Sanguhuku 1:1-36
1 Me no mate Yosua,+ manofu ndraono Gizaraʼeli khö Yehowa,+ ”Haniha zi oföna möi ba gotaluama ba wolawa niha Ganaʼana?”
2 Imane khöra Yehowa, ”Oföna ua Yehuda.+ Ubeʼe ba dangania dania* mbanua andrö.”
3 Aefa daʼö, imane Yehuda khö dalifusönia Simeoni, ”Mifao awöma ba mbanua si no mutatugöi khöma+ ba wolawa niha Ganaʼana, ba fao ndraʼaga göi dania awömi ba mbanua si no mutatugöi khömi.” Fao khöra Zimeoni.
4 Me fasuwö Yehuda, ibeʼe ba dangara Yehowa niha Ganaʼana hegöi niha Weresi,+ ba lakalaisi 10.000 niha ba Mbeseki.
5 Lasöndra Gadoni-beseki ba Mbeseki, ba daʼö lalawa ia ba lakalaisi niha Ganaʼana+ hegöi niha Weresi.+
6 Me moloi Gadoni-beseki, lagohi ia, laraʼu ba lataba durunia sebua he ba danga hegöi ba gahenia.
7 Aefa daʼö imane Adoni-beseki, ”So 70 razo si no utaba tuturu tanga awö duturu kahe sebua, sangozaragö akhökhöla gö barö mezagu. Isulöni khögu Lowalangi moloʼö amuatagu.” Lö ara, laʼohe ia ba Yeruzalema+ ba laröi ia ba daʼö.
8 Aefa daʼö, lasuwö ba larabu mbanua Yeruzalema+ ira niha Yehuda. Labunu nono mbanuania faoma föda ba latunu mbanua daʼö.
9 Ba lasuwö göi niha Ganaʼana si toröi ba mbanua si so ba hili hegöi ba mbanua Negebi ba Sefela.+
10 Lasuwö nasa niha Ganaʼana si toröi ba Heberona, nifotöi Kiriati-araba ba zilalö, ba lakalaisi Zezai, Ahima ba Talamai.+
11 Moroi ba daʼö lasuwö mbanua Debira.+ Me mböröta lafotöi ia Kiriati-zeferi.+
12 Aefa daʼö imane Kalebi,+ ”Ubeʼe nonogu sotöi Akhesa ba niha sokalaisi hegöi sorabu Kiriati-zeferi.”+
13 Sorabu banua daʼö Otenieli+ ono Genasi+ akhi Galebi. Börö daʼö, ibeʼe nononia andrö Kalebi sotöi Akhesa tobali foʼomo Otenieli.
14 Me mangawuli Gakhesa, ifaso Gotenieli wangandrö si sagörö benua khö namania. Aefa daʼö, möi tou Gakhesa moroi ba galidenia.* Isofu khönia Kalebi, ”Hadia zomasiʼö?”
15 Imane khönia Akhesa, ”Beʼe khögu mbuala. No öbeʼe khögu sagörö mbenua tanö raya,* iadaʼa beʼe khögu göi Guloti-mai.* Ibeʼe Kalebi khönia Guloti Tanö Yawa hegöi Guloti Tanö Tou.
16 Mofanö ngaʼötö niha Geni+ ama matua Moze+ hegöi ira niha Yehuda, laröi mbanua geu khorema*+ möi ira ba Danö si Mate Yehuda tanö raya Garadi+ ba toröi ira ba mbanua daʼö.+
17 Hizaʼi, fao Yehuda khö dalifusönia Simeoni, lasuwö niha Ganaʼana si toröi ba Zefata ba ladudugö mbanua daʼö.+ Andrö lafotöi mbanua daʼö Horama.*+
