Sanguhuku 18:1-31
18 Me luo daʼö, lö hadöi razo ba ndraono Gizaraʼeli.+ Laʼalu-alui danö ondröita khöra ira mado Dano+ si tobali nahia waʼatoröira börö me lö nisöndrara tanö ondröita ba gotalua mado ndraono Gizaraʼeli.+
2 Lafatenge dalima niha Dano sabeʼe dödöra moroi ba nösi nomora si otarai Zorea ba Esaʼola+ ba wamauze soi daʼö enaʼö laʼanöröi. Lamane khöra, ”Miʼaeʼe, miʼanöröi mbanua andrö.” Me möi ira ba mbanua si so ba hili Geferai, ba mörö ira ba nomo Mikha.+
3 Me ahatö ira ba nomo Mikha, larongo li* nono matua niha Lewi andrö. Laʼondrasi ia ba lamane, ”Haniha zolohe yaʼugö ba daʼa? Hadia nifaluamö ba daʼa? Hana wa toröiʼö ba daʼa?”
4 Imane, ”Mikha zamalua daʼa, ba nifaluania andre soguna khögu, igazi ndraʼo enaʼö tobalido ere khönia.”+
5 Aefa daʼö lamane khönia, ”Maʼandrö khöu, sofu khö Lowalangi hadia mofozu wofanöma andre.”
6 Imane ere andrö, ”Ofanö, yaʼohahau dödöu. Fao khömi Yehowa ba lala wofanömi.”
7 Börö daʼö, mofanö niha si dalima andrö ba ofeta ira ba Laʼisi.+ Laʼila waʼauri niha ba daʼö simane faʼauri niha Zidona, lö laʼodaligö nawöra niha. Ohahau dödöra ba lö sataʼu ira,+ lö hadöi samatörö ba mbanuara samakao mazui sametaʼu yaʼira. Fandröndröu ira moroi ba niha Zidona ba lö amakhaitara ba niha böʼö.
8 Me mangawuli ira khö ndra talifusöra ba Zorea faoma ba Esaʼola,+ lamane ira talifusöra, ”Hadia niʼilami?”
9 Lamane, ”Aine, datasuwö ira börö me sökhi sibai wamaigima soi daʼö. Böi aombö dödömi. Miʼaliokö, datarabu soi daʼö.
10 Ba daʼö dania miʼila niha si lö abula dödö+ awö danö sebolo, nahia si lö moʼamböta gofu hadia ia ba gulidanö. No ibeʼe ira ba dangami Lowalangi.”+
11 Mofanö zi 600 niha moroi ba Zorea ba Esaʼola+ moroi ba nösi nomo Dano si no mamaʼanö yaʼira ba wasuwöta.
12 Lafazökhi nosera sahatö ba Giriati-yeari+ ba Yehuda. Daʼö mbörö wa mufotöi nahia si so tanö ba gaekhula Giriati-yeari, Mahane-dano*+ irugi iadaʼa.
13 Laʼotarai daʼö, numalö ira ba mbanua si so ba hili Geferai ba larugi nomo Mikha.+
14 Ba mohede zi dalima andrö si no irai mamauze banua Laʼisi,+ lamane khö ndra talifusöra, ”Hadia miʼila wa so ba nomo daʼa nukha gere,* terafi,* adu nitoto hegöi adu nifazökhi moroi ba loga?*+ Miʼangeragö hadia nifaluami.”
15 Tebato ira ba daʼö ba larugi nomo niha Lewi andrö,+ sahatö ba nomo Mikha, ba lasofu duriania.
16 Gasa-gasa daʼö, no mozizio niha Dano si 600+ ba mbawa göli mbanua ba no lafaʼanö ira ba wasuwöta.
17 Möi zi dalima andrö si no irai mamauze banua daʼö+ ba lahalö nadu nitoto, nukha gere,*+ terafi*+ hegöi adu nifazökhi moroi ba loga.*+ Mosindro gere andrö+ ba mbawa göli fao ia ba niha si 600 si no mamaʼanö yaʼira ba wasuwöta.
