Nehemia 9:1-38
9 Ba ngaluo si 24 ba mbaŵa daʼö, owulo ndraono Gizaraʼeli. Fuasö ira ba lafake nukha goni ba lalau nawu ba högöra.+
2 No lafabali ira fefu moroi ba soi böʼö,+ aefa daʼö mozizio ira ba wangombakha horöra hegöi horö ndra tuara.+
3 Mozizio ira ba nahara ba labaso mbuku Goroisa+ Lowalangi Yehowa tölu za waʼara.* Aefa daʼö, laʼombakhaʼö horöra ba latuhi danö föna Lowalangira Yehowa tölu za waʼara.
4 Ba mozizio Yesua, Bani, Kadimieli, Sebania, Buni, Serebia,+ Bani hegöi Khenani ba hare-hare eu+ khö ndra niha Lewi, ba ebua lira weʼao khö Lowalangira Yehowa.
5 Lamane ira niha Lewi, yaʼia daʼö Yesua, Kadimieli, Bani, Hasabeneya, Serebia, Hodia, Sebania hegöi Fetaya, ”Miʼosindro ba misuno Lowalangimi Yehowa irugi zi lö aetu.*+ He Lowalangi, yalasuno döimö solakhömi börö me sinangea ötema zumange ba fanuno.
6 ”Ha yaʼugö Yehowa.+ Yaʼugö zamazökhi banua si yawa, banua fondrege zalawa awö nösinia maʼafefu,* ulidanö hegöi ösinia, ba asi awö nösinia. Örorogö ira fefu enaʼö teʼorifi ba mangalulu khöu ndra malaʼika* si so ba mbanua si yawa.
7 Yaʼugö Yehowa, Lowalangi sindruhu si no mamili Aberamo+ ba sangeheta yaʼia ba danö Guri,+ banua niha Galedaia, ba öfotöi ia Aberahamo.+
8 Öʼila wa lö faröi dödönia khöu+ irege öfabuʼu wa öbeʼe khönia soi niha Ganaʼana, niha Kheti, niha Gamori, niha Weresi, niha Yebusi, niha Girigasi, si tobali okhöta maʼuwunia,+ ba öfalua zi no öfabuʼu börö me hasambalö satulö nifaluamö.
9 ”No anehe ndraʼugö wamakao nitaögö ndra tuama ba danö Miserai,+ ba no örongo weʼaora ba Nasi Soyo.
10 Aefa daʼö, öforomaʼö dandra awö zahöli-höli dödö ba wolawa Faraʼo, fefu genoninia, awö nono mbanuania,+ börö me öʼila lafalua zomasi-masi dödöra+ khö ndra tuama. Yaʼugö mbörö wa teturia döimö irugi maʼökhö.+
11 Yaʼugö zamabali asi fönara irege laʼötö nasi ba dete danö sabeʼe,+ ba ahöndrö fefu zolohi yaʼira simane kara nifazaumba ba nasi sobade.+
12 Ba zi maʼökhö, ödöniaʼö ira faoma töla lawuo. Na ba zi bongi, ödöniaʼö ira faoma töla galitö enaʼö mohaga lalara.+
13 Möiʼö tou moroi ba Hili Zinaʼi+ ba fahuhuo ndraʼugö khöra moroi ba zorugo,+ aefa daʼö öbeʼe khöra huku satulö, oroisa si tola laʼodaligö,* ba amakhoita hegöi fareta si sökhi.+
14 Öfatunö khöra luo Sabato+ andrö khöu niʼamoniʼö, ba öbeʼe khöra goroisa, amakhoita hegöi huku nifaʼemamö khö genoniu Moze.
15 Me olofo ira öbeʼe öra roti moroi ba zorugo,+ ba me owökhi dödöra, öʼasogö nidanö moroi ba hili sokara.+ Öwaʼö khöra enaʼö lasawa ba larabu danö si no öfabuʼu, si möiʼö ba hölu khöra.
