Sanguhuku 4:1-24
4 Hizaʼi, me no mate Gehudi, lafalua zui zi lö sökhi iraono Gizaraʼeli föna Yehowa.+
2 Börö daʼö, iʼamawa ira Yehowa ba danga Yabino razo Ganaʼana,+ samatörö ba Hasora. Kafalo zaradadunia yaʼia daʼö Sisera, si toröi ba Haroseti-hagoyi.*+
3 Laʼandrö wanolo iraono Gizaraʼeli khö Yehowa,+ börö me so 900 gureta wasuwöta nifosabi*+ khö Yabino ba 20 fakhe ifakao ndraono Gizaraʼeli.+
4 Me luo daʼö, so samösa ndra alawe samaʼeleʼö+ sotöi Debora, foʼomo Lafidoti, ifaʼema wanguhuku Lowalangi ba ndraono Gizaraʼeli.
5 Si toʼölönia, modadao Debora ba mbörö geu khorema ba gotalua Rama+ hegöi Betieli+ ba mbanua si so ba hili Geferai. No toʼölö möi khönia ndraono Gizaraʼeli ba wanofu sanandrösa ba wanguhuku moroi khö Lowalangi.
6 Ifaʼoheʼö goroisa Debora khö Mbaraki+ ono Gabinoa moroi ba Gadesi-nafetali,+ ”Daʼa niwaʼö Yehowa Lowalangi ndraono Gizaraʼeli, ’Ofanö, aeʼe* ba Hili Dabora, ohe 10.000 niha Nafetali hegöi Sebuloni.
7 Uʼalui lala enaʼö iʼondrasi ndraʼugö Sisera, kafalo zaradadu Yabino ba Nungo Nidanö Kizono,+ fao ba daʼö gureta wasuwöta awö zaradadunia, ba ubeʼe ia ba dangau.’”+
8 Imane Baraki, ”Na fao ndraʼugö khögu, ba möido. Na löʼö, ba lö möido.”
9 Imane Debora, ”Hasambalö möido. Hizaʼi, lö tefolakhömi ndraʼugö ba wasuwöta daʼa börö me Yehowa zameʼe Sisera ba danga zi samösa ira alawe.”+ Aefa daʼö, fao Debora khö Mbaraki ba Gadesi.+
10 Ifakaoniʼö Zebuloni andrö Baraki hegöi Nafetali+ numalö ba Gadesi ba 10.000 zoloʼö yaʼia. Fao göi khönia Debora.
11 Me luo daʼö, no lafabali niha Heberi moroi ba niha Geni,+ ngaʼötö Hobaba ama matua Moze,+ ahatö geu sebua Zaʼanani so nosenia, si so ba Gadesi.
12 Laʼombakhaʼö khö Zisera wa no möi miyawa ba Hili Dabora Mbaraki ono Gabinoa.+
13 Iʼowuloi fefu zaradadunia Sisera awö zi 900 gureta wasuwöta nifosabi* niʼokhögönia. Mofanö ira moroi ba Haroseti-hagoyi numalö ba Nungo Nidanö Kizono.+
14 Imane Debora khö Mbaraki, ”Aeʼe, ibeʼe maʼökhö Zisera ba dangau Yehowa. Hadia tenga Yehowa zi fasuwö fönamö?” Börö daʼö, möi mitou Mbaraki moroi ba Hili Dabora ba 10.000 zoloʼö yaʼia.
15 Ifawukaisi fefu zaradadu andrö Yehowa hegöi kureta wasuwöta khö Zisera faoma föda Mbaraki.+ Afuriatania, möi tou Zisera moroi ba guretania ba ilau moloi faböi labunu ia.
16 Igohi gureta wasuwöta awö zaradadu andrö Baraki irugi Haroseti-hagoyi, ba ahori mate fefu zaradadu Zisera. Samösa lö soloi.+
17 Hizaʼi, moloi Zisera ba nose Yaʼela,+ foʼomo Heberi+ niha Geni, börö me lö si faʼudu nösi nomo Heberi khö Yabino+ razo Hasora.
18 Möi baero Yaʼela, ifaondragö Zisera ba imane, ”Ae yomo Pa. Böi ataʼufi.” Möi yomo Zisera ba nose, ifoʼambala ia Yaʼela.
19 Imane Sisera, ”Beʼe ögu maʼifu nidanö andrö, owökhi sibai dödögu.” Ibokai Yaʼela naha* susu ba ibeʼe önia,+ aefa daʼö ifuli ifoʼambala.
20 Imane Sisera, ”Ozizio ba zinga mbawandruhö. Na so zanofu, ’Hadia so niha ba daʼö?’ waʼö manö lö hadöi.”
21 Me no erege dödö Zisera ba abölö-bölö sibai wemörönia, maoso Yaʼela foʼomo Heberi, ihalö daru-taru nose awö wanoko, idaʼi-daʼi weʼamöi bakha ba nose, itoko daru-taru andrö ba dangi-dangi Zisera irege tetaru ba danö ba mate.+
22 Aefa daʼö, tohare Mbaraki solohi Sisera. Möi baero Yaʼela ba wamalukhaisi yaʼia imane, ”Aine, daʼuforomaʼö khöu niha niʼalu-aluimö.” Me möi ira bakha, iʼila Baraki wa no tegaölö tou Zisera ba mate. No tetaru ba dangi-danginia daru-taru nose andrö.
23 Me luo daʼö, kala Yabino razo Ganaʼana ibeʼe Lowalangi föna ndraono Gizaraʼeli.+
24 Itugu abölö danga ndraono Gizaraʼeli ba wametaʼu Yabino razo Ganaʼana,+ ba gafuriata labunu Yabino razo Ganaʼana.+
Nisura ba gahe zura
^ Mazui ”Haroseti ngawalö soi”.
^ Sin.: ”gureta siʼöli”.
^ Mazui ”ohe zaradadumö”.
^ Sin.: ”gureta siʼöli”.
^ Nifazökhi moroi ba guli gurifö.
