Ba Mbanua Niha Keriso ba Roma 6:1-23
6 Ba hadia niwaʼöda? Hadia lö taböhöli wamalua horö ha enaʼö tatema waʼasökhi dödö sebua* moroi khö Lowalangi?
2 Tatu löʼö! No mate ita ba horö,+ ba hana wa edöna ita auri ba horö?+
3 Hadia lö saboto ba dödömi wa fefu ita si no tebayagö idanö ba khö Keriso Yesu,+ no tebayagö ita idanö ba waʼamatenia?+
4 Börö me no tebayagö ita idanö ba waʼamatenia, no lakoʼo ita si fao khönia+ enaʼö tatema waʼauri si bohou+ simane Keriso nisusugi moroi ba gotalua zi mate ba waʼabölö Nama.
5 Na teʼosambuaʼö ita khönia me tatörö waʼamate simane yaʼia,+ hasambalö teʼosambuaʼö ita ba khönia na tesusugi ita simane yaʼia.+
6 Aboto ba dödöda wa no teʼosö gamuatada si tohöna ba döla geu famakao andrö khönia,+ enaʼö lö ifatörö ita saʼae botoda+ si no afönu horö ba lö iʼosawuyu ita horö.+
7 Na no mate zi samösa niha, no teʼefaʼö ia moroi ba horönia.
8 Baero daʼö, na mate ita awö Keriso, faduhu dödöda wa auri ita göi awönia.
9 Aboto ba dödöda na no tesusugi ita moroi ba gotalua zi mate,+ lö mate saʼae Keriso,+ ba lö ifatörö ia faʼamate andrö.
10 Faʼamate nitörönia me mböröta, sakali irugi zi lö aetu ba wangeheta horö,+ hizaʼi faʼauri nitörönia iadaʼa, ba no faʼauri khö Lowalangi.
11 Simanö göi ami. Miwaʼö wa no mate ami ba horö, ba sauri ami khö Lowalangi börö Keriso Yesu.+
12 Börö daʼö, böi mitehegö ifatörö ami horö andrö tobali razo ba mbotomi si tola mate+ irege miʼoʼö zomasi ia.
13 Böi milulu mbotomi* ba horö si tobali lala ba wamalua si lö atulö, hizaʼi milulu waʼaurimi khö Lowalangi tobali niha si no teʼorifi moroi ba gotalua zi no mate. Milulu göi mbotomi* khönia tobali fangöna ba wamalua satulö.+
14 Tebai ifatörö ami horö, börö me tenga barö mbawa goroisa so ami,+ hizaʼi barö mbawa waʼasökhi dödö sebua* moroi khö Lowalangi.+
15 Hadia rahu-rahunia? Börö me tenga barö mbawa goroisa so ita hizaʼi barö mbawa waʼasökhi dödö sebua* moroi khö Lowalangi, hadia tafalua horö?+ Tatu löʼö!
16 Hadia lö aboto ba dödömi wa no sawuyu niha ami na lö tebulö miʼoʼö zomasi ia?+ Na tobali ami sawuyu horö,+ hasambalö mate ami,+ ba na tobali ami sawuyu Lowalangi, tefotöi ami niha satulö.
17 Uʼandrö saohagölö khö Lowalangi, hewaʼae sawuyu horö ami me mböröta, iadaʼa no miʼoʼö soroi ba dödö duma-duma wamahaʼö si no mubeʼe khömi.
18 Börö me no teʼefaʼö ami ba horö,+ tobali ami sawuyu Lowalangi ba mifalua zatulö.+
19 Börö horö wa ambö faʼabölömi, andrö wa fahuhuo ndraʼo si fao fehede salio miʼila eluaha. Me mböröta no milulu mbotomi tobali sawuyu zi raʼiö hegöi ba wanawö huku irege mifalua zi lö sökhi. Iadaʼa, milulu mbotomi tobali sawuyu waʼatulö irege teʼamoniʼö ami.+
20 Me tobali ami sawuyu horö, lö moʼömö ami ba wamalua satulö.
21 Tobali, hadia mbua nitemami me luo daʼö? Fefu ngawalö zaila ami iadaʼa, solohe ba waʼamate.+
22 Börö me no teʼefaʼö ami moroi ba horö ba tobali ami sawuyu Lowalangi iadaʼa, mitema mbua ba waʼauri niʼamoniʼö+ solohe yaʼami ba waʼauri si lö aetu.+
23 Luo horö sa ba faʼamate,+ ba buala faʼebua dödö Lowalangi andrö yaʼia daʼö faʼauri si lö aetu+ ba khö Keriso Yesu Soʼaya yaʼita.+
Nisura ba gahe zura
^ Faigi Geluaha Ngawua Wehede.
^ Sin.: ”ndroto-ndrotomi”.
^ Sin.: ”ndroto-ndrotomi”.
^ Faigi Geluaha Ngawua Wehede.
^ Faigi Geluaha Ngawua Wehede.
