Sangombakha 9:1-18
9 Fefu daʼa uʼiröʼö bakha ba dödögu, ba uhalö gangetula wa ba danga Lowalangi sindruhu so niha satulö hegöi niha satua-tua, simanö göi halöwöra.+ Lö aboto ba dödö niha waʼomasi hegöi fatiusa salua fatua lö si tumbu ira.
2 Fagölö lua-luara fefu,+ niha satulö hegöi niha si lö sökhi,+ niha si sökhi, niha si raʼiö hegöi si lö raʼiö, niha sameʼe sumange hegöi si lö mameʼe sumange. Niha si sökhi fagölö ia ba niha sebua horö, ba niha si möi ba hölu fagölö ia ba niha si lö alio möi ba hölu.
3 Abula dödö salua ba gulidanö* yaʼia daʼö: Börö me fagölö fefu lua-luara,+ andrö wa afönu faʼalösökhi dödö niha. So waʼowöhö mowa bakha ba dödöra sandrohu faʼaurira, aefa daʼö hasambalö latörö waʼamate!
4 So wanötöna ba niha sauri, börö me sökhi nasu sauri moroi ba zingo si no mate.+
5 Sauri sa ba laʼila* wa si mate ira dania,+ hizaʼi niha si no mate lö laʼila hadia ia,+ ba lö hadöi saʼae böli gölöra börö me no teʼolifugö fefu ngawalö nifaluara.+
6 No taya fefu waʼomasira, fatiusara, ba faʼabao dödöra, ba lö saʼae tana khöra ba gulidanö.*+
7 Omusoiʼö dödöu ba wemanga göu, badu nagu andrö khöu si fao faʼomuso dödö,+ börö me omasi Lowalangi sindruhu halöwö nifaluamö.+
8 Yalötebulö waʼafusi nukhamö* ba öbayoini högöu fanikha.+
9 Omusoiʼö dödöu khö woʼomou ira alawe niʼomasiʼöu+ ba zi sandrohu faʼaurimö si tobali zaya-zaya gölö nibeʼe Lowalangi khöu ba gulidanö,* sandrohu faʼaurimö si no zaya-zaya gölö, börö me daʼö luo nitemau* ba waʼaurimö hegöi faʼerege dödöu ba gulidanö.+
10 Hadia zi tola öʼohalöwögöigö, falua daʼö saʼoi dölau, börö me lö halöwö, fangera-ngera, faʼaboto ba dödö hegöi faʼatua-tua ba Lewatö,*+ nahia si möiʼö dania.
11 Uʼila danö böʼö nasa ba gulidanö* wa tenga ha ba niha sabölö fagohi waʼamöna, lö si tatu na möna ba wasuwöta niha sabölö,+ satua-tua ba itaria lö isöndra gönia, sonekhe ba lö kayo manö,+ ba sangokhögö faʼaboto ba dödö itaria lö mofozu,+ börö me göna ira inötö hegöi salua si lö mudöna-döna.
12 Lö iʼila niha hawaʼara ginötönia.+ Simane iʼa salau ba ndriala famunu ba fofo si tofesu ba dandrawa, simane daʼö göi nono niha si teʼuʼu ba wamakao salua khöra ba zi lö mudöna-döna.
13 So göi nasa niʼilagu soʼamakhaita ba waʼatua-tua ba gulidanö,* ba ahöli dödögu:
14 So sambua mbanua side-ide ba lö ato zowanua ba daʼö, lö ara tohare samösa razo sabölö ba isuwö mbanua daʼö. Ifazökhi göli kara ba wamaʼuʼu banua andrö.
15 Ba mbanua daʼö, so samösa ndra matua si numana satua-tua, ba teʼefaʼö mbanua daʼö börö waʼatua-tuania. Hizaʼi samösa lö sanörö tödö ira matua si numana andrö.+
16 Andrö umane, ’Abölö sökhi waʼatua-tua moroi ba waʼabölö,+ hizaʼi laʼositengagö waʼatua-tua niha si numana, ba lö lafondrondrongo wehedenia.’+
17 Abölö sökhi na mufondrondrongo wehede niha satua-tua nifaehagönia ba waʼahono dödö moroi ba weʼao niha sebua kuaso samatörö niha si bodo.
18 Abölö sökhi waʼatua-tua moroi ba wakake wasuwöta, hizaʼi ha samösa niha samalua horö tola ifakiko ngawalö zi sökhi.+
Nisura ba gahe zura
^ Sin.: ”ba narö luo”.
^ Mazui ”aboto ba dödöra”.
^ Sin.: ”ba narö luo”.
^ Eluahania nukha sabölö mohaga sangoromaʼö faʼomuso dödö, tenga nukha ba wangabu dödö.
^ Sin.: ”ba narö luo”.
^ Mazui ”dana khöu”.
^ Mazui ”Syeol”. Faigi Geluaha Ngawua Wehede.
^ Sin.: ”ba narö luo”.
^ Sin.: ”ba narö luo”.
