Ruti 1:1-22
1 Ba götö lafalua waʼatulö* ira sanguhuku,+ alua lofo ba Mbetilekhema+ si so ba Yehuda. So samösa ndra matua, mofanö ia moroi ba daʼö iʼohe woʼomonia awö ndraononia si darua, fatewu ira ba mbanua* Moabi.+
2 Töi ndra matua daʼö Elimelekhi,* ba foʼomonia Naʼemi,* darua nononia matua sotöi Maloni* ba Khiliyoni.* Yaʼira andre niha Eferata moroi ba Mbetilekhema si so ba Yehuda. Larugi mbanua Moabi ba toröi ira ba daʼö.
3 Ba gafuriata mate Gelimelekhi foʼomo Naʼemi, irege hatö Naʼemi zi toröi ba darua nononia matua.
4 Mangowalu ndraononia matua si darua khö ndra alawe Moabi sotöi Orafa ba Ruti.+ Toröi ira ba daʼö mato fulu fakhe waʼara.
5 Aefa daʼö, mate ndraononia matua si darua sotöi Maloni ba Khiliyoni, irege hatö Naʼemi zi toröi. Lö hadöi saʼae ononia matua si darua hegöi foʼomonia.
6 Ba mbanua Moabi, no irongo wa ifuli iʼameʼegö tödö nono mbanuania Yehowa, ibeʼe mbalazora.* Andrö, ifaʼanö ia wangawuli hegöi umönönia si darua, laröi mbanua Moabi.
7 Laröi mbanua si toröi yaʼira. Me so ira ba lala numalö ba danö Yehuda,
8 imane Naʼemi khö numönönia si darua, ”Abölö sökhi na mangawuli ami ba nomo ninami zamösana. Yaʼiforomaʼö khömi Yehowa waʼomasinia si lö faröi,+ simane si no miforomaʼö khö woʼomomi si no mate hegöi khögu.
9 Yaʼiʼamualagö* khömi Yehowa woʼomo ira matua enaʼö ahono dödömi.”*+ Aefa daʼö, iʼuma numönönia andrö ba adöʼu-döʼu ira wege-ege.
10 Lö laböhöli wangumaʼö, ”Löʼö, lö omasiga fabali khöu hegöi ba soimö.”
11 Imane khöra Naʼemi, ”Miʼangawuli onogu. Hadia na no fao ami khögu? Hadia tola nasa moʼono ndraʼo enaʼö tobali foʼomomi dania?+
12 Miʼangawuli onogu. Mifuli ami, lö duhu möido nihalö saʼae börö me no atua ndraʼo. Hewaʼae na usöndra woʼomogu bongi daʼa ba tumbu khögu nono matua,
13 hadia mibaloi irege ebua ira? Hadia lö möi ami nihalö börö ira? Böi onogu. No ihuku ndraʼo tanga Yehowa, ba abu sibai dödögu woʼangeragö lua-luania khömi.”+
14 Ifuli zui adöʼu-döʼu ira wege-ege, aefa daʼö iʼuma ninania matuania Orafa ba mofanö ia. Hizaʼi, lö fabali Ruti khö Naʼemi.
15 Imane Naʼemi, ”No mangawuli galaʼedomö ba soinia hegöi khö lowalanginia. Mifao, oʼö ia.”
16 Hizaʼi imane Ruti, ”Böi forege wangumaʼö khögu ba wondröi yaʼugö Ma, mazui enaʼö uböhöli wefao khöu. Hezo möiʼö, ba daʼö möido. Hezo möröʼö, ba daʼö mörödo. Soimö tobali soigu, ba Lowalangimö, Lowalangigu.+
17 Hezo mateʼö, ba daʼö matedo, ba daʼö göi lakoʼo ndraʼo. Yaʼihuku ndraʼo Yehowa na utehegö so zamabali yaʼo khöu, baero waʼamate.”
18 Börö me iʼila Naʼemi wa no aro dödö Ruti wefao khönia, andrö ibato wamarou yaʼia.
19 Latohugö wofanö ba larugi Mbetilekhema.+ Me awena larugi, ahöli-höli dödö niha si so ba mbanua andrö. Lamane ira alawe si so ba daʼö, ”Hadia Naʼemi daʼa ba?”
20 Itema lira, ”Böi mikaoni ndraʼo Naʼemi.* Mikaoni ndraʼo Mara,* börö me no afeto sibai nilau Wondrege Zabölö khögu.+
21 Me mofanö ndraʼo, ba ahori so khögu hadia ia. Hizaʼi, ifangawuli ndraʼo Yehowa lö noro danga. Iʼailasi ndraʼo Yehowa ba Fondrege Zabölö andrö iʼasogö khögu gabula dödö.+ Hadia wa mikaoni ndraʼo Naʼemi?”
22 Simane daʼö wangawuli Naʼemi moroi ba mbanua Moabi,+ fao khönia numönönia Ruti niha Moabi andrö. Larugi Mbetilekhema me tebörögö wamasi barli.+
Nisura ba gahe zura
^ Sin.: ”wanguhuku”.
^ Mazui ”ba danö”.
^ Eluahania ”Lowalangigu Andrö Razo”.
^ Eluahania ”Faʼomuso Dödögu”.
^ Te moroi ba li Heberaiʼo, eluahania ”itugu tebai; mofökhö”.
^ Eluahania ”Niha Sambö Faʼabölö; Sarakhagö Mate”.
^ Sin.: ”ibeʼe öra roti”.
^ Sin.: ”enaʼö misöndra nahia waʼatoröimi”.
^ Mazui ”Yaʼibeʼe”.
^ Eluahania ”Faʼomuso Dödögu”.
^ Eluahania ”Afeto”.
