Nisura Mareko 2:1-28
2 Hauga hari aefa daʼö, ifuli möi ia ba Gafanauma ba oi larongo niha wa so ia ba nomo.+
2 Ato zangondrasi yaʼia irege afönu nomo ba lö molala niha ba mbawandruhö. Aefa daʼö, ifatunö khöra duria somuso dödö.+
3 So daöfa ndra matua solohe niha sombuyu-mbuyu töla.+
4 Hizaʼi, tebai laʼohe ia khö Yesu börö waʼato niha. Labokai zagö nomo daʼö ba ladada gasonia moroi yawa, tefaudu föna Yesu.
5 Me iʼila Yesu wa mamati sibai ira,+ imane ba niha sombuyu-mbuyu töla andrö, ”He onogu, no teʼefaʼö horöu.”+
6 So ösa zangila amakhoita si dadao ba daʼö, lamane tödöra,+
7 ”Hana wa iwaʼö daʼö? Iʼoʼaya Lowalangi. Si tola mangefaʼö horö ha Lowalangi!”+
8 Hizaʼi, aboto ba dödö Yesu niʼera-erara. Imane khöra, ”Hana wa simane daʼö gera-erami?+
9 Hezo zabölö aoha wangumaʼö ba niha sombuyu-mbuyu töla andrö, ’No teʼefaʼö horöu,’ mazui, ’Faoso, fazawa gasomö ba ofanö’?
10 Hizaʼi, enaʼö aboto ba dödömi wa so kuaso ba Nono niha+ wangefaʼö horö ba gulidanö . . . ”+ Aefa daʼö, imane khö zombuyu-mbuyu töla andrö,
11 ”Faoso, fazawa gasomö, ba angawuli ba nomo.”
12 Ba maoso niha andrö ifazawa gasonia, itörö föna niha sato. Ahöli-höli dödöra fefu ba lasuno Lowalangi, ”Lö irai taʼila zimane daʼa.”+
13 Ifuli zui möi Yesu ba zinga nasi. Laʼondrasi ia niha sato ba ifahaʼö ira.
14 Me mowaö-waö ia, iʼila no modao-dao Lewi ono Galifaiʼo ba gödo pajak. Imane khönia Yesu, ”Oʼö ndraʼo.” Mosindro Lewi, iʼoʼö Yesu.+
15 Aefa daʼö, manga Yesu ba nomo Lewi. So zohalöwö ba gödo pajak hegöi niha sebua horö, fao ira manga khö Yesu awö ndra nifahaʼönia börö me ato ba gotaluara zoloʼö yaʼia.+
16 Me laʼila daʼö ira sangila amakhoita moroi ba gotalua ndra Farizaiʼo, lamane khö ndra nifahaʼö Yesu, ”Hana wa fao ia manga ba zanugi pajak hegöi ba niha sebua horö?”
17 Me irongo daʼö Yesu, imane khöra, ”Tenga ba niha sabölö moguna doto, hizaʼi ba niha sofökhö. Tenga ba wogaoni niha satulö möi ndraʼo, hizaʼi ba wogaoni niha sebua horö.”+
18 Asese fuasö nifahaʼö Yohane hegöi ira Farizaiʼo. Möi ira laʼondrasi Yesu ba lasofu khönia, ”Hana wa lö fuasö nifahaʼömö simane ira nifahaʼö Yohane hegöi nifahaʼö ndra Farizaiʼo?”+
19 Imane khöra Yesu, ”Sagötö fefao marafule+ ba zi fahuwu khönia, lö moguna fuasö ira lö? Sagötö fao ia khöra, tebai fuasö ira.
20 Hizaʼi, na tehalö marafule moroi khöra,+ awena ba daʼö fuasö ira.
21 Na so mbaru satua si no asika, lö hadöi labeʼe balo-balonia nukha si bohou. Tekiko dania nukha si bohou andrö ba itugu ebua zasika.+
22 Simanö göi nagu si bohou, lö laʼiröʼö ba naha* satua, tola manö aboto nahania ba aduwa nagu. Hizaʼi, laʼiröʼö nagu si bohou ba naha si bohou.”
23 Me itörö Yesu nowi gandru ba ginötö luo Sabato, lateteu gandru ira nifahaʼönia ba laʼa ba wofanöra.+
24 Manofu ndra Farizaiʼo khönia lamane, ”Hana wa lasawö goroisa luo Sabato ira nifahaʼömö?”
25 Imane khöra Yesu, ”Hadia lö nibasomi nifalua Dawido me olofo ia hegöi ono buania?+
26 Moloʼö waö-waö sanandrösa khö gafalo gere sotöi Abiataro,+ möi Dawido bakha ba nomo Lowalangi, iʼa roti nibaliʼö sumange. Sindruhunia ha ira ere zi manga daʼö,+ ibeʼe göi ba nono buania.”
27 Itohugö wangumaʼö Yesu, ”Tebeʼe Zabato börö me moguna ba niha.+ Hizaʼi, tenga daʼö wa tewöwöi niha enaʼö ifalua Zabato.
28 Börö me Ono niha andrö Soʼaya luo Sabato.”+
Nisura ba gahe zura
^ Nifazökhi moroi ba guli gurifö.
