Nisura Mareko 1:1-45
-
Fanuriaigö Yohane Samayagö Idanö (1-8)
-
Tebayagö idanö Yesu (9-11)
-
Itandraigö Yesu Satana (12, 13)
-
Ibörögö manuriaigö Yesu ba Galilaia (14, 15)
-
Ikaoni ndra nifahaʼönia siföföna (16-20)
-
Tefofanö malaʼika si lö sökhi (21-28)
-
Ato niha nifadöhö Yesu ba Gafanauma (29-34)
-
Mangandrö ba nahia si lö niha-niha (35-39)
-
Tefadöhö zobou auri (40-45)
1 Simane daʼa wamobörö duria somuso dödö sanandrösa khö Yesu Keriso, Ono Lowalangi:
2 Simane nisura Yesaya samaʼeleʼö, ”(Hiza! Ufadari-dariʼö fönau zinengegu sangehenaigö lala khöu.)+
3 So samösa ziʼao ba danö si mate, ’Mihenaigö lala khö Yehowa!* Mihaogö lala sadölö khönia.’”+
4 Ba danö si mate so Yohane Samayagö Idanö. Ituriaigö wa moguna tebayagö idanö niha, si tobali tandra wa no lafalalini gera-erara enaʼö teʼefaʼö horöra.+
5 Börö daʼö, laʼondrasi ia niha moroi ba Yeruzalema hegöi Yudea maʼasagörö. Ibayagö ira idanö* ba Nungo Nidanö Yoridano ba oi zara lafatunö horö nifaluara föna niha sato.+
6 No mobaru bulu gondra Yohane, ba böbö löwinia moroi ba guli gurifö.+ Tamo gönia ba wewani gatua.+
7 Manuriaigö ia, ”So zi tohare aefa ndraʼo, sabölö ebua kuaso moroi khögu. Ba tenga sinangea ufaöndrö ndraʼo wangeheta tali sandralania.+
8 Ubayagö ami faoma idanö, hizaʼi si tohare aefa ndraʼo ibayagö ami faoma eheha niʼamoniʼö.”+
9 Me luo daʼö, tohare Yesu moroi ba Nazareta, banua Galilaia. Ibayagö ia idanö Yohane ba Nungo Nidanö Yoridano.+
10 Me no kalua ia moroi ba nidanö, iʼila teboka mbanua si yawa, möi khönia geheha Lowalangi si hulö marafadi.+
11 Ba terongo li moroi ba mbanua si yawa imane, ”Onogu ndraʼugö, niʼomasiʼögu, omuso dödögu khöu.”+
12 Iʼanemaiʼö idönisi ia eheha Lowalangi weʼamöi ba danö si mate.
13 Toröi ia ba daʼö 40 hari ba itandraigö ia Satana.+ So göi ba zi fasui daʼö gutu ndruʼu, ba tohare ndra malaʼika ba wanolo yaʼia.+
14 Me no laraʼu Yohane, mofanö Yesu ba Galilaia.+ Ituriaigö duria somuso dödö moroi khö Lowalangi.+
15 Imane, ”No irugi inötö ba no ahatö Wamatörö Lowalangi andrö. Mifalalini gera-erami,+ ba miʼamati ba duria somuso dödö.”
16 Me mowaö-waö ia ba zinga Nasi Galilaia, iʼila Zimoni ba talifusönia Andrea.+ Lafazaumba ndriala börö me si fagai+ ba nasi ira.+
