Nehemia 6:1-19
6 Me irongo Sanabala, Tobia,+ Gesemi niha Garabi+ hegöi uduma tanö böʼö wa no ufuli ufazökhi göli andrö+ irege lö molala ira saʼae hewaʼae lö nifasagu bawa gölinia,+
2 lafaʼoheʼö goroisa andre khögu ira Sanabala hegöi Gesemi, ”Aine, datafatunö hawaʼara falukha ita ba mbanua si so ba Ndraso Gono.”+ Sindruhunia, daʼa dandrawa wamaʼala yaʼo.
3 Andrö ufatenge niha ba wamaʼema oroisagu, ”So halöwö sebua nifaluagu. Tebai möido, tola manö tebato halöwö daʼa na uröi.”
4 No öfa kali lafakaoniʼö ndraʼo ba fagölö wameʼegu fanema li.
5 Ifatenge khögu nono buania Sanabala, no lima kali ia ba daʼö ba wamaʼema oroisa si fagölö. Iʼohe zura si lö mufotandro.
6 Ösinia, ”No tehöngö ba soi misa, ba iwaʼö göi Gesemi+ wa no öʼera-era wamadaö khö razo, simanö göi niha Yahudi.+ Daʼö mbörö wa öfazökhi göli andrö. Moloʼö si no marongo, yaʼugö dania zi tobali razora.
7 No öfataro ndra samaʼeleʼö sangombakha yaʼugö ba zi sagörö Yeruzalema, ’So razo ba Yehuda!’ Iadaʼa, maʼombakhaʼö ndraʼugö khö Razo. Aine, datafatunö daʼa.”
8 Ufuli ubeʼe khönia wanema li. Ösinia, ”Fefu niwaʼömö andrö oi fasala. Ha fangera-ngeramö samösa daʼö.”*
9 Lafetaʼu ndraʼaga me lamane, ”Atage ira, ba lö awai halöwöra andrö.”+ Aefa daʼö mangandrö ndraʼo, ”Abeʼeʼö dangagu.”+
10 Lö ara, möido ba nomo Zemaya ono Delaya ono Mehetabeʼeli, me tebai möi ia baero moroi ba nomonia andrö. Imane, ”Datafatunö hawaʼara falukha ita ba nomo Lowalangi sindruhu, bakha ba gosali. Taduhö fefu mbawandruhö gosali börö me tohare ira wamunu yaʼugö. Ba zi bongi tohare ira ba wamunu yaʼugö.”
11 Umane khöra, ”Hewisa wa tola moloi zimane yaʼodo andre? Hadia tola möido bakha ba gosali ba lö matedo?+ Lö möido!”
12 Aboto ba dödögu wa tenga Lowalangi zamatenge yaʼia. Wa tola ifaʼeleʼö zimane daʼö sanandrösa khögu börö me lasölö ia ira Tobia ba Sanabala.+
13 Lasölö ia ba wametaʼu yaʼo enaʼö ufalua horö ba enaʼö teʼobousi döigu ba laʼoʼaya ndraʼo.
14 Mangandrö ndraʼo, ”He Lowalangigu, törö tödöu Dobia+ faoma Sanabala awö nifaluara andre, simanö göi ndra alawe samaʼeleʼö sotöi Noadia hegöi samaʼeleʼö tanö böʼö si lö aetu-aetu mametaʼu yaʼo.”
15 Awai göli andrö ba ngaluo si 25 ba mbaŵa Eluli,* ba zi 52 hari.
16 Me larongo si faʼudu khöma ba me anehe fefu soi ba zi fasui yaʼaga, aila sibai ira+ ba aboto ba dödöra wa Lowalangi zanolo yaʼaga irege tola awai halöwö daʼa.
17 Me luo daʼö, Tobia faoma tuhenöri+ ba Yehuda asese lafaʼoheʼö zura khö nawöra.
18 Ato niha ba Yehuda si no fahölu ba wanolo yaʼia, börö me umönö Zekhania ono Garabi ia.+ Ba ono Dobia sotöi Yohanano, ihalö nono Mesula+ ono Mberekhia.
19 Lö aetu lafadunö-dunö khögu zi sökhi nifaluania ba lafatunö khönia hadia wehedegu. Ifaʼoheʼö zura Tobia ba wametaʼu yaʼo.+
