Ngenu-Ngenu Yeremia 5:1-22
5 He Yehowa, törö tödöu zalua khöma.
Faigi ba nehegö wangoʼaya si göna khöma.+
2 No tebeʼe ba niha böʼö gondröitama ba no lahalö nomoma ira niha baero.+
3 Tobali ndraʼaga iraono si lö ama. Hulö lakha mbanua ninama.+
4 Mabuʼa mböli göma idanö+ hegöi eu moroi ba kabuma samösa.
5 Moroi furima so zolohi yaʼaga.
Marase sibai ndraʼaga, ba lö masöndra wolombase.+
6 No maʼodaligö Miserai+ faoma Asiria+ enaʼö tobönö göma roti si tobali balazoma.
7 Lö hadöi saʼae ira tuama si no mamalua horö, hizaʼi yaʼaga zoluʼi horö nifaluara.
8 Iadaʼa, sawuyu zamatörö yaʼaga. Lö hadöi sangefaʼö yaʼaga moroi ba dangara.
9 Matehegö nosoma asala masöndra göma,+ börö me so niha solohe föda ba danö si mate.
10 Börö waʼolofo, andrö wa aukhu gulima simane faʼaukhu ganuhi.+
11 Laʼailasi* woʼomoma ira alawe ba Ziona hegöi iraono alawe ba mbanua Yehuda.+
12 Laböbö danga ndra sohalöwö,+ aefa daʼö lafanawa-nawa. Lö lafosumange ndra sondröniaʼö.+
13 Lafazawa gara wogili ira si bohou ebua, ba alabu ndraono matua börö waʼabua geu nifikura.
14 Lö saʼae niha satua ba mbawa göli.+ Lö saʼae lafoli wakake zinunö ira si bohou ebua.+
15 Lö hadöi saʼae khöma faʼowua-wua dödö. Fanarima tobali fangabu dödö.+
16 No aekhu tou dakula moroi ba högöma. Alai ndraʼaga, börö me no mafalua horö!
17 Daʼö mbörö wa afökhö dödöma,+Ba daʼö mbörö wa balunö höröma.+
18 Iadaʼa no muröi Hili Ziona.+ Tobali naha nasu gatua* daʼö.
19 Hizaʼi yaʼugö Yehowa, mamatörö ndraʼugö sagötö faʼara.
Lö tebulö dadaomamö götö-götö waʼara.+
20 Hana wa öʼolifugö ba öröi manö ndraʼaga ba waʼara?+
21 He Yehowa, fuli ohe ndraʼaga khöu ba omasiga mangawuli.+
Yaʼifuli alua zimane me mböröta.+
22 Hizaʼi, no öʼosindruhugö wanimbagö yaʼaga.
Lö tebulö waʼebua wönumö khöma.+
