Maleakhi 3:1-18
3 ”Ufadari-dariʼö zinengegu ba wangehenaigö* lala khögu.+ Ba zi lö midöna-döna, tohare Lowalangi sindruhu niʼalu-aluimi ba gosalinia.+ Tohare göi denge-tenge mbuʼusa li andrö nidöna-dönami. Hasambalö tohare ia,” iwaʼö Yehowa samatörö saradadu zorugo.
2 ”Hizaʼi, haniha zi no mamaʼanö yaʼia ba luo waʼatoharenia, ba haniha zi lö tebulö mozizio ba weʼasonia? Börö me tobali ia dania simane alitö sangehao loga ba simane sabu*+ ba wanasai nukha.
3 Modadao ia simane niha sanunu ba sangehao firö.+ Iʼehao ndraono Lewi, hulö fangehao anaʼa ba firö. Tobali ira dania ono mbanua si sökhi sameʼe sumange khö Yehowa.
4 Möi fangomuso dödö Yehowa zumange moroi ba Yehuda awö ba Yeruzalema simane me mböröta.+
5 ”Tohare ndraʼo ba wanguhuku yaʼami. Uʼanemaiʼö uhuku niha si fakelemu,+ sohorö-horö, si fahölu ba waya,+ solimo niha nigazi,+ solimo lakha mbanua ba si lö ama*+ ba si lö manolo niha si fatewu.+ Lö laʼataʼufi ndraʼo,” iwaʼö Yehowa samatörö saradadu zorugo.
6 ”Yaʼo Yehowa; lö irai tebulö* ndraʼo.+ Yaʼami andrö ngaʼötö Yakobo. Daʼö mbörö wa lö tehori ami.
7 Iʼotarai ba götö ndra tuami, no miʼerogö gamakhoitagu ba lö mifalua ia.+ Mifuli ami khögu, ba mangawuli dania ndraʼo khömi,”+ iwaʼö Yehowa samatörö saradadu zorugo.
Hizaʼi manofu ami, ”Hewisa wa tola mangawuli ndraʼaga khöu?”
8 ”Hadia so niha soʼanagöi Lowalangi? Hizaʼi, miʼanagöi ndraʼo.”
Ba manofu ami, ”Hewisa lalama woʼanagöi yaʼugö?”
”Lö mibeʼe zi sambua niʼofulu hegöi tolo-tolo.
9 Sindruhu-ndruhu wa niʼelifi ami börö me miʼanagöi ndraʼo. Fefu niha ba soimi, lafalua daʼö.
10 Miʼohe zi sambua niʼofulu andrö ba gosali,*+ enaʼö so gö ba nomogu.+ Mitandraigö ndraʼo, ba mifaigi atö hadia lö ubokai khömi mbaʼa-baʼa nidanö ba mbanua si yawa+ ba ufaduwa khömi howu-howu irege lö saʼae moʼamböta ami,” iwaʼö Yehowa samatörö saradadu zorugo.+
11 ”Utaboi fefu hama ba lö saʼae lafakiko mbua zinanömi, ba hasambalö mowua kabu nagu khömi,”+ iwaʼö Yehowa samatörö saradadu zorugo.
12 ”Fefu soi hasambalö lawaʼö wa ohahau dödömi,+ börö me tobali soi sowua-wua tödö soimi andrö,” iwaʼö Yehowa samatörö saradadu zorugo.
13 ”Sindruhu-ndruhu wa abeʼe sibai wehedemi khögu,” iwaʼö Yehowa.
Aefa daʼö manofu ami, ”Hadia zi no mawaʼö sanandrösa khöu?”+
14 ”Mimane, ’Zaya-zaya gölö wamosumange Lowalangi.+ Lö hadöi gunania na tafalua zi tobali foʼömöda khö Yehowa samatörö saradadu zorugo mazui taforomaʼö wa maniasa ita ba horö si no tafalua.
15 Moloʼö yaʼaga, niha sasiliyawa zomuso tödö, ba niha si lö sökhi zofozu.+ Barani ira wanandraigö Lowalangi ba lö hadia ia khöra.’”
16 Ba luo daʼö, faoma fahuhuo niha sangataʼufi Yehowa khö nawöra zamösana. Lö tebulö inehegö ba ifondrondrongo ira Yehowa. Aefa daʼö, musura fönania mbuku famasugi ba dödö,+ yaʼia daʼö buku sanandrösa ba döi niha sangataʼufi Yehowa ba soʼangerönusi* töinia.+
17 Imane Yehowa samatörö saradadu zorugo, ”Tobali ono mbanuagu dania ira.+ Ba luo daʼö, ubaliʼö ira okhötagu si tohude.*+ Uhakhösi tödö ira simane ama sohakhösi tödö ononia börö me so khönia woloʼö.+
18 Miʼila dania gamaehuta niha si sökhi ba si lö sökhi,+ niha samosumange Lowalangi ba si löʼö.”
Nisura ba gahe zura
^ Mazui ”wangehaogö”.
^ Mazui ”asio alkali”.
^ Mazui ”si lö ama si lö ina”.
^ Mazui ”lö si tebulö”.
^ Sin.: ”ba naha wangiröʼö”.
^ Mazui te ”samosumange”.
^ Mazui ”ono mbanua niʼomasiʼögu”.
