Sanguhuku 3:1-31
3 Daʼa soi nitehegö Yehowa enaʼö toröi ira ba daʼö, ba wanandraigö iraono Gizaraʼeli si lö irai fasuwö ba niha Ganaʼana.+
2 Wa ifalua daʼö enaʼö toʼölö ba tefamaha ba wasuwöta ngaʼötö ndraono Gizaraʼeli si lö irai fasuwö.
3 Soi nitehegö andrö yaʼia zi dalima samatörö niha Wilisiti,+ ba fefu niha Ganaʼana, niha Zidona+ awö niha Hewi+ si toröi ba Hili Libano,+ moroi ba Hili Mbaʼali-heremono irugi Lebo-hamata.*+
4 Iʼogunaʼö ira ba wanandraigö iraono Gizaraʼeli, hadia laʼoʼö goroisa Yehowa nibeʼenia khö ndra tuara nifaʼema Moze.+
5 Toröi ndraono Gizaraʼeli ba gotalua niha Ganaʼana,+ Kheti, Amori, Feresi, Hewi ba Yebusi.
6 Mangowalu ira ba nono alawe soi daʼö, labeʼe göi nonora alawe ba nono matua soi andrö ba labörögö lafosumange lowalangi böʼö.+
7 Lafalua zi lö sökhi iraono Gizaraʼeli föna Yehowa. Olifu ira Lowalangira Yehowa ba lafosumange Mbaʼali+ awö döla-döla niʼamoniʼö.*+
8 Mofönu sibai Yehowa ba ndraono Gizaraʼeli, iʼamawa ira ba danga Gusa-risataʼi razo Mezofotamia.* Tobali ira sohalöwö khö Gusa-risataʼi walu fakhe waʼara.
9 Me laʼandrö wanolo iraono Gizaraʼeli khö Yehowa,+ iʼasogö khöra Yehowa samösa zangorifi yaʼira+ yaʼia daʼö Otenieli+ ono Genasi, akhi Galebi.
10 Tebeʼe khönia Geheha Yehowa+ ba tobali ia sanguhuku ba ndraono Gizaraʼeli. Me fasuwö ia, ibeʼe ba dangania Yehowa Gusa-risataʼi razo Mezofotamia* irege kala razo andrö.
11 Ba lasöndra waʼohahau dödö ba zi 40 fakhe waʼara. Aefa daʼö, mate Gotenieli ono Genasi.
12 Lafalua zui zi lö sökhi iraono Gizaraʼeli föna Yehowa,+ irege ilulu ira Yehowa ba danga Negelona razo Moabi+ ba wokalaisi iraono Gizaraʼeli, börö me lafalua zi lö sökhi föna Yehowa.
13 Fao göi niha Gamoni+ faoma Amaleki+ ba wolawa iraono Gizaraʼeli. Lasuwö ndraono Gizaraʼeli ba larabu mbanua geu khorema.+
14 Tobali ira sohalöwö khö Negelona razo Moabi 18 fakhe waʼara.+
15 Aefa daʼö, laʼandrö wanolo iraono Gizaraʼeli khö Yehowa.+ Andrö wa ibeʼe khöra Yehowa samösa zangefaʼö,+ yaʼia daʼö Ehudi+ ono Gera, niha Mbeniami+ si takera.+ Ba gafuriata lafaʼoheʼö khönia mbeʼelö enaʼö ifaʼema khö Negelona razo Moabi.
16 Ifazökhi khönia wöda Ehudi, gari si faoma bawa, faʼanaunia mato 38 sentimeter,* ba iböbö ba wahania kambölö barö mbarunia.
17 Aefa daʼö, iʼohe mbeʼelö khö Negelona razo niha Moabi. Esolo sibai Negelona andrö.
18 Me no ibeʼe mbeʼelö andrö Ehudi, iwaʼö ba niha samasao beʼelö enaʼö mofanö ira.
19 Hizaʼi, me no irugi naha wanoto adu* ba Giligala,+ ifuli ia furi ba imane, ”So niwaʼögu khöu razo, si tebai larongo niha.” Imane razo khö ndra enoninia, ”Miröi ndraʼaga ba daʼa!” Börö daʼö, mofanö ira.
20 Möi Gehudi ba wangondrasi razo me ha yaʼi-yaʼia zi dadao ba nahiania sokafu-kafu ba dete nomo. Imane Ehudi, ”So goroisa Lowalangi khöu razo.” Mozizio razo moroi ba dadaomania.
21 Faoma tangania kabera isöbi wödania Ehudi moroi ba wahania kambölö ba itaruʼö ba dalu razo.
22 Tetaru wöda daʼö ba dalu razo irege möi bakha ndranga wöda andrö. Lö isöbi wödania andrö Ehudi irege teʼuʼu ba dawö ba fafura baero zi taʼunönia.
23 Iduhö mbawandruhö andrö Ehudi si so ba dete nomo aefa daʼö ikusi, ba moloi ia itörö fale-fale.*
24 Me no mofanö ia, mangawuli ndra enoni razo ba laʼila wa no tekusi mbawandruhö. Lamane, ”No möi ia ba nidanö sebua* ba naha sokafu-kafu andrö khönia.”
25 Labalo-baloi irege aila ira, hizaʼi börö me lö ibokai mbawandruhönia ba dete nomo, lahalö nono kusi ba labokai, ba laʼila wa no tegaölö razo tou ba zalo* ba no mate.
26 Moloi Gehudi gasa-gasa wamaigira amatela razo, itörö gotalua nadu si no mutoto+ aefa daʼö irugi Zeʼira, lö hadia ia khönia.
27 Me no irugi daʼö, ifoli dorofe nifazökhi moroi ba dandru+ ba mbanua si so ba hili Geferai,+ aefa daʼö idöniaʼö ndraono Gizaraʼeli moroi ba hili andrö.
28 Imane, ”Miʼoʼö ndraʼo. Udumi niha Moabi andrö no ibeʼe ba dangami Yehowa.” Laʼoʼö ia ba larabu nahia götöna ba Nungo Nidanö Yoridano, enaʼö tebai laʼötö ira niha Moabi. Lö latehegö gofu haniha zanörö.
29 So mato 10.000 nibunura niha Moabi+ sagabölö ba si barani. Samösa lö soloi.+
30 Kala niha Moabi ba danga ndraono Gizaraʼeli ba lasöndra waʼohahau dödö sagötö zi 80 fakhe waʼara.+
31 Aefa daʼö, Samigaro+ ono Ganata tobali sangefaʼö iraono Gizaraʼeli fangali Gehudi. Yaʼia zamunu niha Wilisiti si 600 niha+ faoma siʼo gubalo.+
Nisura ba gahe zura
^ Mazui ”lala si numalö ba Hamata”.
^ Faigi Geluaha Ngawua Wehede.
^ Sin.: ”Aramo-naharaʼi”.
^ Sin.: ”Aramo”.
^ Mazui te ”naha wogao kara”.
^ Mazui te ”zara-zara”.
^ Sin.: ”mombalugö ahenia”.
^ Sin.: ”ba danö”.
