Maleakhi 1:1-14
1 Angombakhata moroi khö Lowalangi:
Daʼa daromali Yehowa ba ndraono Gizaraʼeli nifaʼemania khö Maleakhi:*
2 ”No uforomaʼö khömi waʼomasi,”+ iwaʼö Yehowa.
Hizaʼi mimane, ”Hewisa wangoromaʼöu faʼomasi?”
Imane Yehowa, ”Hadia tenga gaʼa Yakobo Gezau?+ Hizaʼi, uʼomasiʼö Yakobo,
3 ba fatuwu ndraʼo khö Gezau.+ Ubaliʼö tanö si lö niha-niha hili andrö khönia,+ ba ubaliʼö tanö si mate danö ondröita khönia, nahia nasu gatua.”+
4 ”Imane Edomo,* ’Hewaʼae no adudu ndraʼaga, mafuli dania mafazökhi nahia si no adudu andrö.’ Hizaʼi imane Yehowa samatörö saradadu zorugo, ’Lafazökhi domosa, hizaʼi ufuli ududugö. Tefotöi mbanuara ”banua si lö sökhi”, ba soira ”soi niʼelifi Yehowa sagötö faʼara”.+
5 Miʼila samösa dania hadia zalua. Ba mimane, ”Yatefolakhömi Yehowa ba mbanua Gizaraʼeli.”’”
6 ”Ifosumange namania ono,+ ba ifosumange zokhö yaʼia sawuyu. Na ama ndraʼodo,+ ba hana wa lö mifosumange ndraʼo?+ Na yaʼodo andre samösa sokhö, ba hana wa lö miʼataʼufi* ndraʼo?’ iwaʼö Yehowa samatörö saradadu zorugo khömi, yaʼami ere andrö sangoʼaya töigu.+
”’Hizaʼi manofu ami, ”Hewisa wangoʼayama töimö?”’
7 ”’Mibeʼe gö* si no raʼiö tobali sumange ba naha wanunu sumange khögu.’
”’Aefa daʼö manofu ami, ”Hewisa wanaʼunöisima yaʼugö?”’
”’Me mimane, ”Raʼiö meza Yehowa*+ andrö.”
8 Ba me mibeʼe gurifö sauʼa tobali sumange, mimane, ”Lö fasala daʼa.” Ba me mibeʼe gurifö sakela-kela mazui sofökhö tobali sumange, mimane, ”Lö fasala daʼa.”’”+
”Tandraigö miʼohe daʼö khö gubernur. Hadia omuso dödönia mazui itemaʼö ami si fao faʼasökhi dödö?” iwaʼö Yehowa samatörö saradadu zorugo.
9 ”Iadaʼa, miʼandrö waʼahakhö dödö Lowalangi enaʼö iforomaʼö waʼomasinia khömi. Na simane daʼö zumange niʼohemi, hewisa wa tola iʼomasiʼö ami?” iwaʼö Yehowa samatörö saradadu zorugo.
10 ”Hadia so ba gotaluami zomasi mondruhö bawandruhö gosali?+ Famewuaʼö alitö manö ba naha wanunu sumange khögu, lö omasi ami na lö mugazi.+ Lö omasido khömi ba lö omuso dödögu zumange si otarai dangami,”+ iwaʼö Yehowa samatörö saradadu zorugo.
11 ”Lafosumange döigu misa ba ngawalö soi, iʼotarai gatumbukha luo irugi gaekhula.+ Dozi niha oi zara latunu zumange misa enaʼö numalö miyawa zimbo ba labeʼe zumange si sökhi ba döigu, börö me dozi soi dania zamosumange töigu,”+ iwaʼö Yehowa samatörö saradadu zorugo.
12 ”Hizaʼi mitaʼunöisi ia*+ ba mimane, ’Raʼiö meza Yehowa andrö, simanö göi zumange niʼa si so yawa ba detenia, sanuzu dödöda.’+
13 Mimane, ’Abua sibai daʼa!’ Ba miʼaohasi ba dödö ia,” iwaʼö Yehowa samatörö saradadu zorugo. ”Miʼohe gurifö nitagö, sakela-kela ba sofökhö. Miʼohe daʼö tobali sumange! Hadia sinangea utema daʼö?”+ iwaʼö Yehowa.
14 ”Teʼelifi niha sangogunaʼö faʼonekhe ba wameʼe sumange sofökhö khö Yehowa ba ginötö ilau fawuʼu li, hewaʼae sindruhunia so khönia mbiri-biri si lö fökhö ba gandra. Börö me yaʼo Razo solakhömi,+ ba lafosumange döigu ba ngawalö soi,”+ iwaʼö Yehowa samatörö saradadu zorugo.”
Nisura ba gahe zura
^ Eluahania ”Tenge-tenge”.
^ Töi böʼö khö Gezau.
^ Mazui ”mifosumange”.
^ Eluahania naha wanunu sumange khö Yehowa.
^ Sin.: ”roti”.
^ Mazui te ”mitaʼunöisi ndraʼo”.
