Ruti 4:1-22
4 Aefa daʼö, möi Mboasi ba mbawa göli si so ba mbanua andrö,+ modadao ia ba daʼö. Lö ara, itörö daʼö niha sinangea mosanu si no irai itötöi Boasi.+ Imane khönia Boasi, ”Aine, modadao ita ba daʼa.” Tohare ia ba modadao ia ba daʼö.
2 Aefa daʼö, mohede Mboasi khö ndra satua mbanua,+ dafulu waʼato. Imane, ”Miʼaine, modadao ita ba daʼa.” Ba modadao ira.
3 Imane Boasi ba niha sinangea mosanu andrö,+ ”No mangawuli Naʼemi moroi ba mbanua Moabi.+ Ba me lö lala saʼae, andrö wa ifamawa danö tana khö dalifusöda Elimelekhi.+
4 No uʼera-era ba moguna ufatunö khöu daʼa, ’Öli danö daʼö ba zanehe niha sato ba föna ndra satua mbanua.+ Na omasi ndraʼugö, tola ösanu ia börö me yaʼugö zinangea moroi khögu. Hizaʼi, na tebai ösanu, fatunö khögu enaʼö yaʼo zosanu.’”* Itema li, ”Lau, omasido uʼöli.”+
5 Aefa daʼö imane Boasi, ”Na öʼöli danö andrö moroi khö Naʼemi, öli göi danö moroi khö ndra alawe Moabi sotöi Ruti, foʼomo ndra matua si no mate andrö, enaʼö laʼokhögö danö harato andrö ngaʼötönia.”+
6 Imane niha sinangea mosanu, ”Na simanö, lö sagu khögu wosanu, rugi ndraʼo dania.* Hewaʼae na yaʼo zinangea menaʼö, hizaʼi utehegö khöu yaʼugö manö zosanu,* tebai usanu.”
7 Ba Gizaraʼeli mböröta, daʼa zinangea mufalua ba wamaduhuʼö soʼamakhaita ba wosanu* hegöi na so nifalalini: Iheta zandralania,+ ibeʼe ba niha böʼö. Simane daʼö wamaduhuʼö angetula ba Gizaraʼeli.
8 Me iwaʼö niha sinangea mosanu andrö khö Mboasi, ”Yaʼugö manö zosanu yaʼia,”* iheta zandralania.
9 Aefa daʼö, mohede Mboasi khö ndra satua mbanua hegöi niha si so ba daʼö, ”Maʼökhö andre yaʼami zamaduhuʼö+ wa no uʼöli fefu harato Gelimelekhi, Khiliyoni, ba Maloni moroi khö Naʼemi.
10 Uhalö göi ndra alawe Moabi andrö sotöi Ruti tobali foʼomogu, foʼomo Maloni mböröta, enaʼö laʼokhögö danö harato andrö ngaʼötö Maloni,+ ba lö taya döinia ba gotalua ndra talifusönia hegöi ba niha mbanua andre. Yaʼami zamaduhuʼö maʼökhö.”+
11 Me larongo daʼö, lamane niha sato si so ba mbawa göli hegöi satua mbanua, ”Yaʼaga zamaduhuʼö! Yaʼifahowuʼö Yehowa woʼomomö si möi ba nomou simane famahowuʼönia Rakhela hegöi Lea, awe ndraono Gizaraʼeli.+ Yamofozu ndraʼugö ba Geferata+ ba öʼokhögö döi si sökhi ba Mbetilekhema.+
12 Yaʼiʼamualagö khöu Yehowa ngaʼötö sato moroi ba ndra alawe andrö,+ irege hulö nösi nomo Weresi nösi nomou,+ niʼadonogö Tamara khö Yehuda.”
13 Ba ihalö Ruti andrö Boasi tobali foʼomonia. Orudu ira ba ifahowuʼö ia Yehowa irege manabina Ruti ba tumbu khönia nono matua.
14 Lamane ira alawe sato khö Naʼemi, ”Nisuno Yehowa me no itatugöi enaʼö so zosanu yaʼugö.* Yatehöngö döinia ba Gizaraʼeli!
15 Ono daʼa zameʼe khöu faʼaterou dödö mangawuli ba sondrorogö yaʼugö na atuaʼö, börö me no iʼadonogö ia umönöu niʼomasiʼömö,+ sabölö ebua böli moroi ba zi dafitu ono matua.”
16 Ihalö nono daʼö Naʼemi, isakhei ba irorogö.
17 Lamane ira alawe si falazi omo khönia, ”No isöndra nono matua Naʼemi,” ba ibeʼe töi nono andrö Obedi.+ Yaʼia nama Gizaʼi,+ ama Dawido.
18 Daʼa ngaʼötö Weresi:+ Feresi ama Hezerono;+
19 Hezerono ama Rama; Rama ama Gaminadabi;+
20 Aminadabi+ ama Nahaso; Nahaso ama Zalomono;
21 Salomono ama Mboasi; Boasi ama Gobedi;
22 Obedi ama Gizaʼi;+ Izaʼi ama Dawido.+
Nisura ba gahe zura
^ Sin.: ”zowöli yaʼia mangawuli”.
^ Sin.: ”tekiko dana khögu dania”.
^ Sin.: ”zowöli yaʼia mangawuli”.
^ Sin.: ”wowöli mangawuli”.
^ Sin.: ”zowöli yaʼia mangawuli”.
^ Sin.: ”zowöli yaʼugö mangawuli”.
