Ngenu-Ngenu Yeremia 4:1-22
א [Alef]
4 No ahoe Ganaʼa si takile, simanö göi ganaʼa si sökhi!+
Kara moroi ba nahia niʼamoniʼö,+ ahori muzawili ba lala!+
ב [Bet]
2 Ono matua Ziona nifozu-fozumange si hulö ganaʼa nifatörö ba galitö me mböröta,No tobali bowoa tanö nifazökhi moroi ba dambu laʼuri,Nifazökhi duka samöbözi tambu laʼuri!
ג [Gimel]
3 Asu gatua manö ifaenu nononia,Hizaʼi ono alawe ba soigu, no tobali niha samuʼi+ simane fofo ondra ba danö si mate.+
ד [Dalet]
4 Owökhi dödö nono sawuyu khöra irege fakitö lelara ba gararora.
Mangandrö-ngandrö roti ndraonora,+ hizaʼi lö sameʼe khöra.+
ה [He]
5 Niha si toʼölö manga gö sami-ami ba oi zara tegaölö ira ba lala börö waʼolofo.+
Niha si toʼölö mamake nukha sebua böli* iʼotarai me ide-ide, iadaʼa iföröni gawu-gawu.+
ו [Waw]
6 Abölö ebua wanguhuku si göna ba* nono alawe soigu moroi ba wanguhuku si göna Sodoma börö horönia,+Nidudugö ba zi lö arara ba lö hadöi sanolo yaʼira.+
ז [Zayin]
7 Niha Naziri khönia+ me mböröta abölö ohahau moroi ba esi, afusi moroi ba susu.
Abölö oyo ira moroi ba gara sebua böli moroi ba nasi.* Hulö gara safiro si takile ira me mböröta.
ח [Het]
8 Iadaʼa, abölö aitö ira moroi ba nakho.*
Lö laʼila ira ba lala.
Ahori tekörö gulira ba dölara+ simane eu soköli.
ט [Tet]
9 Sökhi zi mate ba mbawa wöda moroi na mate ba waʼolofo.+
Itugu alö waʼabölöra ba mate ira ba waʼambö gö.
י [Yod]
10 Ira alawe sangomasiʼö ononia me mböröta, iadaʼa larino öra nonora.+
Tobali balazora ndraonora sagötö faʼadudu soigu andrö.+
כ [Kaf]
11 No ifalua wönunia Yehowa.
Iduwagö wönunia si hola-hola.+
Ifohola galitö ba Ziona irege ahori akhozi wondrasinia.+
ל [Lamed]
12 Lö faduhu dödö ndra razo hegöi sowanua ba gulidanöWa möi dania bakha nudu ba mbawa göli Yeruzalema.+
מ [Mem]
13 Wa alua daʼö fefu börö horö ndra samaʼeleʼö hegöi sala nifalua ndra ere,+Sanuwagö do niha satulö ba daʼö.+
נ [Nun]
14 Lö manö tatu döröwara misa hulö niha sauʼa.+
Raʼiö ira börö ndro,+Irege lö hadöi somasi mombambaya nukhara.
ס [Samekh]
15 Muʼao khöra niha, ”Miʼofanö! No raʼiö ami! Miʼofanö! Miʼofanö! Böi mibabaya ndraʼaga!”
Lö hadöi saʼae omora ba laʼanöröi danö.
Lamane soi böʼö, ”Tebai toröi ira* khöda ba daʼa.+
פ [Pe]
16 No ifazawili ira Yehowa.+
Lö saʼae omuso dödönia khöra.
Lö saʼae lafosumange ndra ere+ ba lö lahakhösi tödö ndra sondröniaʼö.”+
ע [Ayin]
17 Iadaʼa manö, no saʼae atage höröma ba wombaloi fanolo si lö iʼila tohare.+
Maʼalui ba maʼandrö wanolo moroi ba soi si tebai mangefaʼö yaʼaga.+
צ [Tsade]
18 Lö laböhöli wolohi yaʼaga+ irege tebai matörö golayama khöma.
Lö ara tö ba mate ndraʼaga. No irugi inötö khöma ba no irugi inötö waʼamatema.
ק [Qof]
19 Abölö alio zolohi yaʼaga moroi ba moyo ba dalu mbanua.+
Lagohi ndraʼaga ba hili ba lafaʼuʼu* ndraʼaga ba danö si mate.
ר [Res]
20 Mamane ba niha nibayoini Yehowa,+ ”Börö wolumöʼö moroi khönia wa toröi ndraʼaga ba gotalua soi böʼö.”+ Yaʼia hanu-hanu fangorifi khöma.
Hizaʼi no alösu ia ba dögi sebua nikhaora.
ש [Sin]
21 Miʼowua-wuaʼö dödömi ba miʼomusoiʼö dödömi, yaʼami ono alawe Gedomo+ si toröi ba danö Usi.
Hizaʼi, tebeʼe göi dania khöu mako andre,+ ba mabu ndraʼugö irege öheta nukhamö.+
ת [Taw]
22 He ono alawe Ziona, no awai saʼae wanguhuku si göna yaʼugö börö zalamö.
Lö saʼae itehegö laʼoloiʼö ndraʼugö.+
Hizaʼi yaʼugö ono alawe Gedomo, ifaigi-faigi zalamö.
Lö ibiniʼö dania horö nifaluamö.+
Nisura ba gahe zura
^ Sin.: ”nukha sabölö oyo”.
^ Sin.: ”golalöwa”.
^ Eluahania koral.
^ Sin.: ”zogömi-gömi”.
^ Mazui ”Tebai toröi ira tobali niha si fatewu”.
^ Mazui ”latarogö”.
