Nisura Mareko 6:1-56
6 Mofanö Yesu moroi ba daʼö, irugi mbanuania+ ba laʼoʼö ia ira nifahaʼönia.
2 Me luo Sabato, ibörögö mamahaʼö ia ba nahia waʼowulo. Ato niha zamondrongo yaʼia, manofu-nofu ira lamane, ”Hezo isöndra daʼa fefu?+ Hana wa tebeʼe khönia waʼatua-tua simane daʼa ba tola ifalua dandra safönu faʼabölö?+
3 Hadia tenga tuka geu ia andrö,+ ono Maria+ ba talifusö Yakobo,+ Yosefo, Yuda hegöi Simoni?+ So göi ba daʼa ndra talifusönia alawe.” Ibörögö lö faduhu dödö niha sato khönia.
4 Imane Yesu, ”Gofu hezo so, lafosumange zamaʼeleʼö. Hizaʼi, lö latema ia ba mbanuania, ira si fahatö khönia hegöi ba nomonia samösa.”+
5 So mato hadauga niha sofökhö nifadöhönia, itufa högöra, hizaʼi lö oya ifalua dandra safönu faʼabölö ba daʼö.
6 Ahöli dödönia me lö mamati ira. Aefa daʼö, mofanö ia ifasui mbanua böʼö ba wamahaʼö.+
7 Ikaoni ndra sinengenia si 12, ifatenge ira daru-darua.+ Ibeʼe khöra waʼabölö ba wamofanö malaʼika si lö sökhi.+
8 Iwaʼö khöra enaʼö böi laʼohe hadia ia ba wofanö, simane roti, naha gö hegöi kefe* ba mböbö löwira. Ha siʼo zi tola laʼohe.+
9 Tola lafake zandrala, hizaʼi tebai laʼohe wamohanira.*
10 Inönö nasa, ”Na möi ami ba zi sambua banua, miʼiagö nomo zi samösa niha irege mofanö ami moroi ba daʼö.+
11 Na so zi lö manemaʼö mazui si lö mamondrongo yaʼami, miʼofanö moroi ba daʼö, miʼanotogö gawu-gawu ba gahemi si tobali famangelama khöra.”+
12 Mofanö ndra sinenge ba laturiaigö ba niha enaʼö lafalalini gera-erara.+
13 Ato malaʼika si lö sökhi nifofanöra,+ lafagule wanikha ba niha sofökhö enaʼö döhö ira.
14 Irongo Razo Herode daʼö börö me no tehöngö döi Yesu. So zangumaʼö, ”No ifuli auri Yohane Samayagö Idanö moroi ba gotalua zi mate, andrö wa tola ifalua dandra safönu faʼabölö.”+
15 Hizaʼi, so göi zangumaʼö, ”Yaʼia andrö Elia.” Tanö böʼö lamane, ”Yaʼia andrö samaʼeleʼö, simane samaʼeleʼö me föna.”+
16 Me irongo daʼö Herode imane, ”No ifuli auri Yohane nitabagu bagi.”
17 Ba zilalö, no iraʼu Yohane andre Herode. Iböbö ba ibeʼe ba gurunga börö Herodia, foʼomo dalifusönia Filifo. No ihalö ndra alawe andrö tobali foʼomonia.+
18 No hauga kali iwaʼö khönia Yohane, ”Tebai öhalö foʼomou woʼomo dalifusömö.”+
19 Fahöʼö dödö Herodia ba wamunu Yohane, hizaʼi tebai ifalua
20 börö me ilumöʼö ia Herode. Ataʼu Herode khö Yohane börö me iʼila wa Yohane andrö niha satulö ba niʼamoniʼö khö Lowalangi.+ Ero irongo niwaʼö Yohane, lö iʼila hadia zinangea ifalua. Hizaʼi, omasi ia wamondrondrongo.
21 Samuza maʼökhö, iʼowasaini mbaŵa waʼatumbunia Herode.+ Ikaoni fefu zalawa hegöi kumandru zaradadu awö niha si tehöngö ba Galilaia. Daʼa ginötö si tefaudu khö Herodia.+
22 Aefa daʼö, manari nono Herodia ono alawe ba daʼö. Omuso dödö Herode hegöi tomenia si falulu manga khönia. Imane Razo khö nono alawe daʼö, ”Gofu hadia niʼandröu hasambalö ubeʼe.”
23 Möi ba hölu Herode, ”Gofu hadia niʼandröu hasambalö ubeʼe, he matonga moroi ba gamatöröwagu andre.”
24 Ifalukhaisi ninania ono alawe andrö imane, ”Hadia zinangea uʼandrö?” Imane inania, ”Högö Yohane Samayagö Idanö.”
25 Iʼanemaiʼö möi nono alawe andrö khö Razo ba ifaʼema gangandröwania, ”Omasido na öbeʼe khögu ba tala högö Yohane Samayagö Idanö iadaʼa sibai.”+
26 Hewaʼae abu dödö Razo, tebai itimbagö niʼandrö nono alawe daʼö börö me no möi ia ba hölu ba no göi larongo hölunia andrö ira tomenia.
