Sanguhuku 21:1-25
-
Te’orifi mado Mbeniami (1-25)
21 No irai fahölu ndraono Gizaraʼeli ba Misefa,+ ”Lö hadöi ba gotaluama sameʼe ononia alawe tobali foʼomo niha Mbeniami.”+
2 Möi ndraono Gizaraʼeli ba Mbetieli+ ba modadao ira föna Lowalangi sindruhu irugi bongi, labörögö weʼao si fao fege-ege ba waʼabu dödö.
3 Lamane, ”He Yehowa Lowalangi ndraono Gizaraʼeli, hana wa alua daʼa ba Gizaraʼeli? Hana wa taya maʼökhö sambua mado ba Gizaraʼeli?”
4 Mahemolunia, maoso ira sihulö wongi sibai ba lafazökhi naha wameʼe sumange nitunu ba sumange fangatulö.+
5 Lamane iraono Gizaraʼeli, ”Haniha ba gotalua mado ndraono Gizaraʼeli me luo daʼö zi lö mangondrasi Yehowa ba Misefa?” börö me no möi ira ba hölu wa hasambalö labunu gofu haniha zi lö mangondrasi Yehowa ba Misefa.
6 Abu sibai dödö ndraono Gizaraʼeli börö zalua andrö khö dalifusöra Beniami. Lamane, ”Maʼökhö andre no taya sambua mado moroi ba Gizaraʼeli.
7 Hadia zinangea tafalua ba niha si toröi andrö enaʼö lasöndra woʼomora ira alawe, börö me no möi ita ba hölu khö Yehowa+ wa tebai tabeʼe nonoda alawe tobali foʼomora?”+
8 Manofu ira, ”Haniha ba gotalua mado ndraono Gizaraʼeli me luo daʼö zi lö mangondrasi Yehowa ba Misefa?”+ Ba ginötö daʼö, lö hadöi niha moroi ba Yabesi-gileadi zi möi ba nahia waʼowulo ndraono Gizaraʼeli.
9 Me laʼerai niha sangondrasi, samösa lö si möi niha Yabesi-gileadi.
10 Ba lafatenge 12.000 niha ndra saradadu sagabölö ba daʼö. Lamane khöra, ”Mibunu niha Yabesi-gileadi faoma föda, he ira alawe hegöi iraono.+
11 Fefu ndra matua, simanö göi ndra alawe si no irai orudu ba ndra matua hasambalö mibunu.”
12 Ba gotalua niha Yabesi-gileadi lasöndra 400 nono alawe si lö irai orudu ba ndra matua, ba laʼohe ira ba Zilo+ si so ba danö Ganaʼana.
13 Aefa daʼö, fefu zangondrasi lafaʼoheʼö goroisara khö ndra niha Mbeniami ba Hili Sokara Rimona+ enaʼö atulö ira.
14 Mangawuli niha Mbeniami ba mbanuara me luo daʼö. Ira alawe si lö labunu ba Yabesi-gileadi,+ labeʼe ba niha Mbeniami hizaʼi lö dozi ira fefu.
15 Abu sibai dödö niha sato ba zalua khö Mbeniami+ börö me Yehowa zangeheta yaʼira moroi ba mado Gizaraʼeli.
16 Lamane ira sondröniaʼö ndraono Gizaraʼeli, ”Hadia nifaluada enaʼö so woʼomo ndra niha si toröi andre, börö me no mate fefu ndra alawe niha Mbeniami?”
17 Latema li, ”Niha Mbeniami si lö mubunu, hasambalö latema danö ondröita enaʼö böi taya zambua mado ba Gizaraʼeli.
18 Hizaʼi, tebai tabeʼe nonoda alawe tobali foʼomora, börö me no möi ba hölu ndraono Gizaraʼeli, ’Niʼelifi niha sameʼe ononia alawe ba niha Mbeniami.’”+
19 Aefa daʼö lamane, ”Ero röfi, so gowasa khö Yehowa ba Zilo,+ tanö yöu Mbetieli, ba tanö ba gatumbukha, iʼotarai lala sebua sanösö ba Mbetieli numalö ba Zikhema, tanö raya Lebona.”
20 Lawaʼö ba niha Mbeniami, ”Miʼaeʼe ba kabu nagu ba mihenaigö ami ba wamaʼuʼu.
21 Na miʼila ndraono alawe sanari niʼogaolo si tohare moroi ba Zilo, miʼae baero moroi ba kabu nagu andrö ba mihalö foʼomomi samösa ba gotalua nono alawe Zilo andrö. Aefa daʼö, miʼangawuli ba danö Mbeniami.
22 Na tohare namania mazui talifusönia matua ba mangadu ira khöma, mamane khöra, ’Hakhösi tödö ndraʼaga hegöi yaʼira, börö me tebai maʼasogö woʼomora ira alawe moroi ba wasuwöta,+ ba tebai göi mibeʼe woʼomora ira alawe, börö me fasala ami.’”+
23 Lafalua daʼö ira niha Mbeniami, ba oi zara lahalö foʼomora ndra alawe sanari no mege. Aefa daʼö, mangawuli ira ba danö ondröita khöra, lafuli lafasindro mbanuara+ ba toröi ira ba daʼö.
24 Moroi ba daʼö, oi zara mofanö ndraono Gizaraʼeli numalö ira ba mbanuara hegöi ba madora, ba lasawa danö ondröita khöra zamösana.
25 Me luo daʼö, lö hadöi razo ba ndraono Gizaraʼeli.+ Lafalua zatulö moloʼö famaigira zamösana.
