Sanguhuku 20:1-48
-
Fasuwöta ba wolawa niha Mbeniami (1-48)
20 Tohare fefu ndraono Gizaraʼeli moroi ba Dano+ irugi Mbere-seba hegöi moroi ba danö Gileadi,+ aefa daʼö owulo fefu niha sato föna Yehowa ba Misefa.+
2 Fefu zondröniaʼö ono mbanua hegöi mado ndraono Gizaraʼeli fao ira ba gotalua nono mbanua Lowalangi, faʼatora 400.000 zaradadu sanörö tanö ba solohe föda.+
3 No larongo ira niha Mbeniami wa tohare ndraono Gizaraʼeli ba Misefa.
Lamane iraono Gizaraʼeli, ”Fatunö khöma hewisa wa tola alua zi lö sökhi andre?”+
4 Imane ira matua niha Lewi+ foʼomo ndra alawe nibunu andrö, ”Möi ndraʼo ba Gibea+ Mbeniami fao woʼomogu ba döi, ba daʼö mörö ndraʼaga.
5 Bongi daʼö, tohare niha* Gibea ba lafasui nomo si toröi yaʼaga. Edöna labunu ndraʼo, hizaʼi lahoröni woʼomogu ba döi ba mate ia.+
6 Andrö wa utataba mboto woʼomogu ba udozigö wamaʼoheʼö misa ba danö ondröita ndraono Gizaraʼeli,+ börö me no lafalua gamuata si lö sökhi ba Gizaraʼeli.
7 Iadaʼa, mibeʼe wanuturu lala+ hegöi mene-mene yaʼami iraono Gizaraʼeli.”
8 Hasara dödö ndraono Gizaraʼeli ba lamane, ”Tebai so ba gotaluada zangawuli ba nose mazui ba nomo.
9 Daʼa nifaluada ba niha Gibea: Tasuwö ira moloʼö dahö-dahö.+
10 Moroi ba mado ndraono Gizaraʼeli maʼafefu, tafili 10 moroi ba zi 100 niha, 100 moroi ba zi 1.000 niha, ba 1.000 moroi ba zi 10.000 zangaʼasogö balazo ndra saradadu enaʼö tola fasuwö ira ba Gibea Mbeniami börö gamuata si lö sökhi nifaluara ba ndraono Gizaraʼeli.”
11 Ba owulo fefu ndraono Gizaraʼeli ba wanuwö banua Gibea.
12 Fefu mado ndraono Gizaraʼeli, lafatenge niha ba mado Mbeniami ba wangumaʼö, ”Hana wa so zi lö sökhi andre ba gotaluami?
13 Mibeʼe baero niha si lö sökhi andrö moroi ba Gibea+ enaʼö mabunu ira ba mahori zi lö sökhi moroi ba Gizaraʼeli.”+ Hizaʼi, lö larongo ira niha Mbeniami wehede dalifusöra andrö, niha Gizaraʼeli.
14 Möi baero niha Mbeniami moroi ba mbanuara zamösana ba owulo ira ba Gibea ba wanuwö iraono Gizaraʼeli.
15 Me luo daʼö, laʼowuloi zaradadu ira niha Mbeniami ba mbanuara 26.000 niha zolohe föda baero nasa zi 700 ndra saradadu nifili moroi ba Gibea.
16 So 700 zaradadu nifili si takera, senahöi mangogunaʼö ribo-ribo ba lö mangoloi zara bu.
17 Baero mado Mbeniami, laʼowuloi iraono Gizaraʼeli 400.000 zaradadu si no toʼölö ba wangogunaʼö föda.+
18 Möi ndraono Gizaraʼeli ba Mbetieli ba wanofu khö Lowalangi,+ ”Haniha ba gotaluama zi oföna möi manuwö niha Mbeniami?” Imane Yehowa, ”Yehuda zi oföna.”
19 Mofanö ndraono Gizaraʼeli sihulö wongi sibai ba lafazökhi nosera ba wolawa Gibea.
20 Ba möi fasuwö ndraono Gizaraʼeli ba wolawa niha Mbeniami ba lafaʼoli ira ba wanuwö Gibea.
21 Möi baero niha Mbeniami moroi ba Gibea ba labunu 22.000 ndraono Gizaraʼeli maʼökhö daʼö.
22 Hizaʼi, lö ataʼu zaradadu ndraono Gizaraʼeli ba lafuli lafaʼoli ira fasuwö simane ba ngaluo si oföna.
23 Aefa daʼö, möi ndraono Gizaraʼeli ba Mbetieli ba lalau meʼe föna Yehowa irugi bongi. Lamane khö Yehowa, ”Hadia möiga masuwö nasa dalifusöma andrö niha Mbeniami?”+ Imane Yehowa, ”Misuwö ira.”
24 Laʼondrasi niha Mbeniami iraono Gizaraʼeli ba ngaluo si dua.
25 Möi baero niha Mbeniami moroi ba Gibea lafaondragö ndraono Gizaraʼeli ba ngaluo si dua ba labunu 18.000 ndraono Gizaraʼeli+ solohe föda.
26 Lafuli zui möi iraono Gizaraʼeli ba Mbetieli, modadao ira ba daʼö ba lalau meʼe föna Yehowa.+ Fuasö+ ira maʼökhö daʼö ofeta bongi ba labeʼe zumange nitunu+ awö zumange fangatulö+ khö Yehowa.
