Nisura Mareko 3:1-35
3 Ifuli zui möi Yesu ba nahia waʼowulo. So ba daʼö niha, no mate dambai dangania.+
2 Börö me laʼalu-alui zala Yesu ira Farizaiʼo, andrö wa lahörö-hörögö ia na ifadöhö niha daʼö ba luo Sabato.
3 Imane Yesu ba niha si no mate dambai tanga andrö, ”Ozizio, agö ba gotaluama.”
4 Aefa daʼö manofu ia khöra, ”Hadia zi tola lafalua ba luo Sabato, mamalua si sökhi mazui si lö sökhi, mangorifi mazui mamunu?”+ Hizaʼi, lö manö hede-hedera.
5 Ifaigi ira Yesu si fao fönu ba abu dödönia börö me sabeʼe högö ira.+ Aefa daʼö imane ba niha andrö, ”Oroʼö dangamö.” Iʼoroʼö dangania niha andrö ba döhö.
6 Aefa daʼö mofanö ndra Farizaiʼo ba mamagölö ira ba niha si faʼawö khö Herode+ ba wamunu Yesu.
7 Möi Yesu hegöi ira nifahaʼönia ba zinga nasi. Ato niha moroi ba Galilaia hegöi Yudea zoloʼö yaʼia.+
8 So göi zi tohare moroi ba Yeruzalema, Gidumea, tanö yefo Yoridano, banua si fasui Diro hegöi Sidona. Laʼondrasi Yesu börö me no larongo fefu zi no ifalua.
9 Iʼandrö khö ndra nifahaʼönia enaʼö lahenaigö dundraha side-ide faböi lasasakö ia niha sato.
10 Fasösö niha sofökhö ba ato zodegeni awönia enaʼö lagogohe mbaru Yesu börö me ato zi no ifadöhö.+
11 Niha nifakao malaʼika si lö sökhi+ manö mangalulu ira ero falukha khönia ba lamane, ”Ono Lowalangi ndraʼugö.”+
12 Hizaʼi, abeʼe wehedenia khöra enaʼö böi lafatunö ia ba niha.+
13 Möi Yesu ba hili, ifili ndra nifahaʼö somasi ia,+ ba laʼoʼö ia.+
14 Ifili zi 12 niha, ifotöi ira sinenge. Yaʼira zi fao khönia, nifatengenia weʼamöi manuriaigö,
15 ba ibeʼe khöra waʼabölö ba wamofanö malaʼika si lö sökhi.+
16 Si 12+ nifilinia andrö yaʼia daʼö Simoni, nibeʼenia töi Fetero,+
17 Yakobo ba Yohane, ono Zebedaiʼo (ibeʼe göi töira Boanegeresi, eluahania ”Ono Weʼugu-ugu Mbanua”),+
18 Andrea, Filifo, Batolomaiʼo, Mataiʼo, Toma, Yakobo ono Galifaiʼo, Tadaiʼo, Simoni niha Kananaio,*
19 ba Yuda Kariota, si manga mböli Yesu ba gafuriata.
Aefa daʼö möi Yesu bakha ba nomo,
20 ba ifuli owulo niha sato ba daʼö irege lö fakhamö manga ia hegöi ira nifahaʼönia.
21 Me larongo ira talifusönia hadia zalua, tohare ira wamaondragö Yesu lamane, ”Owöhö ia.”+
22 Lamane göi ira sangila amakhoita si tohare moroi ba Yeruzalema, ”No fatewu Mbelesebu* ba mbotonia. Ifofanö malaʼika si lö sökhi börö wanolo moroi khö zalawa malaʼika si lö sökhi.”+
23 Aefa daʼö ikaoni ira, ifatunö khöra gamaedola, ”Hewisa wa tola ifofanö Zatana awönia Satana?
24 Dozi famatörö, na fabali dödö hasambalö adudu;+
25 ba dozi fongambatö, na fabali gera-era hasambalö adudu.
26 Tobali, na ilawa samösa ia Satana ba so waʼafabali dödö ba wamatörönia, lö aro ba adudu wamatörö daʼö.
27 Na so zi möi ba nomo ndra matua sabölö ba woʼanagöi yaʼia, tatu oföna ua iböbö ndra matua andrö. Awena tola ihalö gama-gama niha daʼö.
28 Yafaduhu dödömi, fefu gamuata niha hasambalö teʼefaʼö, gofu hadia horö nifaluara hegöi fangobousi niwaʼöra.
29 Hizaʼi, haniha zanandrawaisi eheha niʼamoniʼö, lö irai teʼefaʼö.+ Horö sagötö faʼara daʼö.”+
30 Wa iwaʼö daʼa Yesu börö me lamane, ”No fatewu malaʼika si lö sökhi ba mbotonia.”+
31 Aefa daʼö, tohare mamania awö dalifusönia matua.+ No mozizio ira baero ba lafatenge zogaoni yaʼia.+
32 Niha sato si dadao ba zi fasui yaʼia lamane khönia, ”Hiza baero mamamö awö dalifusöu. Laʼalu-alui ndraʼugö.”+
33 Itema lira Yesu, ”Haniha mamagu, ba haniha dalifusögu matua?”
34 Aefa daʼö, ifaigi niha si dadao ba zi fasuinia imane, ”Yaʼira andre mamagu hegöi talifusögu!+
35 Haniha zoloʼö somasi Lowalangi, daʼö mamagu ba talifusögu matua hegöi talifusögu alawe.”+
