʼö ia ono matua daʼö, ilobigö ia tou ba danö malaʼika si lö sökhi andrö ba agakandro ibeʼe. Ihahagö malaʼika si lö sökhi daʼö Yesu ba ifadöhö nono andrö. Aefa daʼö, ifangawuli khö namania.
43 Ahöli-höli dödöra me laʼila waʼabölö Lowalangi.
Gasa-gasa waʼahöli-höli dödöra ba nifalua Yesu, imane khö ndra nifahaʼönia,
44 ”Mihaogö wamondrondrongo ba mitöngöni wehedegu andre, so dania zi manga mböli Nono niha.”+
45 Hizaʼi lö aboto ba dödöra wehede Yesu. Sindruhunia, no tobini khöra geluaha daʼö enaʼö lö aboto ba dödöra. Ataʼu ira wanofu khö Yesu geluaha wehedenia andrö.
46 Aefa daʼö, alua waʼudusa ba gotalua ndra nifahaʼönia, lafadöni haniha zabölö ebua ba gotaluara.+
47 Aboto ba dödö Yesu zi so ba gera-erara. Andrö ikaoni samösa nono side-ide, iʼohe ba zingania.
48 Imane khöra, ”Na so zanemaʼö ono side-ide andre börö döigu, ba no itemaʼö göi ndraʼo. Ba haniha zanemaʼö yaʼo, no itema göi zamatenge yaʼo.+ Niha sangide-ngideʼö yaʼia ba gotaluami, daʼö zabölö ebua.”+
49 Imane Yohane, ”He Samahaʼö, so samösa niʼilama zamofanö malaʼika si lö sökhi ba döimö, ba no mawaʼö khönia enaʼö böi ifalua daʼö börö me tenga khöda fao ia.”+
50 Hizaʼi, imane Yesu, ”Böi mitaha ia. Niha si lö molawa yaʼita, si fao khöda daʼö.”
51 Me itugu ahatö ginötö wangawuli Yesu ba zorugo,+ ihalö gangetula weʼamöi ba Yeruzalema.
52 Börö daʼö, ifatenge denge-tengenia enaʼö ladari-dari. Mofanö ira numalö ba mbanua Zamaria ba wamaʼanö fefu hadia ia.
53 Hizaʼi, lö latemaʼö Yesu ba mbanua daʼö,+ börö me ihalö gangetula weʼamöi ba Yeruzalema.
54 Me laʼila zalua andrö ira nifahaʼönia sotöi Yakobo ba Yohane,+ lamane khö Yesu, ”He Soʼaya, hadia omasiʼö na maʼandrö galitö moroi ba mbanua si yawa enaʼö mate ira?”+
55 Hizaʼi, ifaigi ira Yesu ba mofönu ia khöra.
56 Mofanö Yesu hegöi ira nifahaʼönia ba mbanua böʼö.
57 Ba dalu lala, so niha si hede khönia imane, ”He Samahaʼö, uʼoʼö ndraʼugö gofu hezo möiʼö.”
58 Imane khönia Yesu, ”So dögi narö hili ba nasu gatua,* ba so gazuni ba wofo, hizaʼi Ono niha andrö lö hadöi nahania wemörö.”+
59 Aefa daʼö, imane ba danö böʼö, ”Oʼö ndraʼo.” Imane niha daʼö, ”He Soʼaya, tehegö khögu ua damöido ukoʼo namagu.”+
60 Imane khönia Yesu, ”Akha lakoʼo zi mate+ awönia si mate, hizaʼi ae turiaigö Wamatörö Lowalangi gofu hezo so.”+
61 So göi danö böʼö zangumaʼö, ”Omasido uʼoʼö ndraʼugö Soʼaya, hizaʼi tehegö khögu ua weʼamöi mangona ba nösi nomogu.”
62 Imane khönia Yesu, ”Na so niha samaku laza ba ifakhölö-khölö ia furi,+ tenga sinangea möi ia ba Wamatörö Lowalangi.”+
Nisura ba gahe zura
^ Sin.: ”firö”.
^ Sin.: ”dua ngaʼörö mbaru”.
^ Eluahania daʼa Herode Atifasi. Faigi Geluaha Ngawua Wehede.
^ Sin.: ”ifahowuʼö”.
^ Mazui ”yaʼilawa gisö-isö dödönia”.
^ Faigi Geluaha Ngawua Wehede.
^ Sin.: ”faigi”.
^ Hulö nasu. Adogo-dogo gahe, ebolo dalinga, ba onekhe.
