Ba Mbanua Niha Keriso ba Roma 14:1-23
14 Mitema niha sambö aro ba wamati,+ ba böi mihuku ia na faböʼö mbua gera-erania.*
2 Tola iʼa gofu hadia ia si samösa niha na itehegö daʼö famatinia, hizaʼi sambö aro famati ha sayu niʼania.
3 Niha si manga tebai iʼosiwawöi niha si lö manga, ba niha si lö manga tebai ihuku niha si manga+ börö me no itema niha daʼö Lowalangi.
4 Haniha ami irege mihuku genoni niha böʼö?+ Sokhö yaʼia zangai angetula hadia atulö ia mazui löʼö.+ Börö wanolo Yehowa* wa tola atulö ia.
5 So zangumaʼö abölö sökhi ngaluo daʼa moroi ba ngaluo tanö böʼö,+ ba so zangumaʼö wa fagölö manö ngaluo andrö.+ Dozi niha enaʼö sindruhu-ndruhu faduhu dödöra ba gangetula nihalöra.
6 Niha samaehusi ngaluo, ifalua daʼö ba wamolakhömi Yehowa.* Niha si manga, ifalua daʼö ba wamolakhömi Yehowa* börö me iʼandrö saohagölö khö Lowalangi.+ Niha si lö manga, ifalua daʼö ba wamolakhömi Yehowa* börö me iʼandrö saohagölö khö Lowalangi.+
7 Sindruhunia, lö hadöi ba gotaluada zauri ba khönia samösa+ mazui mate ba khönia samösa.
8 Na auri ita, khö Yehowa* waʼaurida.+ Na mate ita, khö Yehowa* waʼamateda. Tobali, he auri he mate, khö Yehowa* ita.+
9 Daʼö mbörö wa mate Keriso ba ifuli tesusugi ia, enaʼö tobali ia Soʼaya ba niha si no mate hegöi ba niha sauri.+
10 Na simanö, hana wa mihuku dalifusömi?+ Hana wa miʼosiwawöi ira? Dozi ita dania, mosindro föna gurusi wanguhuku andrö khö Lowalangi.+
11 So ba zura, ”Imane Yehowa,* ’Faya wa no sauri ndraʼo+ na lö fefu niha latuhi danö fönagu ba lafaduhuʼö wa yaʼodo Lowalangi.’”+
12 Börö daʼö, tezofu-zofu dania khöda zamösana, yaʼita zanema li föna Lowalangi.+
13 Andrö, databöhöli wanguhuku awöda.+ Böi tafobörö wangala mazui gofu hadia ia si möi fangawuwu wamati ndra talifusöda.+
14 Yaʼodo soloʼö khö Zoʼaya Yesu, faduhu dödögu ba uʼila wa sindruhunia lö hadöi si raʼiö.+ Raʼiö daʼö ba wamaigi zi samösa niha na iwaʼö raʼiö.
15 Na tobali fangala khö dalifusömi gö niʼami, tenga saʼae faʼomasi nifaluami.+ Böi mifakiko wamatinia ha börö gömi, me no mate Keriso salahinia.+
16 Tobali, böi ha börö gamuatami si sökhi labaliʼö si lö sökhi ami niha.
17 Ba weʼamöi ba Wamatörö Lowalangi, sabölö moguna tenga femanga mazui famadu,+ hizaʼi famalua si sökhi, faʼatulö dödö, ba faʼomuso dödö börö geheha niʼamoniʼö.
18 Niha simane daʼö ba sangai halöwö khö Keriso tobali sawuyu, daʼö zomasi Lowalangi hegöi niha.
19 Börö daʼö, mifalua ngawalö zi möi fangatulö+ ba si möi famarou dödö zamösana.+
20 Böi fakiko halöwö Lowalangi ha börö gö.+ Sindruhu sa, lö hadöi ö si raʼiö, hizaʼi lö sökhi na iʼa daʼö ba möi börö wangala ba niha böʼö.+
21 Sökhi na lö muʼa nagole mazui mubadu nagu ba gofu hadia nifaluami, moroi na tobali fangala khö dalifusömi.+
22 Famatimi andrö yatobali urusami föna Lowalangi. Na lö ihuku ia si samösa niha ba gangetula si no ihalö, omuso dödönia.
23 Hizaʼi, na aombö dödönia ba iʼa, fasala ia börö me ifalua manö lö mamati. Andrö, na so nifalua si lö teʼodane-dane ba wamati, tobali horö daʼö.
Nisura ba gahe zura
^ Mazui te ”na manofu-nofu ia bakha ba dödönia”.
