Nisura Mareko 14:1-72
-
Mamagölö ndra ere ba wamunu Yesu (1, 2)
-
Tebayoini högö Yesu faoma fanikha somuhua (3-9)
-
Yuda si manga mböli Yesu (10, 11)
-
Owasa Fasa safuria (12-21)
-
Mangohonogöi Bongi Watomesa Zoʼaya (22-26)
-
Tefaʼeleʼö wangosilöʼögö Wetero (27-31)
-
Mangandrö Yesu ba Gezemane (32-42)
-
Laraʼu Yesu (43-52)
-
Laʼohe Yesu föna Zangetuʼö Huku (53-65)
-
Iʼosilöʼögö Yesu Fetero (66-72)
14 Hatö dua hari tö+ alua Gowasa Fasa+ hegöi Owasa Roti si Lö Mufaruka Ragi.+ Laʼalui lala ira kafalo gere hegöi sangila amakhoita ba wondraʼu Yesu ba laʼonekhesi wamunu yaʼia.+
2 Hizaʼi lamane, ”Böi tafaudugö ba ginötö gowasa, tola manö so dania waʼakaliru.”
3 Me so Yesu ba Mbetania, tefaudu manga ia ba nomo Zimoni si no irai göna bou auri, so samösa ndra alawe si tohare, iʼohe mbuli-buli* wanikha somuhua, yaʼia daʼö sindruhu-ndruhu fanikha naridu sebua böli. Ibokai mbuli-buli andrö ba ibayoini högö Yesu faoma fanikha daʼö.+
4 Me laʼila daʼö, so ösa zofönu ba lamane, ”Hana wa muʼalimagösi wanikha daʼa?
5 Na muʼamawa wanikha somuhua daʼa, bölinia töra 300 dinar* ba kefenia tola mubeʼe ba niha si numana!” Mofönu sibai ira khö* ndra alawe daʼö.
6 Imane khöra Yesu, ”Böi mitaha ia. Hana wa mibusi dödönia? Si sökhi nifaluania khögu.+
7 Lö tebulö fao khömi zi numana+ ba tola mifalua khöra zi sökhi gofu hawaʼara manö, hizaʼi tenga sagötö faʼara wefaoda.+
8 No ifalua ndrege zi tola ia. Ibayoini mbotogu faoma fanikha somuhua, tandra wamaʼanö fogoʼo yaʼo.+
9 Yafaduhu dödömi, gofu hezo laturiaigö duria somuso dödö ba zi sagörö ulidanö,+ tedunö-dunö dania nifalua ndra alawe andre ba sauli itörö tödö.”+
10 Samösa moroi ba gotalua ndra sinengenia si 12 sotöi Yuda Kariota ifalukhaisi ndra kafalo gere ba wemanga böli Yesu.+
11 Omuso dödöra wamondrongo ba lazazi khönia wameʼe kefe firö.+ Börö daʼö, iʼalui lala wameʼe Yesu ba dangara.
12 Ba ngaluo si oföna Gowasa Roti si Lö Mufaruka Ragi,+ si toʼölönia lataba gurifö Gowasa Fasa.+ Ba daʼö manofu ndra nifahaʼö Yesu lamane khönia, ”Hezo so zomasiʼö mafaʼanö wemanga Wasa?”+
13 Ifatenge darua ndra nifahaʼönia imane, ”Miʼae ba mbanua, ba so dania samösa ndra matua solohe naha nidanö zamalukhaisi yaʼami. Miʼoʼö ia,+
14 ba gofu hezo nomo möi ia, mimane ba zokhö omo, ’No iwaʼö Samahaʼö, ”Hezo mbateʼe dome si tola uʼogunaʼö ba wemanga Wasa si fao ira nifahaʼögu?”’
15 Ituturu dania khömi sambua mbateʼe sebua ba lote, si no muʼehaogö enaʼö taʼogunaʼö. Ba daʼö mifaʼanö khöda.”
16 Mofanö ndra nifahaʼö, larugi mbanua andrö ba laʼila wa itörö fefu niwaʼö Yesu khöra ba lafaʼanö Wasa.
17 Me no bongi, tohare Yesu fao ndra sinengenia si 12.+
18 Me modadao ba manga ira, imane khöra Yesu, ”Sindruhu niwaʼögu, so dania samösa ba gotaluami zi manga mböligu si falulu manga khögu iadaʼa.”+
