Sanguhuku 19:1-30
-
Mohorö niha Mbeniami ba Gibea (1-30)
19 Me luo daʼö, me lö hadöi razo ba ndraono Gizaraʼeli,+ so samösa niha Lewi si toröi ba mbanua si so ba hili Geferai.+ Ihalö samösa ndra alawe moroi ba Mbetilekhema+ ba Yehuda ba ibaliʼö foʼomonia ba döi.
2 Hizaʼi, iröi ia foʼomonia ba döi andrö, mofanö ia ba nomo namania ba Mbetilekhema ba Yehuda. Ba daʼö toröi ia öfa waŵa waʼara.
3 Ba möi igoʼö ia foʼomonia ihaogö wehede enaʼö mangawuli ia. Möi woʼomonia ba iʼohe zawuyunia ira matua ba dua ngaʼeu galide. Me irugi nomo namania matuania, ifaʼamöi ia yomo ira alawe andrö, ba omuso dödö nama ndra alawe daʼö me falukha ira.
4 Iʼandrö khönia amania matuania, ama ndra alawe andrö enaʼö toröi ia tölu hari. Manga ira ba mamadu, ba mörö ia ba daʼö.
5 Ba ngaluo si öfa, me maoso ira sihulö wongi ba mofanö ira menaʼö, imane ama ndra alawe andrö khö numönönia, ”Lau manga fatua lö mofanöʼö, enaʼö abölö ndraʼugö.”
6 Modadao ira ba lalau manga ba mamadu. Imane ama ndra alawe andrö khö numönönia, ”Ba daʼa manö förö ba omusoiʼö dödöu.”
7 Me edöna mofanö ndra matua daʼö, iʼandrö khönia amania matuania irege ba daʼö mörö ia zui.
8 Ba ngaluo si lima me maoso ia sihulö wongi ba mofanö ia menaʼö, imane khönia ama ndra alawe andrö, ”Lau manga ua enaʼö abölö ndraʼugö.” Ba no ladaʼi-daʼi manö wemanga darua ira irugi tanö owi.
9 Aefa daʼö, ifaʼanö ia ira matua andrö mofanö ira fao woʼomonia ba döi awö zawuyunia. Hizaʼi, imane amania matuania ama ndra alawe andrö, ”No arakhagö aekhu luo, ogömi maʼifu tö. Ba daʼa manö miförö ba miʼomusoiʼö dödömi. Mihulö wongi mahemolu na mangawuli ami ba nomo.”*
10 Lö omasi saʼae ndra matua andrö na ifuli mörö ia ba daʼö. Mofanö ia ba ofeta ia ba Yebusi yaʼia daʼö Yeruzalema,+ fao woʼomonia ba döi, sawuyunia, ba dua ngaʼeu galide nifosela.
11 No ibörögö ogömi me ahatö larugi mbanua Yebusi. Imane sawuyunia, ”Hewisa na molombase manö ita ba mbanua niha Yebusi, ba daʼö talau mörö?”
12 Imane sokhö yaʼia, ”Tebai molombase ita ba mbanua niha baero na tenga niha Gizaraʼeli. Tatohugö manö wofanö irugi Gibea.”+
13 Imane nasa, ”Aine, möi ita ba nahia daʼö. Ba Gibea talau mörö mazui ba Rama.”+
14 Börö daʼö, latohugö wofanö. No ibörögö aekhu luo me arakhagö larugi Gibea ba danö mado Mbeniami.
15 Molombase ira ba Gibea ba daʼö edöna mörö ira. Lalau modadao ba golayama mbanua, ba lö hadöi niha sogaoni yaʼira ba nomo.+
16 Ba zi bongi daʼö, so samösa ndra matua si no atua sangawuli wohalöwö moroi ba kabu. Yaʼia andrö si fatewu ba Gibea. Ba mbanua si so ba hili Geferai+ mbanuania sindruhu. Mado Mbeniami zi toröi ba mbanua daʼö.+
