Ba Mbanua Niha Keriso ba Roma 1:1-32
1 Sura moroi khö Waulo, sawuyu Keriso Yesu nikaoni tobali sinenge, nituyu ba wangombakha turia somuso dödö moroi khö Lowalangi,+
2 nifabuʼunia khö ndra samaʼeleʼö ba Mbuku Niʼamoniʼö,
3 yaʼia daʼö sanandrösa ba waʼatumbu Nononia tobali niha moroi ba maʼuwu Dawido,+
4 si no tefaduhuʼö tobali Ono Lowalangi+ me tesusugi ia ba gotalua zi mate+ börö waʼabölö geheha niʼamoniʼö. Yaʼia Zoʼaya yaʼita Yesu Keriso.
5 Börö ia wa matema waʼasökhi dödö sebua* ba tobali ndraʼaga sinenge,+ enaʼö tola mamati fefu soi+ ba laʼataʼufi ia ba wamolakhömi töinia.
6 Moroi ba gotalua soi andrö tekaoni ami enaʼö tobali tana khö Yesu Keriso.
7 Sura daʼa mufanandrösa ba niha niʼomasiʼö Lowalangi ba Roma, nikaoni tobali niha niʼamoniʼö:
Yamitema waʼasökhi dödö sebua* ba faʼohahau dödö moroi khö Lowalangi, Amada, ba moroi khö Zoʼaya yaʼita Yesu Keriso.
8 Si oföna, uʼandrö saohagölö khö Lowalangi ba döi Yesu Keriso ba khömi fefu, börö me ladunö-dunö wamatimi ba zi sagörö ulidanö.
9 Lowalangi andrö zamaduhuʼö wa lö uböhöli wangandrö salahimi, me khönia ufalua halöwö niʼamoniʼö soroi ba dödö ba uturiaigö duria si sökhi sanandrösa khö Nononia.+
10 Uʼandrö enaʼö tola ufalukhaisi ami na daʼö nitehegö Lowalangi.
11 Omasido sibai falukha khömi enaʼö tola ubeʼe khömi mbuala moroi khö Lowalangi ba wangaʼaroʼö yaʼami.
12 Eluahania, enaʼö tola tafarou dödö nawöda zamösana.+ Tefarou dödögu ba wamatimi, ba tefarou dödömi ba wamatigu.
13 Yaʼami ira talifusö, omasido na miʼila wa no hauga kali uforege wangondrasi yaʼami, hewaʼae na oya zi tobali taha-taha, börö me omasido na utema mbua halöwögu ba gotaluami simane halöwö nifaluagu ba soi böʼö misa.
14 Moʼömö ndraʼo ba niha Yunani hegöi ba niha baero,* ba niha si no mufahaʼö hegöi si löʼö.
15 Andrö omasido sibai ufatunö khömi duria somuso dödö ba Roma.+
16 Lö aila ndraʼo ba duria somuso dödö andrö,+ börö me daʼö dandra waʼabölö Lowalangi ba wangorifi fefu niha samati,+ si oföna ba niha Yahudi,+ aefa daʼö ba niha Yunani.+
17 Börö duria andrö tola mamati niha ba laʼila waʼatulö Lowalangi irege monönö wamatira+ simane ayati sangumaʼö, ”Börö wamati wa teʼorifi niha samalua satulö.”+
18 Moroi ba zorugo iforomaʼö wönunia Lowalangi+ ba niha si lö atulö, si lö moloʼö hegöi samalua horö ba wamuyuʼö sindruhu.+
19 Sindruhunia, no aboto ba dödöra sanandrösa khö Lowalangi, börö me no ifaʼeleʼö khöra dandra.+
20 Hewaʼae lö oroma Lowalangi, tola laʼila hewisa ia sindruhunia moroi ba niwöwöinia+ iʼotarai me tefazökhi gulidanö. Ba daʼö oroma waʼabölönia si lö tebulö+ hegöi faʼalowalanginia,+ börö me tola aboto ba dödöra nifazökhinia. Tobali, tebai fabuʼa ira.
21 Hewaʼae aboto ba dödöra Lowalangi, lö lafolakhömi ia mazui laʼandrö khönia saohagölö. Lö eluaha wangera-ngerara ba no abeʼe dödöra, no ogömi-gömi.+
22 Hewaʼae atua-tua ira lawaʼö, sindruhunia sa bodo.
23 Lö lafolakhömi Lowalangi si lö tebulö, hizaʼi lafolakhömi nadu famaedo niha si tola mate, simanö göi nadu famaedo wofo, urifö si öfa ahe, ba urifö sanana-nana ba danö.+
24 Andrö wa ilulu ira Lowalangi ba wamalua ngawalö zi raʼiö moloʼö somasi dödöra, irege teʼoʼaya mbotora.
25 Lafalalini zindruhu sanandrösa khö Lowalangi faoma faya. Lafosumange ba lafalua halöwö niʼamoniʼö ba gomböila dangania, sindruhunia sa ha Somböi zinangea tefolakhömi sagötö faʼara. Yaduhu.
26 Andrö wa ilulu ira Lowalangi ba wamalua amuata wohorö si möi fangaila.+ Lafalua wohorö si lö toʼölö ira alawe,+
27 ba lö lafalua waʼorudu ira matua khö ndra alawe ba zinangeania, hizaʼi mohorö ira khö nawöra ira matua.+ Raʼiö fefu gamuatara irege latema wanguhuku* si fagölö ba zala nifaluara.+
28 Börö me lö lafaduhuʼö wa so Lowalangi,* andrö itehegö tekiko wangera-ngerara irege lafalua gamuata si möi fangaila.+
29 Afönu gera-erara si lö atulö,+ faʼafaito, fakhögusa,*+ ba faʼalösökhi. Omasi ira waʼafökhö dödö,+ mamunu niha,+ fakara, falimo,+ lafatou-tou zi lö sökhi,+ lafatou-tou nawöra,
30 mangobousi niha,+ fatuwu khöra Lowalangi, lö mangila wetahögö, asiliyawa, fayawa, laʼera-era zi lö sökhi, lalawa zatuara,+
31 lö faʼaboto ba dödö,+ lasawö mbuʼusa lira, lö faʼomasi ba lö faʼahakhö dödö.
32 Sindruhunia, laʼila wa moloʼö oroisa Lowalangi satulö, sinangea na mate niha si lö mamöhöli wamalua daʼö,+ hizaʼi lö labato ba fao dödöra ba niha si lö mamöhöli wamalua amuata daʼö.
Nisura ba gahe zura
^ Faigi Geluaha Ngawua Wehede.
^ Faigi Geluaha Ngawua Wehede.
^ Mazui ”ba zi tenga niha Yunani”. Sin.: ”Barabaro”.
^ Mazui ”latema zulö”.
^ Mazui ”lö omasi ira laʼalui waʼaboto ba dödö si tefaudu sanandrösa khö Lowalangi”.
^ Mazui ”fangisö okhöta niha böʼö”.