19 Ibörögö abu dödöra me larongo daʼö ba faoma lamane, ”Tenga yaʼodo lö?”
20 Imane khöra Yesu, ”Samösa ia moroi ba gotaluami si felendrua andre, si fao khögu woʼungugö roti ba mako.+
21 Mofanö dania Nono niha simane si no tesura sanandrösa khönia. Hizaʼi, alai zi manga mböli Nono niha andrö!+ Sindruhunia abölö sökhi lö tumbu niha daʼö mege.”+
22 Gasa-gasa wemangara, ihalö roti Yesu, mangandrö ia, iboboto roti andrö aefa daʼö ibeʼe khöra ba imane, ”Mihalö, amaedola mbotogu daʼa.”+
23 Aefa daʼö ihalö mako, iʼandrö saohagölö khö Lowalangi ba ibeʼe khöra, ba faoma labadu nösi mako andrö.+
24 Imane khöra, ”Amaedola ndrogu daʼa,+ yaʼia daʼö ’do wawuʼusa liʼ+ niduwagö ba niha sato.+
25 Sindruhu niwaʼögu, lö saʼae ubadu nagu daʼa irege ubadu zui dania nagu si bohou ba Wamatörö Lowalangi.”
26 Ba gafuriata, me no awai laʼanunöisi zinunö famosumange Lowalangi, mofanö ira ba Hili Zaitu.+
27 Imane khöra Yesu, ”Yaʼami fefu miröi ndraʼo simane si so ba zura, ’Usuwö dania gubalo daʼö+ ba muzawili mbiri-birinia.’+
28 Hizaʼi na no tesusugi ndraʼo, oföna urugi Galilaia moroi khömi.”+
29 Imane Fetero, ”Hewaʼae laröi ndraʼugö fefu niha, hizaʼi lö uröiʼö.”+
30 Imane khönia Yesu, ”Sindruhu niwaʼögu khöu, maʼökhö andre, bongi daʼa sibai fatua lö mendrua miwo zilatao, no tölu kali öʼosilöʼögö ndraʼo.”+
31 Hizaʼi fatandro Wetero, ”He mate ndraʼo awöu, ba lö uʼosilöʼögö ndraʼugö.” Lawaʼö göi zimane daʼö ira nifahaʼö tanö böʼö.+
32 Aefa daʼö, möi ira ba Kabu Gezemane ba imane khö ndra nifahaʼönia, ”Möido mangandrö, midadao ba daʼa.”+
33 Iʼohe awönia Wetero, Yakobo hegöi Yohane,+ ba ibörögö abu dödönia ba lö sökhi-sökhi dödönia.
34 Imane khöra, ”Abu sibai dödögu,+ mane mate ndraʼo. Mibaloi ba daʼa, böi miförö.”+
35 Ifandröndröu ia föna maʼifu, ituhi danö ba mangandrö ia, na tola akha italuʼi ia abula dödö andrö.
36 Mangandrö ia, ”He Abba,* Ama,+ lö si tebai ba khöu. Fataluʼiʼö khögu mako andre, hizaʼi böi fatörö ba zomasi ndraʼo yaʼitörö zomasi ndraʼugö.”+
37 Me mangawuli ia, ba no mörö ira. Imane khö Wetero, ”He Simoni, hana wa möröʼö? Hadia lö faʼabölöu ba wozago yaʼo sambua za manö?”+
38 Böi miförö ba böi miböhöli wangandrö, enaʼö böi aekhu ami ba wanandraigö.+ Aoha sa gölö dödö, ba no ambö faʼabölö nösi.”+
39 Aefa daʼö mofanö ia zui möi ia mangandrö, ifuli iwaʼö niʼandrönia mege.+
40 Me mangawuli ia no ifuli zui mörö ira. Abua sibai guli höröra irege lö laʼila hadia niwaʼöra khö Yesu.
41 Ifuli ia zui si medölu kali ba imane khöra, ”Ba zimane daʼa, hana wa molombase ami ba mörö? Noa daʼö! No irugi inötö!+ Iadaʼa tebeʼe Nono niha andrö ba danga zebua horö.
42 Mifaoso, mofanö ita. Lö ara tö tohare zi manga mböligu.”+
43 Gasa-gasa wahuhuosania, iʼanemaiʼö tohare Yuda, samösa moroi ba gotalua zinengenia si 12, fao ia ba niha sato solohe föda ba fagado. Yaʼira andrö nifatenge ndra kafalo gere, sangila amakhoita hegöi ira sondröniaʼö.+
