Nisura Mareko 16:1-8
-
Tesusugi Yesu (1-8)
16 Me no awai luo Sabato,+ möi laʼöli wangomuhua ira Maria Magadala, Maria+ ina Yakobo hegöi Salome ba wamagule fangomuhua daʼö ba mboto Yesu.+
2 Ba ngaluo siföföna ba migu daʼö, sihulö wongi sibai me awena tumbu luo, möi ira ba lewatö.+
3 Faoma lamane khö nawöra, ”Haniha dania zamagaölö kara fondruhö lewatö andrö khöda?”
4 Hizaʼi, me laʼila gamaudu lewatö, no lafagaölö gara andrö hewaʼae ebua sibai.+
5 Me möi ira bakha, laʼila samösa nono matua samake baru safusi, no modadao ia tanö ba gambölö ba tokea ira.
6 Imane khöra, ”Böi tokea ami.+ Niʼaluimi andrö Yesu, niha Nazareta nibunu ba döla geu. No tesusugi ia. Lö yaʼia ba daʼa.+ Mifaigi atö, ba daʼa mufadölö ia mege.+
7 Miʼofanö iadaʼa, miʼombakhaʼö khö ndra nifahaʼönia hegöi khö Wetero, ’No idari-dari wofanö ba Galilaia.+ Ba daʼö falukha ami khönia, simane si no irai iwaʼö khömi.’”+
8 Me no möi ira baero, fagohi ira moroi ba lewatö si fao fanizi-nizi ba faʼahöli-höli dödö. Lö lafatunö gofu haʼökhö manö börö waʼataʼura.*+