18 Möi ira ba nomo Mikha ba lahalö nadu nitoto, nukha gere,* terafi* hegöi adu nifazökhi moroi ba loga.* Imane khöra ere, ”Hana wa mifalua daʼa?”
19 Hizaʼi lamane khönia, ”Honogöʼö. Duhö mbawau ba oʼö ndraʼaga enaʼö tobali ndraʼugö sanuturu lala* ba ere khöma. Hezo zabölö omasiʼö, tobali ere ba zi samösa niha+ mazui ere ba zi sambua omo hegöi ba zi sambua mado ndraono Gizaraʼeli?”+
20 Omuso dödö gere andrö, ihalö nukha gere,* terafi* hegöi adu nitoto,+ ba fao ia khöra wofanö.
21 Aefa daʼö, latohugö wofanö ba labeʼe tanö föna ndraonora, urifö hegöi gama-gamara sebua böli.
22 Me no fandröndröu ira moroi ba nomo Mikha, möi niha si so ba zi fasui omo Mikha lagoʼö niha Dano.
23 Muʼao ira ba niha Dano irege lafaigi furi ba lamane khö Mikha, ”Hadia zalua? Hana wa ato sibai ami zi möi ba daʼa?”
24 Imane khöra Mikha, ”No mihalö lowalangigu si no ufazökhi, ba fao ami ba gere andrö khögu. Lö hadöi saʼae niʼokhögögu. Ba hana wa miwaʼö, ’Hadia zalua?’”
25 Lamane ira niha Dano, ”Böi fetaʼuga. Tola manö aukhu dödö ndra niha daʼa khöu ba labunuʼö hegöi ösi nomou.”
26 Aefa daʼö, latohugö wofanö ira niha Dano ba mangawuli Mikha ba nomo börö me iʼila wa tebai ilawa ira.
27 Me no lahalö lowalangi nifazökhi Mikha hegöi erenia, mofanö ira ba Laʼisi,+ ba niha si so faʼahono dödö ba si lö moʼamböta.+ Labunu niha ba mbanua andrö faoma föda ba latunu mbanua daʼö.
28 Lö si tola mangefaʼö banua daʼö, börö me fandröndröu ia moroi ba Zidona, lö amakhaitara ba soi böʼö, ba tefaudu nahiania ba ndraso Mbeti-rehobo.+ Lafuli lafasindro mbanua daʼö ira niha Dano ba toröi ira ba daʼö.
29 Lafotöi mbanua daʼö Dano,+ moloʼö töi namara yaʼia daʼö Dano ono Gizaraʼeli.+ Hizaʼi töi mbanua daʼö mböröta Laʼisi.+
30 Aefa daʼö, lafasindro khöra nadu nitoto+ andrö ira niha Dano, ba latuyu Yonata+ ono Geresomo+ ono Moze hegöi ngaʼötöra tobali ere ba mado Dano irege teʼoloiʼö ira ba soi böʼö.
31 Lafasindro nadu nitoto andrö nifazökhi Mikha, ba daʼö manö so nadu andrö sagötö so nomo Lowalangi sindruhu ba Zilo.+
Nisura ba gahe zura
^ Mazui ”lagu wehede”.
^ Eluahania ”Ose Mado Dano”.
^ Mazui ”efod”. Daʼa mbaru sebua si so tanö föna ba tanö furi.
^ Mazui ”adu nösi nomo”.
^ Mazui ”adu nifahele”.
^ Mazui ”adu nifahele”.
^ Mazui ”adu nösi nomo”.
^ Mazui ”efod”. Daʼa mbaru sebua si so tanö föna ba tanö furi.
^ Mazui ”efod”. Daʼa mbaru sebua si so tanö föna ba tanö furi.
^ Mazui ”adu nösi nomo”.
^ Mazui ”adu nifahele”.
^ Mazui ”ama”.
^ Mazui ”efod”. Daʼa mbaru sebua si so tanö föna ba tanö furi.
^ Mazui ”adu nösi nomo”.
