Sanguhuku 14:1-20
14 Samuza maʼökhö, möi Zimesono ba Dimena. Ba Dimena andrö iʼila samösa ndra alawe Wilisiti.*
2 Aefa daʼö, ifatunö khö namania hegöi khö ninania, ”Adöni dödögu khö zi samösa ono alawe Wilisiti ba Dimena. Mihalö khögu ia tobali foʼomogu.”
3 Imane amania faoma inania, ”Hadia lö ösöndra woʼomomö moroi ba gotalua ndra talifusöda mazui ba soida?+ Hadia hasambalö öʼalui woʼomomö ba gotalua niha Wilisiti si lö nisuna?” Imane Simesono khö namania, ”Halö ia tobali foʼomogu, daʼö zi tefaudu khögu.”*
4 Lö aboto ba dödö zatuania wa Yehowa zanehegö irege alua daʼa fefu, börö me iʼalui lala ba wolawa niha Wilisiti samatörö iraono Gizaraʼeli me luo daʼö.+
5 Mofanö Zimesono fao ia khö namania ba inania, numalö ira ba Dimena. Me irugi kabu nagu ba Dimena, so sageu zingo siʼao sangondrasi yaʼia.
6 Iʼabölöʼö Zimesono andrö eheha Yehowa+ ba ibunu zingo daʼö, ibagi dua hulö nono nambi, lö fangöna ba dangania. Hizaʼi, lö ifatunö khö namania ba inania nifaluania andrö.
7 Möi ia fahuhuo khö ndra alawe daʼö. Ba wamaiginia, ha daʼö ndra alawe somasi ia.+
8 Ba lö ara, me ifuli ia ba daʼö ba wangai ira alawe andrö,+ möi ia wamaigi amatela zingo si no ibunu ba iʼila oya sibai ba daʼö wewani.
9 Ihalö wewani faoma tangania ba iʼa ba wofanö-fanönia. Me falukha ia khö namania ba inania, ibeʼe öra ba laʼa. Hizaʼi, lö ifatunö wa ba gamatela zingo ihalö wewani daʼö.
10 Möi namania ba wamalukhaisi ira alawe daʼö, ba ilau gowasa Simesono simane si toʼölö lafalua iraono matua me luo daʼö.
11 Ba me irugi Simesono, so 30 ndraono matua si fao khönia.
12 Imane khöra Simesono, ”So dahö-dahögu khömi. Na tola mitahö geluahania ba zi fitu hari owasa andre, ubeʼe khömi 30 ngawua nukha si sökhi ba 30 fasa mbaru.
13 Na tebai mitahö geluahania, ba yaʼami zameʼe khögu 30 ngawua nukha si sökhi ba 30 fasa mbaru.” Lamane, ”Lau. Hadia dahö-dahömö?”
14 Imane khöra,
”Moroi ba zi manga, alua niʼa,Moroi ba zabölö, alua zami.”+
Me no irugi tölu hari, lö lasöndra geluaha dahö-dahö andrö.
15 Me no öfa hari, lamane khö woʼomo Zimesono, ”Akali woʼomomö+ enaʼö iʼombakhaʼö khöma geluaha dahö-dahönia. Na löʼö, matunu ndraʼugö fabaya omo namau. Hadia mikaoni ndraʼaga ba daʼa ba worabu yaʼaga?”
16 Mege-ege woʼomo Zimesono fönania ba imane, ”Fatuwu khöu ndraʼo. Lö öʼomasiʼö ndraʼo.+ Öbeʼe dahö-dahö ba soigu ba lö öʼombakhaʼö khögu geluahania.” Imane Simesono, ”Khö namagu manö faoma inagu ba lö uʼombakhaʼö. Hana wa uʼombakhaʼö khömö?”
17 Ba mege-ege ia khö Zimesono sagötö zi fitu hari owasa andrö. Ba me no fitu hari, iʼombakhaʼö khönia Simesono geluaha dahö-dahö andrö börö me iforege wangumaʼö. Aefa daʼö, ifatunö geluaha dahö-dahö andrö ba soinia.+
18 Me no fitu hari fatua lö aekhu luo,* lamane niha mbanua daʼö khö Zimesono,
”Hadia zabölö ami moroi ba wewani?Hadia so zabölö moroi ba zingo?”+
Imane Simesono,
”Na lö miʼandrö wanolo moroi khö woʼomogu,*+Ba lö miʼila geluaha dahö-dahögu.”
19 Ba iʼabölöʼö ia eheha Yehowa+ irege mofanö ia ba Gasekalo,+ ibunu 30 ndra matua ba daʼö, ihalö nukhara ba ibeʼe ba niha sanahö dahö-dahönia andrö.+ Mangawuli ia ba nomo namania si fao faʼaukhu dödö.
20 Aefa daʼö, lahalö woʼomo Zimesono+ labeʼe khö zi samösa ono matua si fao khönia.+
Nisura ba gahe zura
^ Sin.: ”ndra alawe moroi ba gotalua nono alawe sato ba Wilisiti”.
^ Sin.: ”zi tefaudu ba hörögu”.
^ Mazui te ”fatua lö möi ia si bakha ba mbateʼe”.
^ Sin.: ”na lö mifaku laza faoma ono zawi sawuyu-wuyu khögu”.
