Ba Mbanua Niha Keriso ba Roma 3:1-31
3 Na simanö, hadia hare na no tobali niha Yahudi mazui hadia gunania na no lasuna?
2 Oya sibai gunania. Si oföna, tebeʼe khöra wehede niʼamoniʼö moroi khö Lowalangi.+
3 Tobali, hewisa na so ösa niha Yahudi si lö mamati? Hadia faröi Lowalangi?
4 Tatu löʼö! Hewaʼae na falimo fefu niha,+ lö tebulö atulö Lowalangi,+ simane si no tesura, ”Börö daʼö, atulö ndraʼugö me fahuhuoʼö ba möna ndraʼugö me laʼohe föna zanguhuku.”+
5 Hewisa na börö zala nifaluada itugu oroma wa atulö Lowalangi? Hadia lö atulö Lowalangi na ihuku ita? (Fehedegu andre fehede si toʼölö lawaʼö niha.)
6 Lö duhu daʼö! Na lö atulö Lowalangi, hewisa wa tola ihuku gulidanö?+
7 Na falimo ndraʼo, ba na oroma wa satulö Lowalangi moroi ba walimosagu andrö irege tefolakhömi ia, hana wa ibaliʼö ndraʼo si so horö?
8 Hadia tebai mawaʼö menaʼö, ”Datafalua zi lö sökhi enaʼö sökhi lua-luania”? So ösa zamöbögö khöma wa no mawaʼö wehede daʼö. Sindruhunia, sinangea na göna ira fanguhuku.+
9 Na simane daʼö, hadia abölö sökhi ita moroi ba danö böʼö? Löʼö! Simane si no muwaʼö, niha Yahudi hegöi niha Yunani, fagölö-gölö sawuyu horö ira.+
10 Tefaudu daʼa ba ayati sangumaʼö, ”Samösa lö satulö,+
11 samösa lö sangokhögö faʼaboto ba dödö, ba samösa lö sangalui Lowalangi.
12 No laholeʼö ira ba lala böʼö, si lö guna ira, samösa lö samalua si sökhi, samösa löʼö.”+
13 ”Hulö lewatö si teboka dölö-tölöra; falimo ira faoma lelara.”+ ”So ba mbewera zöfu gulö sobiso.”+
14 ”Fahöna ba mbawara wangelifi ba fatiusa.”+
15 ”Alio gahera wamunu niha.”+
16 ”Afönu faʼatekiko ba faʼatosasa lala nitöröra,
17 lö laʼila lala waʼohahau dödö.”+
18 ”Lö khöra fangataʼufi Lowalangi.”+
19 Aboto ba dödöda wa fefu niwaʼö ba Goroisa Moze tetandrösaigö ba niha si no faböbö ba Goroisa andrö, irege tebai fabuʼa ira ba hasambalö ihuku gulidanö andre Lowalangi.+
20 Samösa lö satulö ba wamaiginia ba woloʼö oroisa.+ Börö goroisa andrö wa aboto ba dödöda zanandrösa ba horö.+
21 Iadaʼa, aboto ba dödöda wa tenga dali mufalua goroisa awena atulö niha iwaʼö Lowalangi,+ simane niwaʼö ba Goroisa Moze hegöi Nisura Ndra Samaʼeleʼö.+
22 Fefu niha samati tola atulö ira iwaʼö Lowalangi börö me mamati ira khö Yesu Keriso. Lö ifaböʼö-böʼöni niha Lowalangi.+
23 No dozi mamazökhi horö fefu niha ba lö si tola mogamö lakhömi Lowalangi,+
24 hizaʼi teʼefaʼö ira börö höli nibuʼa Yesu Keriso+ irege tefaduhuʼö wa atulö ira. Buala Lowalangi daʼa,+ nibeʼenia börö waʼasökhi dödönia sebua.*+
25 Itehegö Nononia Lowalangi enaʼö tola atulö khönia niha,+ börö wamati ba ndro Keriso.+ Daʼa zangoromaʼö wa atulö Lowalangi andrö, börö waʼebolo dödönia ba wangefaʼö horö nifalua me föna.
26 Daʼö zangoromaʼö ba ginötö iadaʼa wa lö tebulö atulö Lowalangi,+ mendrua manö me satulö iwaʼö niha samati khö Yesu.+
27 Hadia tola tahöni ita? Tebai. Hadia mbörö? Hadia börö me amuata niʼofönaiʼö ba goroisa?+ Tenga, hizaʼi famati zi oföna moroi ba goroisa.
28 Moloʼö yaʼita, atulö zi samösa niha börö wamatinia, tenga börö wamalua oroisa.+
29 Hadia ha Lowalangi niha Yahudi ia?+ Hadia tenga Lowalangi soi böʼö göi?+ Atulö, Lowalangi soi böʼö göi ia.+
30 Ha samösa Lowalangi.+ Börö daʼö, ifaduhuʼö wa atulö niha si no lasuna hegöi si löʼö,+ na mamati niha andrö.
31 Na simanö, hadia daʼö geluahania no taheta goroisa na mamati ita? Tenga! Hizaʼi, taʼaroʼö goroisa.+
Nisura ba gahe zura
^ Faigi Geluaha Ngawua Wehede.