17 Imane khöra Yesu, ”Aine, miʼoʼö ndraʼo. Ubaliʼö ami samaʼuʼu niha.”+
18 Iʼanemaiʼö laröi halöwöra ba laʼoʼö ia.+
19 Me mofanö ia zui, iʼila Yakobo ba Yohane ono Zebedaiʼo. Lahaogö-haogö ndrialara ba dundraha.+
20 Ikaoni ira Yesu, ba iʼanemaiʼö laröi namara Zebedaiʼo hegöi sohalöwö khöra. Ba laʼoʼö ia.
21 Aefa daʼö, mofanö ira ba Gafanauma.
Me luo Sabato, möi ia mamahaʼö ba nahia waʼowulo.*+
22 Ahöli-höli dödöra lagu wamahaʼönia börö me famahaʼönia andrö moroi khö Lowalangi,* tenga simane famahaʼö ndra sangila amakhoita.+
23 Ba nahia waʼowulo andrö so niha nifakao malaʼika si lö sökhi. Muʼao ia,
24 ”Hana wa möiʼö ba daʼa Yesu niha Nazareta?+ Hadia ba wangohori yaʼaga? Uʼila haniha ndraʼugö, Niʼamoniʼö andrö moroi khö Lowalangi!”+
25 Hizaʼi, ihangöi ia Yesu, ”Honogöʼö, hetaʼögö ba mboto niha daʼö!”
26 Agakandro niha daʼö ba ebua linia weʼao börö malaʼika si lö sökhi no mege, aefa daʼö iheta ia ba mboto niha andrö.
27 Ahöli-höli dödö niha ba zalua andrö, ibörögö lafadunö-dunö. Lamane, ”Hadia daʼa? Famahaʼö si bohou! So khönia kuaso ba wamofanö malaʼika si lö sökhi, ba laʼoʼö niwaʼönia.”
28 Alio sibai tehöngö duria Yesu andre ba zi sagörö tanö Galilaia.
29 Mofanö ira moroi ba nahia waʼowulo andrö, lasawa nomo Zimoni faoma Andrea. Fao göi Yakobo ba Yohane.+
30 Mofaʼaukhu nina matua Zimoni,+ so ia yawa ba warate, ba iʼanemaiʼö lafatunö khö Yesu zalua andrö.
31 Iʼondrasi ia Yesu, igogohe dangania enaʼö tola maoso ia. Taya waʼaukhunia ba mondrino ia, ibeʼe göra.
32 Me bongi me no aekhu luo, laʼohe khönia niha sofökhö hegöi niha nifakao malaʼika si lö sökhi.+
33 Owulo fefu niha si so ba mbanua andrö föna mbawandruhö.
34 Ifadöhö fefu ngawalö wökhö si göna ba niha,+ ifofanö malaʼika si lö sökhi si no fatewu ba mboto niha. Hizaʼi lö itehegö fahuhuo ndra malaʼika si lö sökhi andre börö me laʼila wa yaʼia andrö Keriso.*
35 Sihulö wongi sibai, me ogömi-gömi nasa, maoso ba mofanö ia ba nahia si lö niha-niha ba mangandrö ia.+
36 Hizaʼi, iʼalu-alui ia Simoni hegöi ira nifahaʼö tanö böʼö.
37 Me falukha ira, lamane khönia, ”Ato zangalui yaʼugö.”
38 Imane khöra, ”Aine, möita ba mbanua sahatö ba daʼa. Omasido göi manuriaigö ba mbanua andrö me daʼö mbörö wa tohare ndraʼo.”+
39 Mofanö ia manuriaigö ba nahia waʼowulo* ba zi sagörö tanö Galilaia ba ifofanö malaʼika si lö sökhi.+
40 So samösa zobou auri iʼondrasi Yesu ba ituhi danö fönania, ”Na omasiʼö, tola öfadöhö ndraʼo.”+
41 Börö waʼahakhö dödö Yesu, iʼoroʼö dangania ba ibabaya zobou auri andrö. Imane, ”Omasido! Yadöhö ndraʼugö.”+
42 Iʼanemaiʼö aheta khönia mbou auri andrö ba döhö ia.
43 Aefa daʼö, iwaʼö khönia Yesu enaʼö mangawuli ia ba iʼabeʼeʼö linia,
44 ”Böi fatunö ba niha. Ofanö, ba ae foromaʼö ndraʼugö khö ndra ere. Beʼe zumange si no itatugöi Moze,+ si tobali tandra wa no döhö ndraʼugö.”+
45 Hizaʼi, me no mofanö niha daʼö, ibörögö idunö-dunö hadia zalua khönia. Börö daʼö, tebai saʼae iʼoromaʼö ia Yesu weʼamöi ba mbanua. Iʼagö mbanua si lö niha-niha. Hewaʼae simanö, lö aetu laʼondrasi ia niha.+
Nisura ba gahe zura
^ Mazui ”Ihöndrögö ira ba nidanö”.
^ Sin.: ”zinagoga”.
^ Sin.: ”börö me mamahaʼö ia simane niha si so kuaso”.
^ Mazui te ”laʼila haniha ia”.
^ Sin.: ”zinagoga”.
