Nehemia 1:1-11
1 Fehede Nehemia*+ ono Hakalia: Me baŵa Kisilewi* döfi si 20, ba Gödö Zusa+ so ndraʼo.
2 Me luo daʼö, tohare samösa dalifusögu yaʼia daʼö Hanania,+ fao ira ndra matua tanö böʼö moroi ba Yehuda, ba manofu ndraʼo khöra sanandrösa ba niha Yahudi si toröi si no teʼefaʼö moroi ba wangosawuyu+ hegöi sanandrösa ba Yeruzalema.
3 Latema linia, ”Niha si toröi si so ba provinsi sangawuli moroi ba wangosawuyu andrö, lö sökhi duriara ba tobali fangaila.+ No adudu göli Yeruzalema+ ba no akhozi mbawa gölinia.”+
4 Me urongo daʼö, modadao ndraʼo ba ulau mege-ege. Abu sibai dödögu mato hauga hari, ba lö aetu fuasö+ ndraʼo ba mangandrödo khö Lowalangi samatörö sorugo.
5 Umane, ”He Yehowa, Lowalangi samatörö sorugo, Lowalangi solakhömi ba sahöli-höli dödö, samalua buʼusa linia ba sangoromaʼö faʼomasi si lö faröi ba niha sangomasiʼö yaʼia ba soloʼö oroisania,+
6 uʼandrö khöu, beʼe mbörö dalingamö ba bokai höröu, enaʼö öfondrondrongo wangandrö genonimö nifaʼemagu khöu maʼökhö.+ Bongi maʼökhö mangandrödo salahi nono mbanuamö Izaraʼeli, ba ufaduhuʼö horö nifalua ndraono Gizaraʼeli khöu. No mafalua horö, yaʼo hegöi ösi nomo namagu.+
7 No mafalua zi lö sökhi fönau+ yaʼia me masawö goroisamö, nifakhoimö awö gangetula huku si no öfaʼema khö genoniu Moze.+
8 ”Törö tödöu wamangelama* nibeʼeu khö Moze enonimö andrö yaʼia daʼö, ’Na faröi ami, ufazawili ami ba gotalua soi böʼö.+
9 Hizaʼi, na mangawuli ami khögu ba miʼoʼö goroisagu, uʼowuloi ami hewaʼae no muzawili ami irugi wondrege danö.+ Uheta ami moroi ba daʼö ba uʼohe ami ba nahia si no ufili ba döigu.’+
10 Yaʼira andre enoniu ba ono mbanuau, si no öhöli ba waʼabölöu sebua ba tangau sabeʼe.+
11 He Yehowa, beʼe mbörö dalingamö ba wamondrondrongo fangandrö genoniu andre ba fangandrö nono mbanuamö sangataʼufi töimö. Uʼandrö khöu, enaʼö mofozu ndraʼo maʼökhö. Yaʼiforomaʼö khögu razo waʼahakhö dödönia.”+
Me luo daʼö, yaʼo zameʼe idanö khö razo.+
