Nehemia 8:1-18
8 Owulo fefu nono mbanua ba golayama föna Mbawa Göli Nidanö,+ ba laʼandrö khö Gesera+ sonekhe manura andrö enaʼö iʼohe mbuku Goroisa Moze+ nibeʼe Yehowa ba ndraono Gizaraʼeli.+
2 Börö daʼö, ba ngaluo si oföna ba mbaŵa si fitu,+ iʼohe Goroisa Moze andrö Esera si no tobali ere föna nono mbanua sato,+ yaʼia daʼö föna ndra matua, ira alawe hegöi fefu zamondrongo ba sangila eluaha.
3 Ibaso daʼö+ ba golayama föna Mbawa Göli Nidanö iʼotarai sihulö wongi irugi zi laluo khö ndra matua, ira alawe, hegöi fefu niha sangila eluaha. Lahaogö wamondrondrongo+ me labaso Goroisa Moze andrö.
4 Mosindro Gesera sonekhe manura andrö ba hare-hare eu si no lafazökhi ba gowuloa daʼö. Sozizio ba gambölönia yaʼia daʼö Matitia, Sema, Anaya, Uria, Hilikia ba Maʼaseya. Ba gaberania yaʼia daʼö Fedaya, Mizaeli, Malakhia,+ Hasumi, Hasibadana, Zakharia ba Mesula.
5 Ibokai mbuku andrö Esera föna niha sato börö me alawa nahania wezizio moroi ba danö böʼö. Mosindro fefu niha me ibokai
6 ba isuno Yehowa, Lowalangi sindruhu ba solakhömi irege lamane niha sato, ”Yaduhu!* Yaduhu!”+ ba lafazawa dangara. Aefa daʼö, latuhi danö föna Yehowa.
7 Yesua, Bani, Serebia,+ Yamini, Akubi, Sabataʼi, Hodia, Maʼaseya, Kelita, Asaria, Yosabada,+ Hanani, ba Felaya yaʼia daʼö niha Lewi, yaʼira zanutunö Oroisa Moze andrö ba niha sato+ sozizio.
8 Lö laböhöli wombaso buku Goroisa Lowalangi sindruhu. Lahaogö wanutunö ba laʼombakhaʼö geluahania. Simane daʼö wanolora niha sato enaʼö aboto ba dödöra nibaso andrö.+
9 Meʼe fefu niha me larongo Goroisa Moze. Me luo daʼö, Nehemia zi tobali gubernur*, Esera+ zi tobali ere ba sonekhe manura hegöi niha Lewi samahaʼö niha mbanua, lamane, ”Maʼökhö andre luo niʼamoniʼö khö Lowalangimi Yehowa.+ Böi miʼeʼe mazui miʼabusi tödö.”
10 Imane khöra Nehemia, ”Miʼofanö, miʼa zi sökhi* ba mibadu zami, mibagi gö+ ba niha si tosasa. Maʼökhö andre luo niʼamoniʼö khö Lowalangida. Böi mibusi dödömi, börö me fangabeʼeda* waʼomuso dödö moroi khö Yehowa.”
11 Larara dödö niha sato ira niha Lewi ba lamane, ”Mihonogö ami! Böi miʼabusi tödö, börö me ngaluo niʼamoniʼö maʼökhö.”
12 Börö daʼö, mofanö fefu niha möi ira manga ba mamadu, ba labagi gö. Lö aetu waʼomuso dödöra+ börö me laʼila geluaha ngawua wehede nifaʼema khöra.+
13 Ba ngaluo si dua, ira sondröniaʼö ba nösi nomo zatua ira matua ba soi daʼö, ira ere hegöi niha Lewi, owulo ira lafasui Gesera sonekhe manura andrö enaʼö lasöndra waʼaboto ba dödö nasa sanandrösa ba Goroisa Moze.
14 Lö ara, lasöndra ngawua wehede si no tesura ba Goroisa Yehowa nifaʼemania khö Moze, wa lö tola löʼö toröi ndraono Gizaraʼeli ba nose-ose* sagötö wamalua owasa ba mbaŵa si fitu,+
15 ba lö tola löʼö laʼombakhaʼö+ ba mbanuara fefu hegöi ba zi sagörö Yeruzalema, ”Miʼaeʼe ba mbanua si so ba hili ba miʼohe ndraha zaitu sobulu, simanö göi ndraha naruʼu, daha mirtel, daha geu khorema awö ndraha geu sobulu tanö böʼö si tola tobali ose-ose, simane si no tesura.”
16 Mofanö fefu soi andrö ba laʼohe daʼö ba wamazökhi ose-ose ba dete zagö hegöi ba golayamara zamösana, ba golayama nomo Lowalangi sindruhu,+ ba golayama Mbawa Göli Nidanö,+ ba golayama Mbawa Göli Geferai.+
17 Fefu nono mbanua si no mangawuli ba wangosawuyu andrö, lafazökhi nose-ose ba toröi ira ba daʼö. Omuso sibai dödöra+ fefu börö me lö irai lafalua iraono Gizaraʼeli zimane daʼö iʼotarai me götö Yosua+ ono Nuni.
18 Ero maʼökhö labaso mbuku Goroisa Lowalangi sindruhu,+ iʼotarai ngaluo siföföna irugi ngaluo safuria. Lafalua gowasa andrö fitu hari waʼara. Ba ngaluo si walu, lafalua gowasa si tohude moloʼö si no mutatugöi.+
Nisura ba gahe zura
^ Mazui ”Yasimanö zalua!”
^ Mazui ”Tirisata”, faka gubernur ba zi sambua provinsi ba li Weresia.
^ Mazui ”miʼa zatabö”.
^ Mazui ”faʼabölöda”.
^ Mazui ”ba nahia waʼatoröi ba zi sabata”.
