Ba Mbanua Niha Keriso ba Roma 7:1-25
7 He yaʼami ira talifusö, fahuhuo ndraʼo khömi yaʼami si no aboto ba dödö oroisa. Hadia lö aboto ba dödömi wa barö Goroisa Moze so ami gasa-gasa waʼaurimi?
2 Duma-dumania, moloʼö oroisa, ira alawe si no muhalö, tefaböbö ia khö woʼomonia fatua auri woʼomonia nasa, hizaʼi na no mate woʼomonia ira matua, aefa ia moroi ba huku woʼomonia.+
3 Tobali, na orudu ndra alawe andrö ba ndra matua böʼö fatua auri woʼomonia nasa, sohorö ia.+ Na no mate woʼomonia, aefa ia ba huku woʼomonia irege lö lafotöi ia saʼae sohorö na orudu ia ba ndra matua böʼö.+
4 Simanö göi ami, yaʼami ira talifusö. No mate ami ba Goroisa Moze börö mboto Keriso, ba tobali ami okhötania+ me no tesusugi ia moroi ba gotalua zi mate+ irege tafolakhömi Lowalangi.+
5 Me auri ita mböröta moloʼö faʼomasi nösi, Oroisa Moze zangoromaʼö wa fangisö ba wamalua horö andrö zohalöwö ba mbotoda,* ba lua-lua horö andrö faʼamate.+
6 Iadaʼa, no teʼefaʼö ita moroi ba Goroisa Moze+ börö me no mate ita ba goroisa samöbö yaʼita. Börö daʼö, tobali ita sawuyu moloʼö faʼaboto ba dödö si bohou, soloʼö eheha niʼamoniʼö,+ tenga saʼae sawuyu moloʼö faʼaboto ba dödö silalö, moloʼö oroisa nisura.+
7 Na simanö hewisa? Hadia so horö Goroisa Moze? Löʼö! Na lö hadöi Oroisa daʼö, lö aboto ba dödögu horö andrö.+ Duma-dumania, lö menaʼö aboto ba dödögu hadia wangisö andrö na lö hadöi niwaʼö ba Goroisa Moze, ”Böi isö gokhöta nawöu.”+
8 Hizaʼi, me no so goroisa andrö, tebeʼe ginötö ba horö ba wamarou tödögu ba wangisö okhöta niha böʼö. Si mate sa horö na lö hadöi oroisa.+
9 Sindruhunia, no auri ndraʼo fatua lö hadöi oroisa. Ba me no so goroisa, ifuli auri horö andrö, ba yaʼo sa ba si mate.+
10 Oroisa andrö sindruhunia zolohe faʼauri.+ Hizaʼi, no solohe ba waʼamate.
11 Me no so goroisa, tebeʼe ginötö ba horö ba wanandraigö hegöi ba wamunu yaʼo ba goroisa andrö.
12 Tobali, Oroisa Moze andrö sindruhunia niʼamoniʼö, ba fehedenia göi niʼamoniʼö, atulö ba sökhi.+
13 Na simanö, hadia mate ndraʼo ba zi sökhi? Tatu löʼö! Horö zamunu yaʼo ba zi sökhi,+ irege oroma hadia horö andrö sindruhunia. Oroisa zangoromaʼö waʼalösökhi horö andrö.+
14 Aboto ba dödöda wa moroi khö Lowalangi Goroisa Moze andrö, ba ösi niha ndraʼo niʼamawa tobali sawuyu horö.+
15 Lö aboto ba dödögu nifaluagu, tenga sa somasi ndraʼo nifaluagu, hizaʼi si lö omasi ndraʼo daʼö ufalua.
16 Hewaʼae na ufalua zi lö omasido, fao dödögu wa si sökhi Goroisa Moze andrö.
17 Tenga yaʼo zamalua daʼö, hizaʼi horö si so ba mbotogu.+
18 Noa sa uʼila wa niha si lö moʼahonoa ndraʼo, lö manö si sökhi ba khögu. Omasido ufalua zi sökhi, ba tebai ufalua.+
19 Si sökhi somasi ndraʼo tenga daʼö nifaluagu, hizaʼi si lö sökhi si lö edöna ndraʼo, daʼö nifaluagu.
20 Tobali, na ufalua zi lö omasi ndraʼo, ba tenga saʼae yaʼo zamalua daʼö, horö andrö samatörö yaʼo.
21 Daʼa zalua khögu: Na omasi ndraʼo wamalua satulö, ba no ahatö khögu zi lö sökhi.+
22 Ba dödögu, omasido sibai goroisa Lowalangi,+
23 hizaʼi ba mbotogu,* so horö zangosawuyu yaʼo,+ si fasöndra ba gera-eragu ba wolawa oroisa Lowalangi.+
24 Tefakao sibai ndraʼodo andre! Haniha zi tola mangefaʼö yaʼo moroi ba mboto horö?
25 Uʼandrö saohagölö khö Lowalangi, sangorifi yaʼo ba khö Zoʼaya yaʼita Yesu Keriso! Na moloʼö fangera-ngeragu, sawuyu goroisa Lowalangi ndraʼo, hizaʼi na dali ndroto-ndrotogu no sawuyu horö ndraʼo.+
