Sanguhuku 13:1-25
13 Lafalua zui zi lö sökhi iraono Gizaraʼeli föna Yehowa+ ba ilulu ira Yehowa ba danga niha Wilisiti+ 40 fakhe waʼara.
2 Me luo daʼö, so niha Zorea+ moroi ba mado Dano+ sotöi Manoa+ ba lö moʼono woʼomonia.+
3 Samuza inötö, möi malaʼika Yehowa khö woʼomo Manoa ba imane, ”Hewaʼae lö irai moʼono ndraʼugö, hizaʼi manabina dania ndraʼugö ba tumbu khöu nono matua.+
4 Böi badu nagu mazui ngawalö duo,+ ba böi a gofu hadia ia zi raʼiö.+
5 Manabina dania ndraʼugö ba tumbu khöu nono matua. Böi taba mbunia,+ börö me tobali ia niha Naziri* khö Lowalangi iʼotarai ba dalu ninania. Yaʼia dania zangefaʼö iraono Gizaraʼeli moroi ba danga niha Wilisiti.”+
6 Aefa daʼö, möi ia itutunö khö woʼomonia, ”No möi khögu genoni Lowalangi sindruhu. Hulö malaʼika Lowalangi sindruhu ia ba sahöli dödögu wamaigi. Lö nisofugu khönia hezo iʼotarai ba lö göi niʼombakhaʼönia töinia.+
7 Hizaʼi imane khögu, ’Manabina dania ndraʼugö ba tumbu khöu nono matua. Böi badu nagu mazui ngawalö duo, ba böi a gofu hadia ia zi raʼiö, börö me tobali niha Naziri dania nono andrö khö Lowalangi iʼotarai ba dalu ninania irugi waʼamatenia.’”
8 Mangandrö Manoa khö Yehowa, ”He Yehowa, hadia tola öfatenge zui khöma genoni Lowalangi sindruhu andrö, enaʼö ifatunö khöma hewisa lala wangebua ono si tumbu andrö dania.”
9 Ifondrondrongo Lowalangi sindruhu wangandrö Manoa, ba ifuli zui möi malaʼika Lowalangi sindruhu andrö khö woʼomo Manoa, si dadao ba nowi. Lö hadöi Manoa me luo daʼö.
10 Iʼanemaiʼö fagohi woʼomonia ba wangombakha khö Manoa, ”Ifuli zui tohare niha si no irai mangondrasi yaʼo.”+
11 Ba möi Manoa iʼoʼö woʼomonia ba wamalukhaisi niha andrö ba imane, ”Hadia yaʼugö zi fahuhuo khö woʼomogu?” Itema li, ”Yaʼia.”
12 Imane Manoa, ”Yaʼitörö fefu niwaʼöu! Hewisa wangebua ono andrö ba hadia halöwönia dania?”+
13 Imane malaʼika Yehowa khö Manoa, ”Yaʼiʼoʼö foʼomomö fefu niwaʼögu khönia me luo daʼö.+
14 Tebai iʼa fefu hadia ia zi otarai ba danömö nagu, tebai ibadu nagu mazui ngawalö duo,+ ba tebai iʼa fefu ngawalö zi raʼiö.+ Yaʼitöngöni fefu hadia niwaʼögu.”
15 Aefa daʼö, imane Manoa khö malaʼika Yehowa, ”Baloi ba daʼa, omasiga mataba öu nono nambi sawuyu-wuyu.”+
16 Imane malaʼika Yehowa khö Manoa, ”Hewaʼae na ubaloi ndraʼugö ba daʼa, ba lö uʼa wöfö gömö. Hizaʼi, na omasi ndraʼugö, beʼe ia tobali sumange nitunu khö Yehowa.” Lö aboto ba dödö Manoa wa malaʼika Yehowa daʼö.
17 Imane Manoa khö malaʼika Yehowa, ”Haniha döimö?+ Na itörö dania niwaʼöu ba mafosumange ndraʼugö.”
18 Hizaʼi, imane khönia malaʼika Yehowa, ”Böi sofu haniha döigu, börö me sahöli-höli dödö döigu andrö.”
19 Ihalö Manoa nono nambi sawuyu-wuyu ba ibeʼe sumange, simanö göi zumange niʼa* ibeʼe khö Yehowa ba dete gara. Aefa daʼö, so zahöli-höli dödö nifalua Lowalangi föna Manoa hegöi föna woʼomonia.
20 Laʼila ira Manoa hegöi foʼomonia galitö si numalö miyawa moroi ba naha wanunu sumange, ba fao malaʼika Yehowa andrö ba hola-hola galitö. Iʼanemaiʼö latuhi danö.
21 Lö saʼae möi malaʼika Yehowa khö Manoa hegöi khö woʼomonia. Awena aboto ba dödö Manoa wa malaʼika Yehowa daʼö.+
22 Imane Manoa khö woʼomonia, ”Si mate saʼae ita me no taʼila Lowalangi.”+
23 Hizaʼi, imane foʼomonia, ”Na sindruhu ibunu ita Yehowa, lö duhu itema zumange nitunu+ hegöi sumange niʼa si no tabeʼe, ba lö göi iʼombakhaʼö mazui iforomaʼö khöda daʼö fefu.”
24 Ba gafuriata, tumbu nono matua khö woʼomo Manoa ba labeʼe töinia Zimesono.+ Itugu ebua nono andrö ba ifahowuʼö ia Yehowa.
25 Ibörötaigö iʼohe ia eheha Yehowa+ ba Mahane-dano*+ ba gotalua Zorea ba Esaʼola.+
Nisura ba gahe zura
^ Eluahania ”niha nilulu faʼauri; niha nifasambua”.
^ Mazui ”zumange bua nowi”.
^ Eluahania ”Ose Mado Dano”.
