Nehemia 2:1-20
2 Me baŵa Nisana* ba ndröfi si 20+ wamatörö Razo Aretazasa,+ labeʼe fönania nagu ba möido uhalö nagu andrö, ufasao khönia simane si toʼölö.+ Ba zilalö, lö irai ufangerau mbawagu fönania.
2 Imane khögu Razo, ”Hana wa no öfangerau mbawa? Lö göi mofökhö ndraʼugö. Tatu manö so zabu dödöu.” Me urongo daʼö, ataʼu sibai ndraʼo.
3 Umane khö Razo, ”Yaʼanau nosomö Razo! Hewisa wa lö ufangerau mbawagu. No adudu mbanua andrö nahia wogoʼo ndra tuagu ba no akhozi fefu mbawa gölinia.”+
4 Imane khögu Razo, ”Hadia zomasiʼö?” Iʼanemaiʼö mangandrö ndraʼo khö Lowalangi samatörö sorugo.+
5 Umane khö Razo, ”Na fao dödömö Razo ba na ahakhö dödöu zawuyumö andre, fatenge ndraʼo ba Yehuda ba nahia wogoʼo ndra tuagu enaʼö tola ufuli ufazökhi.”+
6 Aefa daʼö, imane khögu Razo me modadao ratu ba zingania, ”Hawaʼaramö ba daʼö? Ba hawaʼara mangawuliʼö?” Itehegö khögu wofanö Razo,+ ba ufatunö khönia hawaʼara mangawulido.+
7 Aefa daʼö umane khö Razo, ”Na fao dödöu Razo, beʼe khögu zura sofeta khö ndra gubernur si so ba mbanua Yefo Nungo Nidanö*+ enaʼö latehegö khögu wanörö banuara ba lö hadia ia khögu ofeta ba Yehuda,
8 hegöi sura sofeta khö Gasafo, sanaro Kabu ba Gödo Razo enaʼö ibeʼe khögu geu soguna ba Göli+ Nomo Lowalangi,* ba göli mbanua+ hegöi ba nomo si toröido dania.” Ibeʼe khögu daʼö Razo+ börö me itolodo tanga Lowalangigu si sökhi tödö khögu.+
9 Ba gafuriatania, uʼondrasi ndra gubernur si so ba mbanua Yefo Nungo Nidanö ba ubeʼe khöra zura moroi khö Razo. Ifatenge göi zaradadunia Razo awö zi fakudo ba wamasao yaʼo.
10 Me irongo daʼö Sanabala+ niha Horona ba Tobia+ sohalöwö* ba mbanua Gamoni,+ fatuwu sibai ira börö me so niha sangoromaʼö faʼahakhö dödö ba ndraono Gizaraʼeli.
11 Me no ara numalö ginötö, urugi Yeruzalema ba toröido ba daʼö tölu hari waʼara.
12 Ba zi bongi, maoso ndraʼo hegöi niha si fao khögu ösa, ba lö ufatunö gofu haʼökhö gohitö dödögu weʼamöi ba Yeruzalema si no ibeʼe Lowalangi ba dödögu. Ha sageu maʼohe gurifö, yaʼia daʼö urifö si tola utörö.
13 Utohugö wofanö ba zi bongi daʼö, utörö Mbawa Göli Ndraso+ ba Gumbu Nidanö Gulö Sebua sofeta ba Mbawa Göli Safönu Awu,+ aefa daʼö ufareso göli Yeruzalema si no adudu hegöi bawa göli si no akhozi.+
14 Utohugö wofanö ba Mbawa Göli Gumbu Nidanö+ hegöi ba Mbaʼa Nidanö khö Razo. Talafo ide-ide nahia daʼö irege alözö gurifö nitörögu.
15 Utohugö wofanö ba ndraso+ bongi daʼö ba lö uböhöli wamareso öli. Aefa daʼö mangawulido ba nomo, utörö Mbawa Göli Ndraso.
16 Lö laʼila hezo numalödo ira samatörö+ hegöi nifaluagu börö me lö nifatunögu khö ndra niha Yahudi, khö ndra ere, khö ndra tuhenöri, khö ndra samatörö ba khö ndra sohalöwö tanö böʼö.
17 Umane khöra ba gafuriata, ”No miʼila samösa wa lö sökhi duriada. No adudu Yeruzalema ba no akhozi gölinia. Aine, datafazökhi mangawuli göli Yeruzalema faböi saʼae teʼailasi ita.”
18 Ufatunö khöra hewisa me itolo ndraʼo tanga Lowalangigu si sökhi tödö khögu+ ba hadia göi wehede razo khögu.+ Börö daʼö lamane, ”Aine, databörögö wamazökhi.” Faoma lafarou dödö nawöra zamösana ba wamalua halöwö si sökhi andrö.+
19 Me larongo daʼö ira Sanabala niha Horona, Tobia+ sohalöwö* ba mbanua Gamoni,+ ba Gesemi niha Garabi,+ laʼoʼaya+ ba laʼailasi ndraʼaga lamane, ”Hadia daʼa khömi? Hadia milawa Razo?”+
20 Umane khöra, ”Börö Lowalangi samatörö sorugo wa tola mofozu ndraʼaga,+ ba yaʼaga enoninia hasambalö mabörögö wamazökhi. Lö urusami ba Yeruzalema, lö tana khömi ba lö latötöi ami ba Yeruzalema dania.”+
Nisura ba gahe zura
^ Mazui ”Trans-Oiferati”.
^ Mazui ”ba Göli Gosali”.
^ Sin.: ”enoni”.
^ Sin.: ”enoni”.
