Ba Mbanua Niha Keriso ba Roma 8:1-39
8 Börö daʼö, lö lawaʼö fasala niha si ha sambua ba khö Keriso Yesu.
2 Oroisa geheha niʼamoniʼö sameʼe khömi faʼauri si ha sambua ba khö Keriso Yesu, no iʼefaʼö ami+ moroi ba huku horö ba faʼamate.
3 Hadia zi tebai ifalua Oroisa Moze+ börö walömoʼahonoa niha,+ ifalua daʼö Lowalangi me ifatenge Nononia+ tobali niha+ ba wangeheta horö. Börö zimanö, iʼetuʼö huku ba horö nifalua niha andrö Lowalangi.
4 Andrö, na taʼoʼö wanuturu lala moroi ba geheha niʼamoniʼö+ ba tenga faʼomasi nösi, tola tafalua zatulö moloʼö Oroisa Moze andrö.+
5 Niha soloʼö faʼomasi nösi, ha daʼö manö niʼera-erania,+ hizaʼi niha soloʼö fanuturu lala moroi ba geheha niʼamoniʼö, lö iböhöli woʼangeragö hadia ia zi tefaudu ba geheha andrö.+
6 Na muʼosambuaʼö wangera-ngera ba waʼomasi nösi eluahania faʼamate,+ hizaʼi na muʼosambuaʼö wangera-ngera ba geheha niʼamoniʼö eluahania faʼauri ba faʼohahau dödö.+
7 Niha sangosambuaʼö fangera-ngera ba waʼomasi nösi, ibaliʼö ia si faʼudu khö Lowalangi+ börö me lö laʼoʼö goroisania, ba sindruhunia tebai lafalua.
8 Tobali, niha soloʼö faʼomasi nösi tebai iʼomusoiʼö dödö Lowalangi.
9 Na so ba dödömi geheha Lowalangi, miʼoʼö geheha andrö+ ba tenga faʼomasi nösi. Hizaʼi, na lö miʼokhögö wangera-ngera Keriso, tenga tana khönia ami.
10 Na ha sambua ami ba khö Keriso,+ hewaʼae mate mbotomi börö horö, ibeʼe khömi waʼauri eheha niʼamoniʼö börö me lafotöi ami satulö.
11 Na so ba dödömi geheha Lowalangi sanusugi Yesu moroi ba gotalua zi mate,+ iʼorifi göi dania mbotomi si mate andrö+ ehehania si no so ba dödömi, si no manusugi Keriso Yesu moroi ba ngai zi mate.
12 Börö daʼö yaʼami ira talifusö, moʼömö ita, hizaʼi tenga ba woloʼö faʼomasi nösi.+
13 Na miʼoʼö waʼomasi nösi, hasambalö mate ami. Ba na mibunu mbua-bua si lö sökhi andrö+ faoma eheha niʼamoniʼö, teʼorifi ami.+
14 Fefu nidöniaʼö geheha niʼamoniʼö, sindruhu-ndruhu ono Lowalangi ira.+
15 Lö iʼosawuyu ita eheha niʼamoniʼö mazui ifetaʼu ita. Hizaʼi, börö geheha niʼamoniʼö andrö wa tekaoni ita tobali ono Lowalangi ba tefarou dödöda weʼao, ”He Abba,* Ama!”+
16 Eheha niʼamoniʼö hegöi tödöda+ zamaduhuʼö wa ono Lowalangi ita.+
17 Na ono Lowalangi ita, fao ita khö Keriso ba wanema ondröita moroi khö Lowalangi.+ Na tefakao ita awö Keriso,+ tefolakhömi göi ita awönia.+
18 Moloʼö yaʼo, famakao salua khöda iadaʼa lö famaedonia ba lakhömi niforomaʼönia dania börö ita.+
19 Fefu niwöwöi ladöna-döna si fao faʼakhari-khari dödö hawaʼara tefaʼeleʼö nono Lowalangi.+
20 Zaya-zaya gölö fefu waʼauri niha,+ tenga börö me omasi ira, hizaʼi börö gohitö dödö Lowalangi. Hewaʼae simanö, so wanötöna nibeʼenia
21 yaʼia daʼö, teʼefaʼö+ fefu niwöwöinia moroi ba wangosawuyu horö ba faʼamate, ba latema wangefa solakhömi simane nitema ndraono Lowalangi.