16 ”Hizaʼi, lafalua zomasi-masi dödöra ira tuama+ ba agabeʼe högö.*+ Lö omasi ira lafondrondrongo faretamö.
17 Lö lafondrondrongo+ ba lö latörö tödöra fefu dandra sahöli-höli dödö nifaluamö khöra. Agabeʼe högöra* ba latuyu samösa zondröniaʼö solohe yaʼira mangawuli ba danö Miserai+ enaʼö teʼosawuyu. Hizaʼi, yaʼugö Lowalangi somasi mangefaʼö sala, sebua tödö,* sahakhö tödö, lö alio mofönu ba fahöna khöu waʼomasi si lö faröi*+ irege lö öröi ira.+
18 Lafazökhi nadu nifazökhi moroi ba loga* famaedo nono zawi ba lamane, ’Daʼa Lowalangimi sangefaʼö yaʼami moroi ba danö Miserai,’+ ba sindruhu-ndruhu lö lafosumange ndraʼugö.
19 Hizaʼi, lö si faröi ndraʼugö khöra ba danö si mate+ börö me ebua waʼahakhö dödöu. Ba zi maʼökhö, lö tebulö idöniaʼö ira töla lawuo. Na ba zi bongi, ihagaini lalara töla galitö.+
20 Öbeʼe gehehau niʼamoniʼö enaʼö so khöra waʼaboto ba dödö.+ Lö aetu öbeʼe öra mana+ ba öbeʼe öra nidanö me owökhi dödöra.+
21 No örorogö ira ba danö si mate sagötö zi 40 fakhe.+ Lö hadöi soʼamböta ira. Lö tekiko nukhara+ ba lö sabao gahera.
22 ”No öbeʼe khöra gamatöröwa niha hegöi soi böʼö, ba öbagi khöra daʼö ero samösa+ irege laʼokhögö danö Zihona+ razo Hesibona+ hegöi tanö Ogi+ razo Mbazana.
23 Ba no oya ngaʼötöra simane döfi ba mbanua si yawa+ ba öʼohe ira ba mbanua nifabuʼumö khö ndra tuara enaʼö laʼokhögö.+
24 Tohare ndraonora ba larabu danö andrö.+ Ökalaisi niha Ganaʼana+ fönara si toröi ba daʼö. Ötouʼö ba dangara razo hegöi ono mbanua soi andrö ba tola lafalua zomasi dödöra khö ndra niha daʼö.
25 Larabu göi mbanua si no mukölini+ ba tanö satabö sinanö,*+ simanö göi nomo safönu gama-gama si sökhi, baʼa nidanö si no mukhao, kabu nagu, kabu zaitu,+ awö ngawalö mbua zinanö. Abuso ira wemanga ba ohahau dödöra.* Larasoi howu-howu ba waʼafahöna waʼasökhi dödöu.
26 ”Hizaʼi, lö moloʼö ira, lalawa ndraʼugö, ba laʼerogö goroisamö.+ Labunu zamaʼeleʼö khöu ba sindruhu-ndruhu lö lafosumange ndraʼugö.+
27 Daʼö mbörö wa ölulu ira ba danga zi faʼudu khöra,+ samakao yaʼira.+ Hizaʼi, muʼao ira khöu na göna ira famakao ba öfondrondrongo moroi ba zorugo. Börö me ebua waʼahakhö dödöu, öfatenge zangorifi yaʼira enaʼö teʼefaʼö moroi ba danga nudu.+
28 ”Hizaʼi, lö ara me no teʼefaʼö ira, lafuli lafalua zi lö sökhi fönau,+ ba ötehegö enaʼö so ira barö danga nudura, samatörö yaʼira.+ Ba iʼanemaiʼö lafuli ira zui khöu ba wangandrö fanolo,+ ba öfondrondrongo moroi ba zorugo, öfuli zui öʼefaʼö ira ba zi hauga kali börö me ebua waʼahakhö dödöu.+
29 Hewaʼae öfangelama ira enaʼö lafuli laʼoʼö goroisamö, lafalua zomasi-masi dödöra ba lö lafalua faretamö.+ Lasawö gamakhoitamö, sindruhunia sa lö tebulö auri niha na laʼoʼö daʼö.+ Laʼosiwawöi manö fefu daʼö, agabeʼe högöra* ba lö omasi ira lafondrondrongo.
