Nehemia 4:1-23
4 Me irongo Sanabala+ wa mafuli mafazökhi göli andrö, mofönu sibai ia ba abao dödönia,* lö iböhöli wangoʼaya niha Yahudi.
2 Imane khö ndra talifusönia hegöi khö zaradadu Zamaria, ”Hadia nifalua ndra niha Yahudi si mate andre? Hadia lafalua samösa daʼa? Hadia mameʼe sumange nitunu ira? Hadia awai lafazökhi ba zi sahari? Hadia lafuli laʼorifi gakhökhöla gara si no adudu ba si no tobali awu?”+
3 Aefa daʼö imane Tobia+ niha Gamoni andrö+ sozizio ba zingania, ”Na manöi nasu gatua* ba göli kara nifazökhira andrö, hasambalö adudu.”
4 Börö daʼö mangandrö ndraʼo, ”He Lowalangima, fondrondrongo hewisa wangoʼaya nifaluara khöma.+ Fangawuli khöra* wangoʼayara andrö,+ lulu ira ba danga nudura ba yatobali ira niha niʼoloiʼö ba soi böʼö.
5 Böi biniʼö zalara ba böi tehegö aefa horöra+ börö me no laʼoʼaya ndra sohalöwö.”
6 Lö maböhöli wohalöwö ba no ahori fatuʼa fefu göli andrö irugi matonga waʼalawa. Lö labato wohalöwö niha sato soroi ba dödö.
7 Mofönu sibai Zanabala, Tobia,+ niha Garabi,+ niha Gamoni, ba niha Gasoto+ me larongo tedou wamazökhi öli Yeruzalema, ba no lahaogö zi no agaboto.
8 Mamagölö ira möi lasuwö Yeruzalema enaʼö kaliru.
9 Hizaʼi, mangandrö ndraʼaga khö Lowalangima ba mafataro samösa zozago yaʼaga bongi maʼökhö samaigi-maigi na tohare nudu.
10 Lamane ira niha Yahudi, ”No ahori waʼabölö ndra sohalöwö* ba oya sibai gadudula. Tebai saʼae matohugö wamazökhi öli daʼa.”
11 Lö aetu-aetu lamane si faʼudu khöma, ”Fatua lö aboto ba dödöra gohitö dödöda mazui laʼila ita, tasuwö ba tabunu ira fefu enaʼö tebato halöwöra.”
12 Ero tohare niha Yahudi si toröi sahatö ba zingara, mewulu kali* lafatunö khöma, ”Lasuwö ita gofu hezo manö laʼotarai.”
13 Börö daʼö, ufataro enaʼö so zanaro ba zahöndrö tanö ba nahia si lö baʼa-baʼa furi göli. Ufataro ira moloʼö ösi nomora zamösana, laʼohe wöda, toho ba fana.
14 Me uʼila wa ataʼu ira, uʼanemaiʼö mozizio ba umane khö ndra tuhenöri,+ khö ndra samatörö ba fefu niha tanö böʼö, ”Böi miʼataʼufi ira.+ Mitörö tödömi wa sabölö Yehowa andrö ba sahöli-höli dödö.+ Mifasuwö salahi dalifusömi, iraonomi, foʼomomi hegöi omomi.”
15 Me no larongo si faʼudu khöma wa no maʼila fefu niʼera-erara, ba me no ifawukaisi gohitö dödöra Lowalangi, mafuli matohugö wohalöwö ba wamazökhi öli andrö.
16 Iʼotarai me luo daʼö, matonga nono buagu sohalöwö+ ba matonga zololohe toho, baluse, fana, ba samake baru wasuwöta. Fefu zondröniaʼö,+ fao dödöra* ba niha Yehuda
17 samazökhi öli. Fefu zonoro, sara dangara wohalöwö, ba tangara si sara zololohe fangöna.*
18 Ero samösa sohalöwö, laböbö ba löwi-löwira wöda, ba mozizio ba zingagu zamoli torofe nifazökhi moroi ba dandru.+
19 Ufatunö khö ndra tuhenöri, khö ndra samatörö ba fefu niha tanö böʼö, ”Ebua sibai halöwö daʼa ba ebolo, irege fabali ita ba zi fasui göli ba fandröndröu ita khö nawöda.
20 Mirongo sibai li dorofe nifazökhi moroi ba dandru, miʼowuloi ami ba zi so yaʼaga. Lowalangida dania zi fasuwö salahida.”+
21 Andrö, matonga moroi ba gotaluama zohalöwö ba matonga zololohe toho iʼotarai moluo irugi oroma ndröfi.
22 Me luo daʼö umane khöra, ”Ba Yeruzalema mörö fefu ndra matua awö nono buagu. Lazago ita ba zi bongi ba mohalöwö ba zi maʼökhö.”
23 Börö daʼö, yaʼo hegöi ira talifusögu, ono buagu+ ba sanaro si fao khögu, lö irai maheta nukhama ba lö maböhöli wololohe fangöna ba dangama kambölö zamösana.
Nisura ba gahe zura
^ Mazui ”afökhö dödönia”.
^ Hulö nasu. Adogo-dogo gahe, ebolo dalinga, ba onekhe.
^ Sin.: ”Fangawuli ba högöra”.
^ Mazui ”sonoro”.
^ Sin.: ”fulu kali”.
^ Sin.: ”laʼiagö moroi furi”.
^ Mazui ”toho”.
