Sanguhuku 16:1-31
16 Samuza maʼökhö, möi Zimesono ba Gaza ba iʼila ba daʼö samösa ndra alawe sohorö-horö, ba möi ia ifalukhaisi.
2 Laʼombakhaʼö ba niha Gaza, ”No tohare Zimesono.” Andrö, lafaʼuʼu ia ba sara wongi labaloi baero ba mbawa göli. Lö hede-hedera ba zi sara wongi daʼö ba lamane, ’Na ibörögö moluo, ba daʼö tabunu ia.’
3 Itohugö manö wemörö ba daʼö Simesono irugi talu mbongi. Maoso ia me talu mbongi, ba ideha fefu mbawa göli mbanua fabaya ehomo hegöi folazi. Iʼonoro fefu ba ibeʼe ba galisinia ba iʼohe ba zuzu hili tanö yefo Heberona.
4 Lö ara, omasi ia khö zi samösa ira alawe ba Ndraso Zoreki. Töinia Delila.+
5 Ba laʼondrasi ndra alawe daʼö ira samatörö banua Wilisiti, lamane khönia, ”Haogö wangai tödönia,*+ sofu hadia mbörö wa abölö sibai ia ba hewisa lala enaʼö tola taböbö ba takalaisi ia. Ero samösa dania mabeʼe khöu 1.100 ngawua loga firö.”
6 Imane Delila khö Zimesono, ”Fatunö khögu hadia mbörö wa abölö sibai ndraʼugö, ba hadia zi tola muʼogunaʼö ba wamöbö hegöi ba wokalaisi yaʼugö.”
7 Imane Simesono, ”Na laböbö ndraʼo faoma sinali wana si bohou* fitu rozi, alö waʼabölögu simane niha si toʼölö.”
8 Ba labeʼe khö Delila fitu rozi zinali wana si bohou ira samatörö banua Wilisiti, daʼö niʼogunaʼö Delila ba wamöbö Simesono.
9 Labiniʼö ira ba mbateʼe ndra alawe andrö ira niha Wilisiti ba wondraʼu Simesono. Ba imane Delila, ”He Simesono, tohare niha Wilisiti!” Me irongo daʼö Simesono, aoha sibai khönia wangetuʼö sinali wana andrö hulö mbana sakhozi.+ Lö sangila hadia mbörö wa abölö sibai ia.
10 Aefa daʼö, imane Delila khö Zimesono, ”No ölimodo ba ömaikö ndraʼo. Fatunö khögu bale, hadia zi tola muʼogunaʼö ba wamöbö yaʼugö?”
11 Imane Simesono, ”Na laböbö ndraʼo faoma sinali si bohou si lö irai muʼogunaʼö, alö waʼabölögu simane niha si toʼölö.”
12 Ihalö zinali si bohou Delila ba wamöbö Simesono. Gasa-gasa daʼö, labiniʼö ira ba mbateʼe ndra alawe andrö ira niha Wilisiti ba wondraʼu yaʼia. Aefa daʼö imane Delila, ”He Simesono, tohare niha Wilisiti!” Me irongo daʼö Simesono, iʼetuʼö zinali böbö dangania hulö na iʼetuʼö mbana.+
13 Imane Delila khö Zimesono, ”No ölimodo zui ba ömaikö ndraʼo.+ Fatunö khögu, hadia zi tola muʼogunaʼö ba wamöbö yaʼugö.” Imane Simesono, ”Fakhai mbugu niʼofitu fondrandra faoma bana niʼogunaʼö ba wanoso.”
14 Iʼaroʼö wamakhai bu Zimesono si no mundrandra andrö Delila faoma taru-taru niʼogunaʼö ba wanoso. Aefa daʼö imane, ”He Simesono, tohare niha Wilisiti!” Maoso Zimesono ba naha wemörö ba idöni daru-taru fabaya bana wanoso andrö ba högönia.
