Ba Mbanua Niha Keriso ba Roma 16:1-27
16 Omasido uʼombakhaʼö khömi dalifusöda sotöi Foʼibe, sangai halöwö ba mbanua niha Keriso ba Gengekirea,+
2 enaʼö mitemaʼö ia ba khö Zoʼaya simane fanemaʼömi niha niʼamoniʼö, ba mitolo ia ba zoguna khönia+ börö me no itolo ndraʼo hegöi ira talifusö tanö böʼö.
3 Faʼema wangowaigu khö Werikila* ba Akila,+ awögu wohalöwö ba khö Keriso Yesu,
4 sanehegö nosora ba khögu.+ Tenga ha yaʼo zangandrö saohagölö, dozi banua niha Keriso göi moroi ba soi böʼö.
5 Faʼema göi wangowaigu ba mbanua niha Keriso sowulo ba nomora.+ Uʼowai Gafaineto niʼomasiʼögu, niha si oföna tobali soloʼö khö Keriso ba Asia.
6 Uʼowai göi Maria si no erege tödö wohalöwö ba khömi.
7 Uʼowai Gandroniko hegöi Yunio si fahatö khögu.+ No irai fao ndraʼaga ba gurunga, sökhi duriara khö ndra sinenge, ba no ara faduhu dödöra khö Keriso moroi khögu.
8 Faʼema wangowaigu khö Gambeliato niʼomasiʼögu khö Zoʼaya.
9 Uʼowai Guribano, awöda wohalöwö ba khö Keriso hegöi Sitakhi niʼomasiʼögu.
10 Uʼowai Gafele si lö faröi khö Keriso. Uʼowai fefu nösi nomo Garisobulu.
11 Uʼowai Herodiano si fahatö khögu. Uʼowai fefu zi sambua omo khö Narikiso, soloʼö khö Zoʼaya.
12 Uʼowai Derifena hegöi Terifosa, talifusöda ira alawe si no erege tödö wohalöwö khö Zoʼaya. Uʼowai Weresi, talifusöda ira alawe niʼomasiʼö, si no erege tödö wohalöwö khö Zoʼaya.
13 Uʼowai Rufo, sangodödögö wangai halöwö khö Zoʼaya hegöi inania si no amaedola ninagu.
14 Uʼowai Gasikerito, Felego, Heremesi, Feteroba, Hereme hegöi ira talifusö si fao khöra.
15 Uʼowai Wilologo, Yulia, Nereo hegöi talifusönia alawe, Olifa, ba fefu niha niʼamoniʼö si fao khöra.
16 Mihaogö wanemaʼö awömi. Fefu mbanua niha Keriso laʼowai ami.
17 Uʼandrö khömi yaʼami ira talifusö, miʼangelama ba niha samabali fangera-ngera ba samobörö fangala. Lö faudu daʼö ba wamahaʼö si no miʼila. Miʼerogö ira.+
18 Niha simane daʼö, tenga sawuyu khö Keriso, Soʼaya yaʼita, hizaʼi sawuyu gisö-isö dödöra.* Ladönisi niha sadölö tödö faoma fanuno ba fehede salösö.
19 No aboto ba dödö niha fefu waʼalöfaröimi andrö, ba omuso dödögu. Hizaʼi, omasi ndraʼo enaʼö atua-tua ami ba zi sökhi ba böi mifomaha ami wamalua si lö sökhi.+
20 Ba zi lö ara tö, ifufu barö gahemi Zatana+ Lowalangi waʼohahau dödö andrö. Yamitema waʼasökhi dödö sebua* moroi khö Zoʼaya yaʼita Yesu.
21 Iʼowai ami Timoteo awögu ba wohalöwö, simanö göi Lukio, Yaso, ba Sosifareto si fahatö khögu.+
22 Yaʼodo Teresio zanura sura andre, ufaʼema göi wangowaigu khömi ba döi Zoʼaya.
23 Iʼowai ami Gayo+ sanemaʼö yaʼo awö fefu mbanua niha Keriso me fatome ba nomonia. Iʼowai ami Eraso sololohe kefe* mbanua, simanö göi dalifusönia Kurato.
24 * ——
25 Tola iʼabölöʼö ami Lowalangi ba duria somuso dödö sanandrösa khö Yesu Keriso nituriaigögu. Turia andre moʼamakhaita ba wamaʼeleʼö si tobini niʼamoniʼö+ andrö si no ara mubiniʼö.
26 Iadaʼa no laʼombakhaʼö ba no tefaduhuʼö ba soi misa moroi ba ayati nisura ndra samaʼeleʼö, tefaudu moloʼö oroisa Lowalangi si lö tebulö, somasi enaʼö moloʼö ba mamati fefu soi.
27 Yatefolakhömi Lowalangi fondrege zatua-tua+ ba khö Yesu Keriso irugi zi lö aetu. Yaduhu.
Nisura ba gahe zura
^ Töi böʼö khö Wirisikila.
^ Sin.: ”dalura”.
^ Faigi Geluaha Ngawua Wehede.
^ Mazui ”bendahara”.