27 Aefa daʼö, manofu zui ndraono Gizaraʼeli khö Yehowa+ börö me ba daʼö so dawöla amabuʼula li Lowalangi sindruhu me luo daʼö.
28 Ba ginötö daʼö, Fineha+ ono Geleazari ono Gaʼaroni zangai halöwö tobali ere.* Manofu ndraono Gizaraʼeli, ”Hadia möiga zui masuwö dalifusöma andrö niha Mbeniami mazui löʼö?”+ Imane Yehowa, ”Misuwö ira, börö me ubeʼe ira ba dangami mahemolu.”
29 Aefa daʼö, lafataro zaradadura iraono Gizaraʼeli ba wamaʼuʼu+ niha Mbeniami ba zi fasui Gibea.
30 Möi ndraono Gizaraʼeli ba wanuwö niha Mbeniami ba ngaluo si tölu. Lafaʼoli ira ba wanuwö banua Gibea, simane si toʼölö.+
31 Me möi baero niha Mbeniami ba wanuwö ira saradadu andrö, lafandröndröu ira moroi ba mbanua simane nifaluara ba zilalö.+ Lasuwö ba labunu mato hadauga ndra saradadu ba lala sebua si numalö ba Mbetieli ba Gibea, irege so mato 30 niha ndraono Gizaraʼeli si mate baero mbanua.+
32 Lamane ira niha Mbeniami, ”Kala ira zui simane ba zilalö.”+ Sindruhunia no lawaʼö iraono Gizaraʼeli, ”Tawuwu ita furi enaʼö tedönisi ira ba lala sebua ba fandröndröu ira moroi ba mbanua.”
33 Mofanö ndraono Gizaraʼeli moroi ba nahiara ba lafaʼoli ira ba Mbaʼali-damara. Iraono Gizaraʼeli si no mamaʼanö yaʼira ba zi fasui daʼö, möi ira baero ba wamaʼuʼu banua Gibea.
34 Ira saradadu si 10.000 nifili moroi ba mado ndraono Gizaraʼeli, möi ira föna mbanua Gibea ba alua wasuwöta sabölö-bölö. Hizaʼi, lö aboto ba dödö niha Mbeniami wa lö ara tö teʼala ira.
35 Yehowa zokalaisi mado Mbeniami+ föna ndraono Gizaraʼeli. Ba zi maʼökhö daʼö, so 25.100 niha Mbeniami solohe föda nibunu ndraono Gizaraʼeli.+
36 Lawalinga kala ndraono Gizaraʼeli ira niha Mbeniami me lawuwu ira furi.+ Sindruhunia sa, wa lawuwu ira furi börö me laʼodaligö niha si no mamaʼanö yaʼira ba wamaʼuʼu niha Gibea.+
37 Alio sibai ndra niha samaʼuʼu andrö ba wanuwö Gibea. Lafazawili ira misa ba labunu fefu niha ba mbanua daʼö faoma föda.
38 No lafatunö iraono Gizaraʼeli khö ndra samaʼuʼu banua andrö enaʼö labeʼe dandra yaʼia daʼö simbo si numalö miyawa.
39 Me lawuwu ira furi iraono Gizaraʼeli ba wasuwöta, labunu ndraono Gizaraʼeli ira niha Mbeniami mato 30 niha+ ba lamane, ”Sindruhu-ndruhu wa kala ira simane ba zilalö.”+
40 Hizaʼi, ibörögö kalua zimbo moroi ba mbanua daʼö. Me lafaigi furi ira niha Mbeniami, laʼila wa no akhozi mbanuara ba numalö miyawa zimbo ba dalu mbanua.
41 Me lafuli ira furi iraono Gizaraʼeli ba wanuwö niha Mbeniami, izumaigö mukhölö danö khö ndra niha Mbeniami börö me lö ara tö teʼala ira.
42 Moloi ira ba gamaudu danö si mate, hizaʼi lö laböhöli iraono Gizaraʼeli wolohi yaʼira. Lasuwö göi niha Mbeniami ira saradadu si tohare moroi ba mbanuara.
43 Lafaʼuʼu niha Mbeniami iraono Gizaraʼeli ba lö laböhöli wolohi yaʼira. Lahundragö tou ba danö niha Mbeniami tefaudu föna mbanua Gibea tanö ba gatumbukha.
44 Lua-luania so 18.000 zi mate niha Mbeniami, fefu oi saradadu sagabölö.+
45 Mangawuli furi niha Mbeniami ba moloi ira gamaudu danö si mate numalö ba Hili Sokara Rimona,+ ba 5.000 niha Mbeniami nibunu* ndraono Gizaraʼeli ba lala sebua. Latohugö nasa iraono Gizaraʼeli wolohi yaʼira ofeta ba Gideomo ba labunu 2.000 tö.
46 Faʼato niha Mbeniami zi mate me luo daʼö 25.000 niha, oi solohe föda+ ba saradadu sagabölö.
47 So 600 zangawuli furi ba danö si mate ba Hili Sokara Rimona, ba toröi ira ba daʼö öfa waŵa waʼara.
48 Latohugö lasuwö zui niha Mbeniami iraono Gizaraʼeli ba labunu fefu niha si toröi ba mbanua faoma föda. Labunu niha hegöi urifö ba latunu fefu mbanua nitöröra.
