Ruti 3:1-18
3 Imane khönia Naʼemi, inania matuania, ”He onogu, moʼömö ndraʼo ba wangalui foʼomou+ enaʼö ahono dödöu.*
2 Hadia tenga si tenga böʼöda Mboasi andrö?+ Iraono alawe si fao khömö andrö sohalöwö khönia. Bongi daʼa manafiʼö barli ia ba naha wamöbörö.
3 Ae ondri, fake wanikha somuhua hegöi nukha si baga, aefa daʼö aeʼe khönia ba naha wamöbörö. Böi iʼila wa so ndraʼugö ba daʼö fatua lö awai manga ba mamadu agu ia.
4 Faigi hezo mörö ia. Aefa daʼö, bokai gambala tanö ba gahenia enaʼö ba daʼö ölau mörö. Ifatunö khöu dania hadia zinangea öfalua.”
5 Imane Ruti, ”Ufalua fefu niwaʼömö.”
6 Möi ia ba naha wamöbörö, ba ifalua fefu niwaʼö ninania matuania.
7 Gasa-gasa daʼö göi, omuso dödö Mboasi me no aefa manga ba mamadu agu ia. Lö ara, möi ia mörö ba zinga mbua nowi si no laʼowuloi. Me tohare Ruti, no idaʼi-daʼi wamokai ambala tanö ba gahe Mboasi, ba ilau mörö ba daʼö.
8 Me talu mbongi, ibörögö oʼafu Mboasi. Me tokea ia, iʼila samösa ndra alawe si mörö ba zinga gahenia.
9 Manofu ia, ”Haniha ndraʼugö?” Itema li, ”Ruti ndraʼodo, sawuyumö. Lumöʼö* zawuyumö andre börö me sinangea ösanu ndraʼaga.”+
10 Imane Boasi, ”Yaʼifahowuʼö ndraʼugö Yehowa onogu. Faʼomasi si lö faröi niforomaʼömö andre abölö ebua ia moroi ba zilalö.+ Tenga ono matua si bohou ebua niʼaluimö, si numana mazui si kayo.
11 Böi busi dödöu onogu. Fefu niʼandrömö hasambalö ufalua,+ börö me no laʼila ira niha mbanua daʼa wa ira alawe si sökhi amuata ndraʼugö.
12 Atulö wa sinangea yaʼo zosanu,*+ hizaʼi so nasa danö böʼö zabölö sinangea mosanu yaʼami, sabölö ahatö moroi khögu.+
13 Böi ofanö bongi daʼa. Mahemolu sihulö wongi, na omasi niha daʼö, akha yaʼia zosanu yaʼami.*+ Na lö omasi ia, faya wa no sauri Yehowa na tenga yaʼo dania zosanu yaʼami. Ba daʼa manö förö irugi moluo.”
14 Börö daʼö, itohugö wemörö ahatö ba gahe Mboasi irugi moluo, ba maoso ia fatua lö mohaga enaʼö lö sangila yaʼia. Imane Boasi, ”Böi so zangila wa so ndra alawe si möi ba naha wamöbörö.”
15 Imane nasa, ”Bologö lembemö sebua andrö.” Ifalua daʼö Ruti, lö ara ifaduwa önö fanuʼa* barli, ibeʼe khö Ruti. Aefa daʼö, möi Mboasi miyomo ba mbanua.
16 Me mangawuli Ruti, manofu ninania matuania khönia, ”Hewisa* onogu?” Ifatunö fefu Ruti hadia nifalua Mboasi khönia.
17 Imane nasa, ”Ibeʼe khögu önö fanuʼa barli ba imane, ’Böi angawuli lö noro dangamö khö ninau matuau.’”
18 Imane Naʼemi, ”Baloi ba daʼa onogu. Faigi hadia zalua. Lö ahono dödönia fatua lö iʼasiwai daʼa maʼökhö.”
Nisura ba gahe zura
^ Sin.: ”wangalui nahiamö waʼatoröi”.
^ Mazui ”Bologö mbarumö sebua khö”.
^ Sin.: ”zowöli mangawuli”.
^ Sin.: ”zowöli yaʼami mangawuli”.
^ Sin.: ”Haniha ndraʼugö”.
