Nisura Mareko 13:1-37
13 Me mofanö ia iröi gosali, samösa nifahaʼönia sangumaʼö, ”He Samahaʼö, faigi atö, hawaʼasökhi gara daʼö hegöi tomosania!”+
2 Hizaʼi imane Yesu, ”Hadia no miʼila fefu domosa segebua andre? Ahori tedudugö dania daʼa fefu. Lö hadöi saʼae kara si falaete ba nawönia kara.”+
3 Me modadao ia ba Hili Zaitu iʼotahögö gosali, manofu khönia Wetero, Yakobo, Yohane hegöi Andrea ba zi lö niha-niha,
4 ”Ombakhaʼö khöma hawaʼara alua fefu daʼö ba hadia dandra wa no ahatö gamozua daʼa fefu?”+
5 Ibörögö iʼombakhaʼö khöra Yesu, ”Miʼangelama böi so zamaelungu yaʼami.+
6 Ato dania zangogunaʼö töigu lamane, ’Yaʼodo daʼö,’ ba ato niha nifaelungura.
7 Simanö göi na mirongo so wasuwöta salua misa, böi miʼataʼufi. Hasambalö alua daʼö, hizaʼi tenga nasa amozuania.+
8 ”Maoso dania zi sambua soi isuwö soi böʼö,+ simanö göi zalua ero sambu-sambua famatörö. Alua ndruru danö misa ba so lofo sabölö-bölö.+ Daʼö fefu awena böröta wamakao.*+
9 ”Miʼangelama göi. Laʼohe dania ami föna zanguhuku+ ba laböbözi ami ba nahia waʼowulo*+ ba laʼohe ami föna ndra gubernur hegöi razo börö ndraʼo ba wamaduhuʼö khöra.+
10 Si oföna, hasambalö teturiaigö duria somuso dödö ba ngawalö soi.+
11 Ba ginötö laʼohe ami föna zanguhuku, böi mibusi tödö hadia zinangea miwaʼö ba hadia wehedemi. Miwaʼö manö hadia niʼilami ba luo daʼö börö me tenga yaʼami zi fahuhuo, hizaʼi eheha niʼamoniʼö.+
12 Aefa daʼö, ifabunuʼö dalifusönia niha, ifabunuʼö nononia ama, lalawa ba lafabunuʼö zatuara iraono.+
13 Fatiu dödö niha khömi börö döigu andrö.+ Hizaʼi, sanau ölö irugi gamozua+ daʼö niʼorifi.+
14 ”Na miʼila dania ngawalö niʼogorofi andrö solohe faʼatekiko,+ mosindro ia ba zi tenga nahiania (enaʼö aboto ba dödö zombaso, moguna ihaogö iʼangeragö), niha si so ba Yudea enaʼö moloi ba hili.+
15 Niha si so ba dete nomo,* böi möi ia tou ba wangai gama-gamania,
16 ba niha si so ba kabu böi mangawuli ia wangai barunia.
17 Alai ndra alawe sanabina ba si so ono sawuyu ba ginötö daʼö!+
18 Böi miböhöli wangandrö enaʼö lö alua daʼö ba mbaŵa deu,
19 börö me alua wamakao sabölö-bölö+ dania ba ginötö daʼö, si lö irai alua iʼotarai me iwöwöi gulidanö Lowalangi irugi iadaʼa, ba lö göi saʼae alua dania.+
20 Sindruhunia, na lö iʼadogoiʼö ginötö andrö Yehowa,* samösa lö sauri. Hizaʼi, börö niha nifilinia wa iʼadogoiʼö ginötö andrö.+
21 ”Böi mifaduhusi tödö na so zangumaʼö, ’So ba daʼa Keriso!’ mazui, ’So ia ba daʼö!’+
22 Ato dania Keriso faya ba samaʼeleʼö sofaya.+ Oya dandra sahöli-höli dödö nifaluara enaʼö tedönisi dödö niha nifili andrö.
23 Börö daʼö, miʼangelama.+ No ufatunö khömi daʼö fefu fatua lö alua.
24 ”Ba luo daʼö, na no aefa wamakao andrö, ogömi haga luo ba taya haga mbaŵa,+
25 agatoru ndröfi moroi ba dalu mbanua ba modögö waʼabölö si so ba dalu mbanua.
26 Aefa daʼö laʼila dania waʼatohare Nono niha+ ba lawuo si fao faʼabölö hegöi lakhömi sebua.+
27 Ifatenge dania ndra malaʼika ba wangowuloi niha nifilinia moroi ba zi öfa watalinga nangi, iʼotarai mbalö danö irugi mbalö mbanua si yawa.+
28 ”Mihalö khömi wamahaʼö moroi ba döla geu ara: Na no tumbu ndrahania ba ibörögö mobulu, miʼila wa no ahatö mbaŵa lökhö.+
29 Simanö göi, na miʼila alua daʼö fefu, yaʼaboto ba dödömi wa lö ara tö tohare* Nono niha.+
30 Sindruhu niwaʼögu, lö ahori mate niha si sagötö andre irege alua daʼö fefu.+
31 Awuʼa mbanua ba awuʼa danö,+ hizaʼi lö tebulö niwaʼögu sagötö faʼara.+
32 ”Samösa lö sangila baŵa hegöi inötö, he ira malaʼika ba zorugo, he Ono, ha Ama zangila.+
33 Andrö böi miförö, miʼangelama+ börö me lö miʼila ginötö si no mutatugöi andrö.+
34 Hulö simane ira matua sofanö ba danö saröu. Iröi nomonia ba ibeʼe kuaso khö ndra sawuyunia.+ Ibeʼe halöwöra zamösana, aefa daʼö ifaretakö zozago bawandruhö enaʼö lö mörö ira.+
35 Andrö böi miförö me lö miʼila ginötö hawaʼara tohare zokhö omo andrö,+ hadia ba zi bongi, mazui ba zi talu mbongi, mazui fatua lö moluo,* mazui sihulö wongi sibai,+
36 enaʼö tenga si mörö ami na tohare ia ba zi lö mudöna-döna.+
37 Hadia niwaʼögu khömi, uwaʼö göi ba niha fefu: Böi miförö.”+
Nisura ba gahe zura
^ Hulö waʼafökhö nirasoi ndra alawe soʼono.
^ Sin.: ”zinagoga”.
^ Mazui ”föna mbawandruhö so”.
^ Sin.: ”na miwo zilatao”.