17 Me iʼila ndra matua si so ba golayama mbanua, imane ira matua satua andrö, ”Hezo numalö ndraʼugö? Hezo öʼotarai?”
18 Imane, ”Maʼotarai Mbetilekhema ba Yehuda numalö ndraʼaga ba mbanua si so ba hili Geferai, banua si tumbu yaʼo. Awena möi ndraʼo ba Mbetilekhema ba Yehuda,+ ba möi ndraʼo iadaʼa ba nomo Yehowa.* Hizaʼi, lö hadöi niha sogaoni yaʼaga ba nomora.
19 So nasa gö galide khöma.+ So göi khögu roti+ ba agu, khö ndra alawe daʼa hegöi khö zawuyuma. Lö hadöi soʼamböta ndraʼaga.”
20 Imane ira matua satua andrö, ”Böi busi dödöu.* Uʼasogö fefu zoguna khömi. Böi miförö ba golayama mbanua.”
21 Iʼohe ira ba nomonia ba ibeʼe gö galide andrö. Aefa daʼö, lasasai gahera ba lalau manga ba mamadu.
22 Gasa-gasa waʼomuso dödöra, tohare ndra matua si lö sökhi ba mbanua daʼö, lafasui nomo ba lafadögö-dögö mbawandruhö. Lamane khö ndra matua satua sokhö omo, ”Ohe baero ndra matua si so ba nomomö andrö, enaʼö mohorö ndraʼaga khönia.”+
23 Möi baero zokhö omo imane, ”Böi talifusö, böi mifalua zi lö sökhi. Uʼandrö khömi, ira matua daʼö tome ba nomogu. Böi mifalua zi lö atulö.
24 So nonogu alawe hegöi foʼomo ndra matua daʼö. Daʼuʼohe ira baero ba mifalua gofu hadia zomasi dödömi khöra.+ Hizaʼi, böi mifalua gamuata si lö sökhi khö ndra matua daʼö.”
25 Hewaʼae simanö, lö lafondrondrongo niwaʼönia. Iʼohe baero woʼomonia ba döi+ andrö ira matua niha Lewi ba ibeʼe khöra. Lahoröni ndra alawe daʼö ofeta moluo. Ba zihulö wongi daʼö lafofanö ia.
26 Me sihulö wongi sibai, ofeta ndra alawe daʼö ba no telögu tou ia föna mbawandruhö nomo ba zi mörö sokhö yaʼia, no ifadölö manö ia irugi tumbu luo.
27 Me maoso zokhö yaʼia sihulö wongi daʼö, ibokai mbawandruhö enaʼö itohugö wofanö ba iʼila ndra alawe andrö, foʼomonia ba döi, no ifadölö ia ba no igogohe mbawandruhö.
28 Imane, ”Faoso, mofanö ita.” Hizaʼi, lö idema-dema. Ifazawa ia ira matua andrö ba ibeʼe ba hulu galide, ba mangawuli ira ba nomo.
29 Me no larugi nomo, ihalö rosö* ba ibagi 12 wanataba mboto woʼomonia ba döi andrö. Aefa daʼö, idozigö wamaʼoheʼö misa ba mbanua ndraono Gizaraʼeli.
30 Ba dozi sangila lamane, ”Lö irai alua daʼa iʼotarai me aheta ndraono Gizaraʼeli ba danö Miserai irugi maʼökhö. Haogö angeragö* zalua andre,+ fatunö ba ombakhaʼö khöma hadia zinangea mafalua.”
Nisura ba gahe zura
^ Sin.: ”ba nosemi”.
^ Mazui te ”mangai halöwö ndraʼo ba nomo Yehowa”.
^ Sin.: ”Yaʼohahau dödöu”.
^ Sin.: ”rosö fanaba”.
^ Mazui ”Haogö wamatimbaisi ba dödöu”.