15 Imane Delila, ”Hana wa öwaʼö, ’omasido ndraʼugö’,+ sindruhunia tenga yaʼo duho dödöu? No tölu kali ömaikö ndraʼo. Lö öfatunö khögu hadia mbörö wa abölö sibai ndraʼugö.”+
16 Ero maʼökhö, lö iböhöli wege-ege Delila irege alangu dödö Zimesono ba iʼandrö waʼamate.+
17 Ba gafuriata, ibokai nösi dödönia Simesono khö ndra alawe andrö imane, ”Lö irai lataba mbugu andre iʼotarai me tumbu, börö me tobali niha Naziri ndraʼo khö Lowalangi.+ Na lataba mbugu, alö waʼabölögu ba atata dölagu simane niha sato.”
18 Me iʼila Delila wa no ibokai nösi dödönia Simesono, ifakaoniʼö ndra samatörö banua Wilisiti.+ Imane, ”Miʼaine, no ibokai nösi dödönia khögu sakali daʼa.” Tohare ira ba laʼohe gefe.
19 Ifeförö ba gahetania Zimesono ba ikaoni niha Delila enaʼö lataba mbu Zimesono si no muʼofitu fondrandra. Tola ifatörö ia Delila börö me no taya waʼabölönia.
20 Imane Delila, ”He Simesono, tohare niha Wilisiti!” Maoso Zimesono ba imane, ”Ufalua zimane nifaluagu ba zilalö+ ba uʼefaʼö ndraʼo.” Lö aboto ba dödönia wa no iröi ia Yehowa.
21 Laraʼu ia ira niha Wilisiti ba lakoe nono hörönia si dombua. Aefa daʼö, laʼohe ia ba Gaza, labeʼe khönia dua rozi rate tembaga famöbönia ba tobali ia sogili gandru ba gurunga.
22 Hizaʼi, ibörötaigö anau mbunia si no mutaba.+
23 Samuza maʼökhö, owulo ndra samatörö banua Wilisiti ba wamalua owasa ba labeʼe zumange sebua khö lowalangira Dagono.+ Lamane, ”Si faʼudu khöda andrö Simesono, no ibeʼe ia ba dangada lowalangida!”
24 Me laʼila Zimesono ira niha sato, lasuno lowalangira ba lamane, ”Si faʼudu khöda andrö, no ibeʼe ia ba dangada lowalangida, udu samakiko soida+ ba samunu awöda.”+
25 Börö waʼomuso dödöra lamane, ”Mikaoni Zimesono enaʼö terara dödöda.” Ba laʼohe baero Zimesono moroi ba gurunga enaʼö tobali ia famaʼiki niha sato. Lafezizio ia ba gotalua gehomo.
26 Ba imane Simesono khö nono matua sololohe yaʼia, ”Akha utendroʼö ndraʼo ba gehomo sanuwu tomosa andre.”
27 Me luo daʼö, afönu nahia andrö ira matua hegöi ira alawe. So ba daʼö fefu ndra sondröniaʼö banua Wilisiti ba mato 3.000 niha zi so yawa ba dete domosa daʼö samaigi-maigi ba sangoʼaya Simesono.
28 Ba muʼao Zimesono+ khö Yehowa, ”He Yehowa Lowalangi Fondrege Zalawa, tolo ndraʼo. Törö tödöu ndraʼo ba beʼe khögu waʼabölö sakali daʼa.+ He Lowalangi, tehegö khögu wanulöni niha Wilisiti andre, sulö moroi ba hörögu si no lakoe hewaʼae na ha tambai.”+
29 Aefa daʼö, ilulugö Simesono gehomo si dua rozi sanuwu tomosa andrö, sara ba gambölönia ba sara ba gabera.
30 Imane Simesono, ”Yafao ndraʼo waʼamate khö ndra niha Wilisiti!” Ilulugö gehomo si dua rozi andrö saʼoi dölania, ba adudu domosa andrö, ilangögö ndra sondröniaʼö ba fefu niha si so ba daʼö.+ Ato zi mate nibununia ba gafuriata waʼaurinia moroi ba nibununia sagötö auri ia.+
31 Ba gafuriata, tohare fefu ndra talifusönia awö nösi nomo namania, laʼohe gamatelania mangawuli. Lakoʼo ia ba lewatö namania Manoa,+ ba gotalua mbanua Zorea+ ba Esaʼola. Tobali ia sanguhuku ba ndraono Gizaraʼeli 20 fakhe waʼara.+
