Sanguhuku 15:1-20
-
Ilau mbalönia Simesono ba niha Wilisiti (1-20)
15 Lö ara aefa daʼö me inötö wamasi gandru, möi ifalukhaisi woʼomonia Simesono iʼohe sageu nono nambi. Imane, ”Omasido ufalukhaisi woʼomogu si bakha ba mbateʼe.” Hizaʼi, lö itehe khönia amania matuania.
2 Imane amania matuania, ”Uwalinga fatuwu khöu ia.+ Andrö wa ubeʼe ia ba nono matua si fao khömö.+ Halö nakhinia. Abölö baga nasa daʼö.”
3 Imane Simesono, ”Sakali daʼa tebai latahigö ndraʼo ira niha Wilisiti na usuwö ira.”
4 Aefa daʼö, mofanö Zimesono möi ia iraʼu 300 ngaʼeu nasu gatua.* Ihalö solo ba ifaböbö giʼo nasu gatua andrö dua-dua rozi, ba sara-sara ibeʼe solo ba gotalua giʼo andrö si dua-dua rozi.
5 Itunu solo andrö ba iʼefasi nasu gatua daʼö fefu numalö ba nowi gandru niha Wilisiti. Ahori itunu gandru si no laʼowuloi, simanö göi zi so ba nowi, awö kabu nagu fabaya kabu zaitu.
6 Manofu niha Wilisiti, ”Haniha zamalua daʼa?” Ba lafatunö khöra, ”Simesono umönö niha Dimena andrö, börö me no ibeʼe amania matuania woʼomonia khö nono matua si fao khönia.”+ Börö daʼö, latunu ndra alawe andrö hegöi amania.+
7 Imane khöra Simesono, ”Börö me simane daʼa nifaluami, lö uhonogö manö ndraʼo. Hasambalö usulöni khömi.”+
8 Iböbözi ba ibunu ira samö-samösa, aefa daʼö mofanö ia isawa dögi narö hili si so ba Hili Sokara Getama.
9 Ba gafuriata, tohare niha Wilisiti ba lafazökhi nosera ba Yehuda ba lafasui mbanua Lehi.+
10 Lamane ira niha Yehuda, ”Hana wa misuwö ndraʼaga?” Latema li, ”Möiga ba wondraʼu* Simesono, malau mbalöma khönia.”
11 Börö daʼö, so 3.000 niha Yehuda zi möi ba dögi narö hili si so ba Hili Sokara Getama. Lamane khö Zimesono, ”Hadia lö öʼila wa niha Wilisiti zamatörö yaʼita?+ Hana wa öfalua daʼa khöma?” Imane Simesono, ”Omasido ulau mbalögu khöra.”
12 Hizaʼi lamane khönia, ”Maraʼu* ndraʼugö ba mabeʼeʼö ba danga niha Wilisiti.” Imane Simesono, ”Miʼae ba hölu khögu wa lö mibunu ndraʼo.”
13 Lamane khönia, ”Ha asala maböbö ba mabeʼe ndraʼugö ba dangara. Lö mabunu ndraʼugö.”
Laböbö ia faoma sinali si bohou dua rozi, ba laʼohe ia baero moroi ba dögi narö hili andrö.
14 Me ofeta ia ba mbanua Lehi, lakila waʼiki ira niha Wilisiti me laʼila ia. Lö ara, iʼabölöʼö ia eheha Yehowa+ irege sinali famöbö dangania hulö mbana sakhozi, ba atoto mböbö dangania andrö.+
15 Aefa daʼö, isöndra sambua döla zimbi galide si matua si bohou mate, ihalö ba iʼogunaʼö ba wamunu si 1.000 niha.+
16 Imane Simesono,
”Börö döla zimbi galide andre, no ubunu nudu ba ufalaete tou ba danö gamatelara!
Börö döla zimbi galide andre so 1.000 niha nibunugu.”+
17 Me no aefa iwaʼö daʼö, itiboʼö döla zimbi andrö ba ifotöi nahia daʼö Ramata-lehi.*+
18 Me owökhi dödönia, mangandrö ia khö Yehowa, ”Yaʼugö zameʼe fangorifi sebua khö genonimö andre. Iadaʼa, hadia mate ndraʼo ba waʼowökhi dödö ba ölulu ba danga niha si lö nisuna?”
19 Ba ibokai sambua mbawa danö ba Lehi andrö Lowalangi irege mangumbu nidanö.+ Me ibadu nidanö Simesono, mangawuli waʼabölönia ba ohahau dödönia. Daʼö mbörö wa ifotöi nahia daʼö Eni-hakore,* si so ba Lehi irugi iadaʼa.
20 Tobali ia sanguhuku ba ndraono Gizaraʼeli ba götö niha Wilisiti, 20 fakhe waʼara.+
Nisura ba gahe zura
^ Hulö nasu. Adogo-dogo gahe, ebolo dalinga, ba onekhe.
^ Mazui ”ba wamöbö”.
^ Mazui ”Maböbö”.
^ Eluahania ”Hili Töla Zimbi”.
^ Eluahania ”Umbu Nidanö Niha Soʼangaröfili”.
