Sanguhuku 10:1-18
10 Me no mate Gabimelekhi, ono Wua sotöi Tola maʼuwu Dodo, niha Gisasari tobali sangefaʼö iraono Gizaraʼeli.+ Toröi ia ba mbanua Zamiri ba mbanua si so ba hili Geferai.
2 Tobali ia sanguhuku ba ndraono Gizaraʼeli 23 fakhe. Aefa daʼö, mate ia ba lakoʼo ba mbanua Zamiri.
3 Me no aefa mate ia, Yaʼiri niha Gileadi zi tobali sanguhuku ba ndraono Gizaraʼeli 22 fakhe.
4 So khönia 30 nono matua, laʼokhögö 30 ngaʼeu galide ba 30 ngawua mbanua si so ba Gileadi, lafotöi mbanua daʼö irugi iadaʼa Hawoti-yaʼiri.+
5 Aefa daʼö mate Yaʼiri ba lakoʼo ba Gamono.
6 Lafuli zui lafalua zi lö sökhi iraono Gizaraʼeli föna Yehowa+ ba labörögö wamosumange Baʼali,+ adu Asaroti hegöi lowalangi Garamo,* lowalangi Zidona, lowalangi Moabi,+ lowalangi niha Gamoni+ awö lowalangi niha Wilisiti.+ Laröi Yehowa ba lö lafosumange ia.
7 Mofönu sibai Yehowa ba ndraono Gizaraʼeli ba ilulu ira ba danga niha Wilisiti hegöi ba danga niha Gamoni.+
8 Ba ndröfi daʼö, lafakao ba lafaki dödö ndraono Gizaraʼeli. Sagötö ba zi 18 fakhe, lafakao ndraono Gizaraʼeli si so ba zinga Nungo Nidanö Yoridano. Daʼö mböröta mbanua niha Gamori si so ba mbanua Gileadi.
9 Asese göi laʼötö Nungo Nidanö Yoridano niha Gamoni ba wolawa niha Yehuda, Beniami hegöi ngaʼötö Geferai. Sindruhu-ndruhu wa tefakao ndraono Gizaraʼeli.
10 Aefa daʼö laʼandrö wanolo moroi khö Yehowa+ ba lamane, ”No mafalua horö fönau, börö me no faröi ndraʼaga khö Lowalangima ba mafosumange Mbaʼali.”+
11 Hizaʼi, imane Yehowa ba ndraono Gizaraʼeli, ”Hadia tenga no uʼefaʼö ami moroi ba danga niha Miserai,+ moroi ba danga niha Gamori,+ niha Gamoni, niha Wilisiti,+
12 niha Zidona, niha Gamaleki hegöi niha Midiano me lafakao ami? Me miʼandrö wanolo, uʼefaʼö ami moroi ba dangara.
13 Hizaʼi, faröi ami khögu ba mifosumange lowalangi böʼö.+ Andrö wa lö utolo ami saʼae.+
14 Miʼandrö wanolo khö lowalangi si no mifili andrö,+ akha yaʼira zangefaʼö yaʼami na tefakao ami.”+
15 Lamane iraono Gizaraʼeli khö Yehowa, ”No mafalua horö. Falua gofu hadia ia zomasiʼö khöma, hizaʼi maʼandrö khöu, efaʼö ndraʼaga maʼökhö.”
16 Aefa daʼö, latiboʼö nadu lowalangi tanö böʼö si so khöra ba lafosumange Yehowa,+ irege ahakhö dödönia wamaigi famakao ndraono Gizaraʼeli.+
17 Ba gafuriata, owulo niha Gamoni+ ba lafazökhi nosera ba Gileadi. Ba owulo göi ndraono Gizaraʼeli ba lafazökhi nosera ba Misefa.
18 Fefu niha Gileadi hegöi ira sondröniaʼö faoma lamane khö nawöra zamösana, ”Haniha zi oföna fasuwö ba wolawa niha Gamoni?+ Niha si oföna fasuwö, tobali ia satua mbanua ba Gileadi.”
Nisura ba gahe zura
^ Mazui ”Ziria”.