18 Aefa daʼö zui, möi Yehuda worabu Gaza,+ Asekalo,+ ba Ekerona+ awö mbanua si fasui khöra.
19 Fao Yehowa khö Yehuda, ba larabu mbanua si so ba hili. Tebai lafofanö niha mbanua si so ba ndraso börö me so khöra gureta wasuwöta nifosabi.*+
20 Labeʼe Heberona khö Galebi simane nifabuʼu Moze,+ ba ifofanö Kalebi nono Genaki si datölu moroi ba daʼö.+
21 Hizaʼi, niha Mbeniami tebai lafofanö niha Yebusi si toröi ba Yeruzalema. Irugi maʼökhö toröi niha Yebusi ba gotalua niha Mbeniami ba Yeruzalema.+
22 Gasa-gasa daʼö möi ngaʼötö Yosefo+ ba wolawa Betieli, ba fao khöra Yehowa.+
23 Lafauze-fauzei Mbetieli ngaʼötö Yosefo, nifotöi Lusi ba zilalö.+
24 Laʼila ira samauze samösa ndra matua si otarai mbanua andrö ba lamane khönia, ”Maʼandrö tolo khöu, ombakhaʼö khöma lala si möi ba mbanua sebua, ba mahakhösi tödö ndraʼugö.”*
25 Iforomaʼö khöra ira matua andrö lala si numalö ba mbanua sebua ba labunu fefu niha ba mbanua daʼö faoma föda, hizaʼi latehegö auri ndra matua daʼö awö nösi nomonia.+
26 Mofanö ndra matua daʼö ba mbanua niha Kheti, ba daʼö ifazökhi mbanua sebua ba ifotöi Lusi. Daʼö döi mbanua andrö irugi maʼökhö.
27 Lö irabu Manase mbanua Mbeti-zeana, Taʼanakhi+ hegöi banua ba zi fasuinia. Lö göi lakalaisi mbanua Dora, Yibelea, Megido awö mbanua ba zi fasuinia.+ Lö omasi mofanö niha Ganaʼana, toröi manö ira ba soi daʼö.
28 Me itugu abölö ndraono Gizaraʼeli, lafaso niha Ganaʼana wohalöwö ba laʼosawuyu,+ hizaʼi lö lafofanö fefu.+
29 Simanö göi niha Geferai, lö lafofanö niha Ganaʼana si toröi ba Gezeri. Lö tebulö toröi khöra niha Ganaʼana ba Gezeri.+
30 Lö ifofanö Sebuloni niha Giterono hegöi Nahaloli.+ Lö tebulö toröi khöra ba daʼö niha Ganaʼana, lafaso wohalöwö ba laʼosawuyu.+
31 Lö ifofanö Aseri niha Ako, Sidona,+ Ahalaba, Akhisibi,+ Heleba, Afika+ ba Rehobo.+
32 Lö tebulö toröi niha Gaseri ba gotalua niha Ganaʼana si so ba daʼö, börö me lö lafofanö ira.
33 Lö ifofanö Nafetali niha Mbeti-zamesi hegöi niha Mbeti-anata.+ Lö tebulö toröi manö ira ba mbanua andrö fao ba niha Ganaʼana.+ Lafaso wohalöwö ba laʼosawuyu niha Mbeti-zamesi awö Mbeti-anata.
34 Lö latehe ira niha Gamori na mofanö niha Dano moroi ba mbanua si so ba hili. Lö latehegö möi mitou niha Dano ba ndraso.+
35 Lö omasi mofanö niha Gamori ba toröi manö ira ba Hili Heresi, Ayalona,+ ba Saʼalibi.+ Hizaʼi lafaso ira wohalöwö me no tedou waʼabölö* ngaʼötö Yosefo.*
36 Banua Gamori tebörögö moroi ba Hili Nakerabi,+ moroi ba mbanua Zela irugi miyawa.
Nisura ba gahe zura
^ Mazui ”No ubeʼe ba dangania”.
^ Mazui te ”ibözi dawo-tawo me so ia ba hulu galide”.
^ Mazui ”ba Negebi”.
^ Eluahania ”Tanö Soya Idanö”.
^ Yaʼia daʼö Yerikho.
^ Eluahania ”Nahia si No Mutatugöi Enaʼö Mufakiko”.
^ Sin.: ”gureta siʼöli”.
^ Mazui ”maforomaʼö khöu waʼomasi si lö faröi”.
^ Sin.: ”waʼabua”.
^ Sin.: ”danga ngaʼötö Yosefo”.
