Sanguhuku 12:1-15
12 Ba owulo niha Geferai numalö ira ba Zafono.* Lamane khö Yefita, ”Hana wa lö mifaogö ndraʼaga ba wolawa niha Gamoni?+ Matunu ndraʼugö fabaya omou.”
2 Imane khöra Yefita, ”Yaʼo hegöi niha si fao khögu, fao ira ba wasuwöta sebua ba wolawa niha Gamoni. No uʼandrö tolo khömi, hizaʼi lö miʼefaʼö ndraʼo ba dangara.
3 Börö me lö mitolodo, uhalö gangetula ba wanehegö nosogu ba wolawa niha Gamoni.+ Aefa daʼö, ibeʼe ba dangagu ira Yehowa. Hana wa möi ami khögu iadaʼa ba wolawa yaʼo?”
4 Iʼowuloi fefu niha Gileadi+ andrö Yefita ba wolawa niha Geferai. Kala niha Geferai ba danga niha Gileadi, sangumaʼö khöra me mböröta, ”Yaʼami niha Gileadi, hewaʼae ba Geferai hegöi ba Manase toröi ami, ha soloi ami moroi ba Geferai.”
5 Ba larabu nahia wangötö idanö ba Nungo Nidanö Yoridano+ andrö ira niha Gileadi ba lataha niha Geferai sedöna moloi. Na imane niha Geferai, ”Tehegö khögu wangötö idanö andrö,” ba manofu niha Gileadi, ”Hadia niha Geferai ndraʼugö?” Na imane tenga,
6 ba lamane khönia, ”Tandraigö waʼö Skhibolet.” Hizaʼi niwaʼönia dania ”Sibolet”, börö me lö laʼila latötöi wehede daʼö niha Geferai. Aefa daʼö, laraʼu ba labunu ia ba nahia wangötö idanö andrö ba Nungo Nidanö Yoridano. Me luo daʼö, 42.000 niha Geferai zi mate.
7 Yefita niha Gileadi andrö tobali sanguhuku ba ndraono Gizaraʼeli önö fakhe waʼara, aefa daʼö mate ia ba lakoʼo ia ba mbanuania ba Gileadi.
8 Me no mate Yefita, Ebesana moroi ba Mbetilekhema zi tobali sanguhuku ba ndraono Gizaraʼeli.+
9 So khönia 30 nono matua ba 30 nono alawe. Ibeʼe nihalö nononia alawe khö ndra matua moroi ba nösi nomo niha böʼö ba ihalö 30 ndra alawe tobali foʼomo ndraononia matua. Tobali ia sanguhuku ba ndraono Gizaraʼeli fitu fakhe waʼara.
10 Mate Gebesana ba lakoʼo ia ba Mbetilekhema.
11 Me no mate Gebesana, Elono niha Zebuloni andrö zi tobali sanguhuku ba ndraono Gizaraʼeli fulu fakhe waʼara.
12 Aefa daʼö, mate Gelono niha Zebuloni andrö ba lakoʼo ia ba Nayalona ba danö Zebuloni.
13 Me no mate Gelono, Abedono ono Hileli niha Wiratono andrö zi tobali sanguhuku ba ndraono Gizaraʼeli.
14 So 40 nononia matua ba 30 maʼuwunia ono matua, ba so 70 ngaʼeu galide khöra. Tobali ia sanguhuku ba ndraono Gizaraʼeli walu fakhe waʼara.
15 Aefa daʼö, mate Gabedono ono Hileli niha Wiratono ba lakoʼo ia ba Wiratono, ba danö Geferai ba hili niha Gamaleki.+
Nisura ba gahe zura
^ Mazui te ”laʼötö nungo nidanö tanö yöu”.