30 Ebolo dödöu khöra ba zi hauga fakhe faʼara.+ Öʼogunaʼö gehehau niʼamoniʼö ba öfatenge ndra samaʼeleʼö khöu ba wamangelama yaʼira, hizaʼi lö lafondrondrongo. Ba gafuriatania, ölulu ira ba danga soi daʼö.+
31 Hizaʼi, börö me ebua waʼahakhö dödöu, lö öhori ba lö öröi ira,+ börö me yaʼugö Lowalangi sebua tödö* ba sahakhö tödö.+
32 ”Iadaʼa, yaʼugö Lowalangima, Lowalangi sabölö, sebua kuaso, sahöli-höli dödö, si no mamalua buʼusa li ba sangoromaʼö faʼomasi si lö faröi,+ böi osilöʼögö fefu gabula dödö salua khöma, khö ndra razo-razoma, sondröniaʼö yaʼaga,+ ira ere,+ samaʼeleʼö,+ ira tuama, ba fefu nono mbanuamö iʼotarai ba götö razo-razo Asiria+ ofeta maʼökhö.
33 Lö tebulö wa satulö ndraʼugö hewaʼae mataögö daʼa fefu, börö me lö faröi ndraʼugö. Hizaʼi, yaʼaga zamalua si lö sökhi.+
34 Lö lafalua Goroisamö ira razo-razoma, sondröniaʼö yaʼaga, ira ere hegöi ira tuama, lö labeʼe dödöra faretamö mazui famasugi ba dödö* si no öfaʼema khöra ba wamangelama yaʼira.
35 Hewaʼae auri ira barö wamatörömö ba larasoi waʼafahöna howu-howu ba danö sebolo ba satabö sinanö* si no öbeʼe khöra, lö lafosumange ndraʼugö+ ba lö laböhöli wamalua si lö sökhi.
36 Tobali sawuyu ndraʼaga iadaʼa. Teʼosawuyu ndraʼaga+ ba soi daʼa si no öbeʼe khö ndra tuama enaʼö lasöndra mbua moroi ba ngawalö zi sökhi.
37 Bua si no fahöna andrö ba no tobali okhöta razo-razo samatörö yaʼaga börö me no mafalua horö.+ Lafatörö ndraʼaga hegöi uriföma ba zomasi dödöra. Sindruhu-ndruhu wa tefakao ndraʼaga.
38 ”Börö daʼö, mafazökhi zura fawuʼusa li saro,+ nifaduhuʼö ba nifotandro ndra sondröniaʼö yaʼaga, niha Lewi awö ndra ere khöma.”+
Nisura ba gahe zura
^ Sin.: ”sambua niʼoʼöfa zi maʼö-maʼökhö”.
^ Mazui ”götö-götö waʼara”.
^ Sin.: ”awö zaradadunia maʼafefu”.
^ Tola göi manandrösa daʼa ba ngawalö zi so ba mbanua si yawa, simane döfi.
^ Mazui ”oroisa sindruhu”.
^ Sin.: ”agabeʼe mbörö tuʼi”.
^ Mazui ”fahöna khöu waʼasökhi dödö safönu faʼomasi”.
^ Mazui ”soböwö”.
^ Sin.: ”Agabeʼe mbörö tuʼira”.
^ Mazui ”nadu nifahele”.
^ Sin.: ”ba esolo ira”.
^ Mazui ”si kayo”.
^ Mazui ”agabeʼe mbörö tuʼira”.
^ Mazui ”soböwö”.
^ Mazui ”famangelama”.
^ Mazui ”si kayo”.