44 No ifatunö khöra dandra si manga mböli andrö, ”Niha niʼumagu dania, daʼö ia. Miraʼu ia böi miʼefasi, mihaogö wozago.”
45 Ifahatö ia khö Yesu imane, ”He Samahaʼö!”* Ihaogö woʼuma.
46 Aefa daʼö laraʼu Yesu.
47 Hizaʼi so samösa zanöbi föda, itaba dalinga zawuyu gere sebua irege aetu.+
48 Aefa daʼö imane khöra Yesu, ”Hadia sorabu ndraʼodo andre wa miʼohe wöda awö wagado ba wondraʼu yaʼo?+
49 Ero maʼökhö fao ndraʼo khömi ba mamahaʼö ndraʼo ba gosali,+ hizaʼi lö miraʼu ndraʼo. Andrö wa alua daʼa fefu enaʼö itörö niwaʼö Mbuku Niʼamoniʼö.”+
50 Aefa daʼö, moloi fefu ndra nifahaʼö laröi ia.+
51 Hizaʼi, so samösa nono matua soloʼö yaʼia moroi furi. No ifake mbaru sebua si sökhi ba wombalugö ösinia. Me latandraigö wondraʼu yaʼia,
52 iröi mbaru sebua andrö ba moloi ia lö nukha.*
53 Aefa daʼö, laʼohe Yesu khö gafalo gere,+ ba fefu gere sebua, ira sondröniaʼö, hegöi sangila amakhoita owulo ira ba daʼö.+
54 Hizaʼi, igoʼö-goʼö moroi furi ba zaröu Fetero me laʼohe Yesu irugi golayama nomo gere sebua. Modadao ia ba daʼö ba zinga zohalöwö, laleu ira ba galitö.+
55 Gasa-gasa daʼö, laʼalui niha samöbögö si lö duhu ira kafalo gere hegöi Sangetuʼö Huku ba wolawa Yesu, enaʼö labunu ia. Hizaʼi, lö lasöndra zala nifaluania.+
56 Ato zamöbögö khönia si lö duhu,+ hizaʼi no faböʼö-böʼö niwaʼöra.
57 So ösa niha si zizio ba laböbögö khönia zi lö duhu lamane,
58 ”No marongo me iwaʼö, ’Ududugö gosali nifazökhi danga niha andre, ha ba zi tölu hari ufuli ufazökhi gosali tanö böʼö si tenga nifazökhi danga niha.’”+
59 Hewaʼae simanö, no faböʼö-böʼö wamaduhuʼöra.
60 Aefa daʼö, mosindro gere sebua ba gotaluara, manofu ia khö Yesu imane, ”Hana wa lö ödema-dema? Hadia lö örongo-rongo niböbögöra khöu?”+
61 Hizaʼi, lö manö hede-hede Yesu ba maʼifu na itema.+ Ifuli isofu khönia ere sebua imane, ”Hadia Keriso ndraʼugö, Ono Lowalangi Niʼamoniʼö?”
62 Imane khönia Yesu, ”Atulö, ba miʼila dania Nono niha,+ no modadao ia ba gambölö+ Lowalangi Fondrege Zabölö ba tohare ia ba dete lawuo.”+
63 Aefa daʼö, isika mbarunia ere sebua imane, ”Lö moguna khöda zamaduhuʼö saʼae?+
64 No mirongo hewisa wangoʼayania Lowalangi. Hewisa moloʼö yaʼami?” Lamane niha sato wa sinangea na mate ia.+
65 Aefa daʼö, so ösa zodiloi yaʼia,+ labalugö mbawania ba latezu ia. Lamane, ”Na samaʼeleʼö ndraʼugö, fatunö khöma haniha zamözi yaʼugö!” Latafari mbawania ira sangetuʼö huku ba laʼohe ia.+
66 Me so Wetero tou ba golayama, samösa zawuyu ira alawe gere sebua si möi ba daʼö.+
67 Me iʼila Wetero ileu ia ba galitö, itöngö ia ira alawe daʼö imane, ”Samösa göi ndraʼugö nawö Yesu niha Nazareta andrö.”
68 Hizaʼi mangosilöʼögö Wetero imane, ”Lö aboto ba dödögu hadia niwaʼömö.” Aefa daʼö mofanö ia baero ba mbawa göli.
69 Iʼila zui ia ira alawe andrö, ba humede ia ba niha si zizio ba daʼö, ”Samösa ia moroi ba gotaluara.”
70 Mangosilöʼögö zui Wetero. Lö ara aefa daʼö, niha sozizio ba daʼö lamane khö Wetero, ”Yaʼugö samösa ba gotaluara börö me niha Galilaia ndraʼugö.”
71 Ibörögö iʼelifi ia samösa ba möi ia ba hölu, ”Lö uʼila haniha nidunö-dunömi andrö!”
72 Ba ginötö daʼö, iʼanemaiʼö miwo zilatao ba zi mendrua kali.+ Itörö tödö Wetero niwaʼö Yesu, ”Fatua lö mendrua miwo zilatao, no tölu kali öʼosilöʼögö ndraʼo.”+ Mofanö ia baero, aefa daʼö iduhugö wege-ege.
Nisura ba gahe zura
^ Buli-buli daʼa tefazökhi moroi ba gara nifotöi ’alabaster’. Faigi Geluaha Ngawua Wehede.
^ Mazui ”Lahagöni; Abao sibai dödöra khö”.
^ Ba li Heberaiʼo mazui Aramo eluahania, ”Bapa!”
^ Sin.: ”Rabi”.
^ Mazui ”moloi ia hatö ono mbaru”.
