Nehemia 5:1-19
5 Mukökö-kökö ndra matua hegöi foʼomora börö ndra talifusöra niha Yahudi.+
2 So zangumaʼö, ”Ato ndraonoma ono matua hegöi ono alawe. Moguna khöma mbua nowi enaʼö tola manga ndraʼaga faböi mate.”
3 So göi zangumaʼö, ”No magadegö nowima, kabu nagu hegöi omoma sagötö mbaŵa lofo enaʼö masöndra mbua nowi.”
4 So göi danö böʼö zangumaʼö, ”No magadegö nowima hegöi kabu nagu khöma ba wamuʼa beʼelö khö Razo.+
5 Hewaʼae na föfö ndroma ndra talifusöma* ba no fagölö göi ndraonoma simane iraonora, matehegö sawuyu ndraonoma alawe hegöi ono matua, ba so ösa ndraonoma alawe zi no tobali sawuyu.+ Lö hadöi si tola mafalua börö me no tobali okhöta niha böʼö nowima hegöi kabu nagu khöma.”
6 Mofönu sibai ndraʼo me urongo wekökö-kököra hegöi fehedera andrö.
7 Uhaogö ufatimbaisi bakha ba dödögu ba utegu ndra tuhenöri hegöi ira samatörö, ”Hana wa mifaso ndra talifusömi ba wamuʼa ono gefe.”*+
Aefa daʼö ufalua rafe sebua ba wamatunö daʼa.
8 Umane khöra, ”No maforege sibai wowöli mangawuli ira talifusöda niha Yahudi, si no teʼamawa ba soi böʼö mböröta. Iadaʼa, hadia mifuli mifamawa ndra talifusömi+ enaʼö maʼöli ira zui?” Lö hede-hedera ba lö latema li.
9 Aefa daʼö umane khöra, ”Lö sökhi nifaluami andre. Hadia tenga sindruhunia miʼataʼufi Lowalangi+ enaʼö lö laʼoʼaya ita si faʼudu khöda moroi ba soi böʼö?
10 Yaʼodo manö hegöi ira talifusögu ba ono buagu, mafafizaʼö khöra gefe awö mbua nowima. Uʼandrö khömi, databöhöli wangandrö ono gefe simane daʼa.+
11 Maʼökhö andre uʼandrö khömi, mifuli nowira,+ kabu nagu, kabu zaitu hegöi omora. Mifangawuli khöra nono gefe,* bua nowi, agu si bohou hegöi fanikha si no mifafizaʼö khöra.”
12 Latema linia, ”Hasambalö mafuli fefu. Lö maʼandrö hadia ia. Mafalua simane sibai niwaʼömö.” Ukaoni ndra ere ba uwaʼö khö ndra niha daʼö weʼamöi ba hölu enaʼö lafalua zi no lafabuʼu.
13 Uʼanotogö mbarugu ba umane, ”Yasimane daʼa nifalua Lowalangi ba niha si lö mamalua buʼusa linia, iʼotarai ba nomo hegöi ba danönia. Yamuʼanotogö ia simane daʼa ba lö hadöi tana khönia saʼae.” Me larongo daʼö niha sato lamane, ”Yaduhu!”* Labörögö lasuno Yehowa ba lafalua zi no lafabuʼu.
14 Baero daʼö, iʼotarai me lafataro ndraʼo tobali gubernur+ ba Yehuda, iʼotarai ndröfi si 20+ irugi ndröfi si 32+ wamatörö Razo Aretazasa,+ 12 fakhe fefu, yaʼodo hegöi ira talifusögu lö irai maʼa dana khö gubernur.+
15 Ira gubernur si tohöna fatua lö yaʼo lafoʼömö nono mbanua. Ero maʼökhö, laʼandrö mböli göra roti faoma agu 456 gram* firö. Simanö göi nono buara, lafakao niha mbanua. Hizaʼi, lö ufalua daʼö+ börö me uʼataʼufi Lowalangi.+
16 Fao göi ndraʼo ba wangehaogö öli andrö ba fefu nono buagu owulo ira wohalöwö, hizaʼi lö mahalö zagörö mbenuara.+
17 So 150 niha Yahudi hegöi ira samatörö si falulu manga khögu ba meza, so göi niha moroi ba soi böʼö zangondrasi yaʼaga.
18 Ero maʼökhö, uwaʼö ba niha enaʼö labeʼe sageu zawi si matua, önö ngaʼeu mbiri-biri nifili hegöi ngawalö wofo. Sakali ba zi fulu hari lahenaigö fefu ngawalö nagu. Hewaʼae simanö, lö uʼandrö dana gögu sinangea khö gubernur börö me no tebeʼe halöwö sabua ba nono mbanua.
19 Mangandrö ndraʼo, ”He Lowalangigu, törö tödöu ba fahowuʼö ndraʼo börö zi sökhi nifaluagu ba soi daʼa.”+
Nisura ba gahe zura
^ Sin.: ”fagölö mbotoma mboto ndra talifusöma”.
^ Mazui ”bunga”.
^ Sin.: ”zi 1/100”. Eluahania 1 persen nono gefe ero sara waŵa.
^ Mazui ”Yasimanö zalua!”