22 Noa sa taʼila wa oi mangarö-ngarö fefu niwöwöi Lowalangi ba lataögö waʼafökhö irugi iadaʼa.
23 Baero daʼö, yaʼita si no oföna manema ondröita andrö yaʼia geheha niʼamoniʼö, mangarö-ngarö ita+ gasa-gasa wombaloi inötö na tobali ita ono Lowalangi.+ Moroi ba höli wa tola teʼefaʼö ita ba mbotoda andre.
24 Me teʼefaʼö ita mböröta, tatema wanötöna daʼa. Na no alua nidöna-döna zi samösa niha, lö saʼae manötöna ia lö?
25 Ba na lö salua+ nidöna-dönada,+ taʼanauʼö gölöda wombaloi.+
26 Baero daʼö, börö me ambö faʼabölöda, itaria mangandrö ita, hizaʼi lö taʼila hadia niʼandröda. Ba ginötö daʼö, itolo ita eheha niʼamoniʼö+ ba wangandrö khöda hewaʼae lö alua ba mbewe ngarö-ngarö dödöda.
27 Lowalangi sanekhegö tödö niha+ aboto ba dödönia gangandröwa geheha niʼamoniʼö, börö me soguna ba niha niʼamoniʼö ba tefaudu ba gohitö dödö Lowalangi.
28 Aboto ba dödöda wa oi toföfö fefu nifalua Lowalangi ba moguna ia ba niha sangomasiʼö yaʼia, yaʼia daʼö nikaoninia moloʼö somasi ia.+
29 Niha si no itandroi iʼotarai ba wamobörö, itatugöi enaʼö fakhili ira khö Nononia+ ba tobali siaʼa Nononia andrö+ ba gotalua dalifusönia.+
30 Baero daʼö, ikaoni+ niha si no ihonogöi ba mböröta,+ ba niha nikaoninia andrö ifotöi ira satulö.+ Ba gafuriata, ifolakhömi niha nifotöinia satulö andrö.+
31 Na simanö, hadia niwaʼöda ba daʼa? Na fao khöda Lowalangi, haniha zolawa yaʼita?+
32 Börö me lö alimagö khönia Nononia hewaʼae tefakao ba ibeʼe salahida,+ hadia tenga faʼasökhi dödö Lowalangi hegöi Ononia wa iʼamualagö khöda danö böʼö fefu?
33 Börö me no atulö niha nifilinia iwaʼö Lowalangi,+ haniha saʼae zi tola mamobahulu yaʼira?+
34 Haniha zangumaʼö wa fasala ira? Lö hadöi, börö me no mate Keriso Yesu, ba no tesusugi ia, iadaʼa no modadao ia ba gambölö Lowalangi+ ba ilului wangandrö salahida.+
35 Hadia so zi tola mamabali yaʼita ba waʼomasi Keriso?+ Hadia tola ifabali ita famakao, fanandraigö, folohi, faʼolofo, falönukha, famaʼala, mazui föda famunu?+
36 So ba zura, ”Börö me lö faröi ndraʼaga khöu, ero maʼökhö tefakao waʼaurima; labaliʼö ndraʼaga biri-biri sedöna lataba.”+
37 Hizaʼi, börö wanolo moroi khö Keriso sangomasiʼö yaʼita, andrö wa möna ita ba wanaögö fefu hadia ia.+
38 Noa sa faduhu dödögu, he faʼamate, he faʼauri, he malaʼika, he samatörö, he si so iadaʼa, he si so dania, he faʼabölö,+
39 he faʼalawa, he faʼabakha, gofu hadia niwöwöi, tebai ifabali ita moroi ba waʼomasi Lowalangi soroma ba khö Zoʼaya yaʼita Yesu Keriso.
Nisura ba gahe zura
^ Ba li Heberaiʼo mazui Aramo eluahania ”Bapa!”