27 Ifatenge samösa zozago ba wangai högö Yohane. Möi zozago andrö ba wanaba bagi Yohane ba gurunga,
28 iʼohe högö Yohane yawa ba tala. Ibeʼe khö nono alawe andrö ba ono alawe daʼö zameʼe khö ninania.
29 Me larongo daʼö ira nifahaʼö Yohane, möi ira wangai botonia ba lakoʼo.
30 Owulo ndra sinenge ba zi fasui Yesu. Ladunö-dunö hadia nifaluara hegöi famahaʼöra.+
31 Imane Yesu, ”Aine, möita ba nahia si lö niha-niha ba molombase ita sabata.”+ Börö me ato niha sofanö hegöi si tohare irege lö saʼae inötöra wemanga.
32 Möi ira yawa ba dundraha, lasawa nahia si lö niha-niha enaʼö lö fao khöra niha sato.+
33 Hizaʼi, ato niha sangila me mofanö ira. Fagohi-gohi fefu niha moroi ba mbanua si fasui, lahulö Yesu enaʼö oföna larugi.
34 Me möi Yesu tou ba dundraha, iʼila niha sato sibai ba ahakhö dödönia+ börö me hulö mbiri-biri si lö kubalo ira.+ Andrö wa oya ifahaʼö ira.+
35 Me tanö owi, laʼondrasi ia ira nifahaʼönia lamane, ”Aröu sibai nahia daʼa, ba no arakhagö bongi saʼae.+
36 Waʼö khö ndra niha daʼa ba wowöli göra ba mbanua sahatö.”+
37 Imane Yesu, ”Yaʼami manö zameʼe göra.” Lamane ira nifahaʼönia, ”Hadia möiga mowöli roti si 200 dinar* ba mabeʼe öra?”+
38 Imane Yesu, ”Mifaigi ua hauga ngawua roti si so khömi.” Me no lafareso, lamane, ”So lima ngawua roti ba dua rozi giʼa.”+
39 Iwaʼö Yesu ba niha sato enaʼö laföföʼö ira wedadao ba dete ndruʼu,+
40 ba lalau modadao simane niwaʼö Yesu. So zi 100 ba so göi zi 50 niha.
41 Aefa daʼö, ihalö roti si lima ngawua awö giʼa si dua rozi, ifaöga hörönia, ilau mangandrö.+ Iboboto roti andrö, ibeʼe khö ndra nifahaʼönia enaʼö ladozigö niha sato. Simanö göi nifaluania ba giʼa si dua rozi andrö.
42 Manga ira fefu irege abuso,
43 ba laʼozaragö zi töra, so 12 raga-raga sagafönu, baero nasa giʼa.+
44 So 5.000 ndra matua si manga roti andrö.
45 Lö ara aefa daʼö, iwaʼö Yesu khö ndra nifahaʼönia enaʼö ladari-dari yefo numalö ba Mbetisaida, latörö dundraha. Gasa-gasa daʼö, iwaʼö ba niha sato enaʼö mangawuli ira.+
46 Me no mofanö ira, möi ia mangandrö ba hili.+
47 Ha yaʼi-yaʼia bongi daʼö. No saʼae larugi dalu nasi ira nifahaʼönia.+
48 Me iʼila Yesu laforege woʼalukhaini tundraha ba wolawa angi, andrö iʼondrasi ira me arakhagö moluo.* Mowaö-waö ia ba dete nasi. Hizaʼi, hulö italuʼi ira Yesu wofanö.
49 Me laʼila mowaö-waö ia ba dete nasi, muʼao ira lamane, ”Hiza lumö-lumö!”
50 Ataʼu ira wamaigi yaʼia. Andrö wa iʼanemaiʼö imane khöra, ”Mihonogö ami! Böi miʼataʼufi, yaʼodo daʼa.”+
51 Aefa daʼö, möi ia yawa ba dundraha ba tebato nangi. Ahöli-höli dödöra wamaigi yaʼia
52 börö me lö saboto ba dödöra geluaha dandra sahöli-höli dödö sanandrösa ba roti no mege.
53 Me larugi yefo nidanö, ofeta ira ba Genesare ba laröi dundrahara ba daʼö.+
54 Me möi ira tou ba dundraha, iʼanemaiʼö laʼila Yesu niha sato.
55 Fagohi ira wangombakha ba niha böʼö ba zi sagörö banua andrö. Ibörögö laʼohe khönia niha sofökhö si so ba mbea-bea.
56 Ero möi Yesu ba mbanua sebua hegöi ba mbanua side-ide, laʼohe khönia niha sofökhö ba fasa ba laʼandrö khönia enaʼö tola lagogohe gahe mbarunia tanö baero.+ Ba fefu niha sololohe ahe mbarunia ahori döhö.
Nisura ba gahe zura
^ Sin.: ”tembaga”.
^ Sin.: ”böi lafodua görö mbarura”.
^ Sin.: ”te me inötö wanaro si meʼöfa”, mato bözi 3-6 arakhagö moluo.
